မြန်မာနိုင်ငံမှာ စစ်တပ် အာဏာသိမ်းပြီးနောက်မှာ ဆက်တိုက်ကျဆင်းလာတဲ့ နိုင်ငံခြားရင်းနှီးမြှုပ်နှံမှု ဝင်ရောက်တဲ့ ပမာဏဟာ ၂၀၂၅-၂၆ ဘဏ္ဍာနှစ်ရဲ့ ပထမ ၁၀ လမှာ အမေရိကန်ဒေါ်လာ ၃၉၈ ဒသမ ၃ သန်းပဲ ရှိပါတယ်။
အခုနှစ် နိုင်ငံခြားရင်းနှီးမြှုပ်နှံမှု ဝင်ရောက်တဲ့ ကဏ္ဍတွေကတော့ မွေးမြူရေးနဲ့ ရေလုပ်ငန်းမှာ အမေရိကန်ဒေါ်လာ ၂ ဒသမ ၅ သန်း၊ ကုန်ထုတ်လုပ်မှုမှာ အမေရိကန်ဒေါ်လာ ၂၀၄ ဒသမ ၈ သန်း၊ စွမ်းအင်ကဏ္ဍမှာ အမေရိကန်ဒေါ်လာ ၃၅ ဒသမ ၃ သန်း၊ ရေနံနဲ့ ဓာတ်ငွေ့ ကဏ္ဍမှာ အမေရိကန် ဒေါ်လာ ၂၁ သန်း၊ သယ်ယူပို့ဆောင်ရေးနဲ့ ဆက်သွယ်ရေး ကဏ္ဍမှာ ၁၃၁ ဒသမ ၄ သန်း၊ ဝန်ဆောင်မှု ကဏ္ဍမှာ ၃ ဒသမ ၂ သန်း အသီးသီးဝင်ရောက်ထားပါတယ်။
ဒါဟာ အာဏာသိမ်းပြီးနောက်ပိုင်း ဘဏ္ဍာနှစ်တနှစ်ရဲ့ ပထမ ၁၀ လအတွင်း နိုင်ငံခြား ရင်းနှီးမြှုပ်နှံမှု ဝင်ရောက်တဲ့ပမာဏ အနည်းဆုံး ဖြစ်ပါတယ်။
ပြီးခဲ့တဲ့ ဘဏ္ဍာနှစ်တွေ့နဲ့ နှိုင်းယှဉ်မယ်ဆိုရင် ၂၀၂၂-၂၃ ဘဏ္ဍာနှစ် ကာလတူမှာ အမေရိကန်ဒေါ်လာ ၁၄၇၆ သန်း၊ ၂၀၂၃-၂၄ ဘဏ္ဍာနှစ် ပထမ ၁၀လမှာ အမေရိကန်ဒေါ်လာ ၆၁၀ သန်း၊ ၊ ၂၀၂၄-၂၅ ဘဏ္ဍာနှစ် ကာလတူမှာ အမေရိကန်ဒေါ်လာ ၆၅၆ သန်း ရှိခဲ့ပါတယ်။
ဒီပမာဏတွေဟာ အာဏာမသိမ်းခင်က နိုင်ငံခြားရင်းနှီးမြှုပ်နှံမှု ဝင်ရောက်တဲ့ ပမာဏနဲ့ နှိုင်းယှဉ်ရင် တော်တော်နည်းပါတယ်။ ဥပမာအားဖြင့် ၂၀၁၈-၁၉ ဘဏ္ဍာနှစ် ပထမ ၁၀ လအတွင်းမှာ နိုင်ငံခြားရင်းနှီးမြှုပ်နှံမှု အမေရိကန်ဒေါ်လာ ၃၅၂၆ သန်း ရှိခဲ့ပါတယ်။
နိုင်ငံခြားရင်းနှီးမြှုပ်နှံမှု ကျဆင်းရတဲ့ အကြောင်းရင်းတွေကတော့ နိုင်ငံရေးမတည်ငြိမ်မှုနဲ့ လက်နက်ကိုင်ပဋိပက္ခတွေ၊ နိုင်ငံတကာ ပိတ်ဆို့အရေးယူမှုတွေ၊ မူဝါဒဆိုင်ရာ အပြောင်းအလဲတွေ၊ ပိတ်ပင် ထိန်းချုပ်မှုတွေ၊ လျှပ်စစ်မီးလို အခြေခံအဆောက်အအုံ လိုအပ်ချက်တွေကြောင့် ဖြစ်တယ်လို့ ကမ္ဘာ့ဘဏ်က သုံးသပ်ထားပါတယ်။
