အာဆင်နယ်အသင်းဟာ ချဲလ်ဆီးအသင်းကို ၂ ဂိုး ၁ ဂိုးနဲ့ အနိုင်ရရှိခဲ့ပြီး ပရီးမီးယားလိဂ်ဇယားထိပ်မှာ ဒုတိယနေရာက မန်စီးတီးကို ၅ မှတ်အကွာနဲ့ ဆက်လက် အသာစီးရယူနိုင်ခဲ့ပါတယ်။
ဒီနိုင်ပွဲမှာ အဆုံးအဖြတ်ဖြစ်ခဲ့တဲ့ ဂိုးတွေကို ထောင့်ကန်ဘောတွေကတဆင့် နောက်ခံလူ ဆာလီဘာနဲ့ ယူရီယန်တင်းဘားတို့က သွင်းယူပေးခဲ့တာပါ။
ဒီရာသီမှာ အာဆင်နယ်ဟာ ထောင့်ကန်ဘောကနေ ၁၆ ဂိုးအထိ သွင်းယူထားနိုင်ပြီး ဒါဟာ ပရီးမီးယားလိဂ်သမိုင်းတလျှောက် တရာသီအတွင်း အများဆုံးစံချိန်ကို လိုက်မီခဲ့တာလည်း ဖြစ်ပါတယ်။
ဒါ့အပြင် အနိုင်ဂိုးကို ထောင့်ကန်ဘောကနေ ၉ ကြိမ်အထိ ရယူနိုင်ခဲ့တာကြောင့် ဒါဟာ ပြိုင်ပွဲသမိုင်းမှာ အများဆုံးစံချိန်သစ် ဖြစ်လာခဲ့ပါတယ်။
ဝေဖန်သူတချို့က အာဆင်နယ်ရဲ့ ကစားဟန်ဟာ “အရုပ်ဆိုးလွန်း” ပြီး တည်ကန်ဘောတွေကိုပဲ အားကိုးနေရတယ်လို့ ဆိုပေမဲ့ နည်းပြအာတီတာကတော့ ဒါဟာ ပြိုင်ဘက်အလိုက် လိုက်လျောညီထွေ ကစားရတဲ့ “လှပတဲ့ဘောလုံး” သာ ဖြစ်တယ်လို့ တုံ့ပြန်ခဲ့ပါတယ်။
အာဆင်နယ်ဟာ လက်ရှိမှာ ပရီးမီးယားလိဂ်နဲ့ ချန်ပီယံလိဂ်တို့မှာ ရလဒ်ကောင်းတွေ ရရှိနေသလို ကာရာဘောင်ဖလား ဗိုလ်လုပွဲကိုလည်း တက်ရောက်ထားနိုင်ပါတယ်။
ချန်ပီယံဆုအတွက် ၉ ပွဲသာ လိုတော့တဲ့အချိန်မှာ အာဆင်နယ်အနေနဲ့ ၂၀၀၄ နောက်ပိုင်း ပထမဆုံးလိဂ်ဖလားကို သိမ်းပိုက်နိုင်မလားဆိုတာ စောင့်ကြည့်ရမှာ ဖြစ်ပါတယ်။
