မန္တလေးတိုင်း၊ လူမှုဖူလုံရေး အလုပ်သမားဆေးရုံကြီးမှာ ဆေးကုသမှု ခံယူနေတဲ့ အလုပ်သမားတွေဆီကနေ ခွဲစိတ်ခ ငွေကြေးနဲ့ အလှူငွေ ခေါင်းစဉ်အမျိုးမျိုးတပ်ပြီး ငွေကြေး တောင်းခံနေတယ်လို့ ကိုယ်တိုင်ကြုံရတဲ့ အလုပ်သမားတွေက ပြောပါတယ်။

အောင်မြေသာဇံမြို့နယ်၊ ၆၆ လမ်းနဲ့ ၁၄ လမ်းထောင့်မှာရှိတဲ့ အလုပ်သမားဆေးရုံကြီးမှာ ဆေးရုံအုပ်ကြီးဖြစ်သူ ခွဲစိတ်ဆရာဝန် ဒေါက်တာဗညား ဦးဆောင်ပြီး လူနာအလုပ်သမားတွေဆီက အလှူငွေတောင်းခံတာ၊ ခွဲစိတ်ခအတွက် ငွေကြေးကြိုတောင်းနေတယ်လို့ ကိုယ်တိုင်ကြုံရသူတွေက ပြောပါတယ်။

အလုပ်သမားတွေရဲ့ ပြောပြချက်အရ ခွဲစိတ်ကုသမှု လုပ်မယ်ဆိုရင် ခွဲခန်းသုံးပစ္စည်းတွေ၊ ဆပ်ပြာ၊ အမှိုက်အိတ် စတဲ့ အသုံးအဆောင်ပစ္စည်းတွေကိုပါ လူနာဘက်က ဝယ်ယူပေးရတယ်လို့ ဆိုပါတယ်။ အခုလို ဖြစ်ပွားနေတာ အချိန် ၆ လနီးပါး ရှိနေပြီဖြစ်ပြီး အလုပ်သမား အယောက် ၃၀ ကျော်ထက်မနည်း ကြုံခဲ့ရတယ်လို့ သိရပါတယ်။

ခွဲစိတ်ကုသမှုတွေကိုလည်း အသေးစား၊ အလတ်စား၊ အကြီးစားဆိုပြီး ခေါင်းစဉ်တပ်ကာ အနည်းဆုံး ကျပ် ၁၅ သိန်း ဝန်းကျင်လောက်က စပြီး ငွေကြေးတောင်းခံတယ်လို့ အလုပ်သမားတွေက ပြောပါတယ်။

ကာယကံရှင် အလုပ်သမားတယောက်က “သူတို့က ပိုက်ဆံကို ကြိုတောင်းတာ။ သွားပြတဲ့နေ့ကတည်းက ဘယ်လောက်လောက် ကုန်မယ်ဆိုပြီး ကြိုတောင်းတာ။ ခွဲခန်းသုံးမဲ့ ပစ္စည်းတွေ ဝယ်ဖို့ဆိုပြီး ကြိုတောင်းတာ။ ဆေးရုံက ပိုက်ဆံတောင်းတာတော့ လူနာတိုင်းကို တောင်းတယ်။ ကျနော်က ဖြစ်စေချင်တာတော့ ဖူလုံရေးရုံးကိုပဲ တိုက်ရိုက်လုပ်စေချင်တယ်” လို့ ပြောပါတယ်။

ဒီကိစ္စနဲ့ပတ်သက်လို့ မဟာအောင်မြေ၊ ချမ်းအေးသာစံ၊ အောင်မြေသာဇံ၊ ပြည်ကြီးတံခွန်နဲ့ အမရပူရ မြို့နယ်တွေက လူမှုဖူလုံရေးရုံးတွေကို တိုင်ကြားထားပေမဲ့ ထိရောက်တဲ့ ဖြေရှင်းဆောင်ရွက်မှု မရှိဘူးလို့ အလုပ်သမားတွေက ပြောပါတယ်။

အလုပ်သမားတွေဟာ ဥပဒေအရ လူမှုဖူလုံရေးကြေး လစဉ်ပေးသွင်းထားတာကြောင့် အလုပ်သမား ဆေးရုံတက် ကုသတဲ့အခါ ထပ်မံ ငွေကြေးတောင်းခံတာ ဥပဒေနဲ့ မညီညွတ်ဘူးလို့ မြန်မာနိုင်ငံ စက်မှုလက်မှုနှင့် ဝန်ဆောင်မှုလုပ်ငန်းပေါင်းစုံ အလုပ်သမားသမဂ္ဂများအဖွဲ့ချုပ်က ပြောပါတယ်။

MICS- TUsFs အထွေထွေအတွင်းရေးမှူးချုပ် ဦးသက်နှင်းအောင်က “ကျနော်တို့ လူမှုဖူလုံရေးဥပဒေအရဆိုရင် ဆေးရုံတက်တဲ့ အလုပ်သမားတွေက အခွန်ဆောင်ထားပြီးသား ဖြစ်တယ်။ တနည်းအားဖြင့် လူမှုဖူလုံရေးကြေး ပေးပြီးသား ဖြစ်ပါတယ်။ ဒီလိုမျိုး လူမှုဖူလုံရေးကြေး အခွန်ဆောင်ထားပြီးသား အလုပ်သမားတွေဆီကနေ ထပ်ပြီးတော့ ခေါင်းစဉ် အမျိုးမျိုးပြပြီး ငွေကြေးကောက်ခံတာက ဥပဒေနဲ့ မညီညွတ်ပါဘူး။ ဒါ့အပြင် လူမှုဖူလုံရေးအဖွဲ့ အနေနဲ့ ချက်ချင်းဖြေရှင်းဆောင်ရွက်ပေးဖို့ လိုပါတယ်။ နစ်နာသွားတဲ့ အလုပ်သမားတွေကိုလည်း လျော်ကြေးပေးဖို့ လိုသလို ဒီလိုကိစ္စတွေ ထပ်မဖြစ်အောင် ဆေးရုံအုပ်ကို ထိထိရောက်ရောက် အရေးယူဖို့ လိုပါတယ်” လို့ ပြောပါတယ်။

လက်ရှိ နိုင်ငံရေးအခြေအနေကြောင့် အလုပ်သမားသမဂ္ဂ လှုပ်ရှားမှုတွေ ကန့်သတ်ခံနေရတဲ့ အချိန်မှာ အလုပ်သမားတွေအပေါ် အခုလို အကျင့်ပျက် လာဘ်စားမှုတွေ ပိုမို ဖြစ်ပေါ်လာနေတယ်လို့ အလုပ်သမားအရေး လှုပ်ရှားသူတွေက ပြောပါတယ်။

လူမှုဖူလုံရေးစနစ်အရ အလုပ်သမားတွေဟာ လစဉ် လုပ်အားခရဲ့ ၂ ရာခိုင်နှုန်း၊ အလုပ်ရှင်ဘက်က ၃ ရာခိုင်နှုန်း၊ စုစုပေါင်း ၅ ရာခိုင်နှုန်းကို လူမှုဖူလုံရေးကြေးအဖြစ် ပေးဆောင်ထားတာဖြစ်ပြီး လူမှုဖူလုံရေးဆေးရုံတွေမှာ ဆေးကုသမှု ခံယူရင် ထပ်မံငွေကြေးပေးစရာ မလိုဘူးလို့ သိရပါတယ်။

ဇွဲသစ်