အဲဗာတန်အသင်းဟာ ဒီနေ့မနက်ကစားခဲ့တဲ့ ပရီးမီးယားလိဂ်ပွဲစဉ်မှာ ဘန်လေအသင်းကို ၂ ဂိုး ဂိုးမရှိနဲ့ အနိုင်ယူပြီး ပရီးမီးယားလိဂ်မှာ အိမ်ကွင်း ၆ ပွဲဆက် နိုင်ပွဲပျောက်ဆုံးနေမှုကို အောင်မြင်စွာ အဆုံးသတ်နိုင်ခဲ့ပါတယ်။
ပွဲချိန် ၃၂ မိနစ်မှာ တာကောစကီးရဲ့ အဖွင့်ခေါင်းတိုက်ဂိုးနဲ့အတူ ဦးဆောင်နိုင်ခဲ့သလို ဒုတိယပိုင်းမှာလည်း ဒီယူးစ်ဘူရီဟောက ဒုတိယမြောက် အနိုင်ဂိုးကို ထပ်မံသွင်းယူပေးခဲ့တာကြောင့် အဲဗာတန်အတွက် အဖိုးတန် ၃ မှတ်ကို ရရှိစေခဲ့ပါတယ်။
ဒီနိုင်ပွဲကြောင့် အဲဗာတန်ဟာ အဆင့် ၈ နေရာအထိ တက်လှမ်းနိုင်ခဲ့ပြီး တပွဲပိုကစားကာ အဆင့် ၆ နေရာက ချဲလ်ဆီးနဲ့ ၂ မှတ်အကွာကို ရောက်ရှိလာတာကြောင့် လာမဲ့ရာသီ ဥရောပဝင်ခွင့်အတွက် မျှော်လင့်ချက်တွေ ပိုမိုအားကောင်းလာခဲ့ပြီ ဖြစ်ပါတယ်။
တဖက်မှာ ရှုံးနိမ့်ခဲ့တဲ့ ဘန်လေအသင်းကတော့ တန်းဆင်းဇုန်ထဲမှာပဲ ဆက်လက် ရုန်းကန်နေရဆဲဖြစ်ပြီး ပရိသတ်တွေကလည်း နည်းပြ စကော့ပါကားအပေါ် မကျေမနပ် ဖြစ်နေကြပါတယ်။
