ကရင်နီပြည်နယ်၊ ဒီးမော့ဆိုမြို့နယ် အနောက်ဘက်ခြမ်းမှာ ဓာတ်ဆီတလီတာကို ကျပ် ၃,၅၀၀ ကနေ ၈,၀၀၀၊ ၁၀,၀၀၀ အထိ နှစ်ဆကျော် မြင့်တက်လာတယ်လို့ ဒေသခံတွေက ပြောပါတယ်။

မတ် ၂ ရက်နေ့ နောက်ပိုင်းကစလို့ ဓာတ်ဆီတလီတာကို ၃,၅၀၀ ရှိရာကနေ ကမ္ဘာ့နိုင်ငံရေးအပြောင်းအလဲကြောင့် တရိပ်ရိပ်တက်ရင်း အခုလက်ရှိမှာတော့ ၈,၅၀၀ နှုန်းနဲ့ ဝယ်ယူရတယ်လို့ သိရပါတယ်။

ဒေသခံအမျိုးသားတယောက်က “အနောက်ခြမ်းက ၈,၀၀၀၊ ၈,၅၀၀။ တချို့နေရာဆို ၁၀,၀၀၀။ စျေးကတော့ အတက်အကျရှိနေတယ်၊ အကျတော့ သိပ်မရှိဘူး။ ဆိုင်ကယ်တောင် မစီးနိုင်တော့ဘူး” လို့ ​ပြောပါတယ်။

ဓာတ်ဆီစျေးမြင့်တက်လာတဲ့အပြင် ဆန်စျေးလည်း တအိတ်ကို ကျပ် ၂၅,၀၀၀၊ ၃၀,၀၀၀ မြင့်တက်လာတာကြောင့် ထမင်းတမျိုးကိုပဲ အဓိကအားထားပြီး စားသောက်ရသူတွေအတွက် ခက်ခဲတယ်လို့ သိရပါတယ်။

ကမ္ဘာ့နိုင်ငံရေးအပြောင်းအလဲကြောင့် စစ်တပ်စိုးမိုးထားတဲ့နေရာတွေမှာ ဓာတ်ဆီကို ဝယ်ယူတဲ့ယာဥ်တွေက စုံရက် မ ရက်အနေနဲ့ ဝယ်ယူရတာမျိုးတွေလည်း ရှိနေသလို ရက်မှားရင် ဆီဖြည့်မရတာတွေလည်း ရှိတယ်လို့ သိရပါတယ်။