စစ်ကိုင်းတိုင်း၊ ဟုမ္မလင်းမြို့နယ်က ပဲနုပ်ဆွပ်ရွာကို စစ်ကောင်စီတပ်က ဖေဖော်ဝါရီ ၂၂ ရက်မှာ ဗုံးကြဲတိုက်ခိုက်တာကြောင့် အရပ်သား ၇ ယောက် သေဆုံးတယ်လို့ ဒေသခံတွေဆီက သိရပါတယ်။
မနေ့ ညနေ ၃ နာရီဝန်းကျင်မှာ စစ်ကောင်စီတပ်က ဟုမ္မလင်းမြို့နယ်ထဲက ပဲနုပ်ဆွပ်ရွာကို လေကြောင်းကနေ ဗုံးကြဲတိုက်ခိုက်တာကြောင့် အရပ်သား ၇ ယောက် သေဆုံးခဲ့တာလို့ ဆိုပါတယ်။
ဟုမ္မလင်းမြို့က တော်လှန်ရေးရဲဘော်တယောက်က “ပဲနုပ်ဆွပ်ရွာကို ညနေ ၃ နာရီလောက်မှာ ဗုံးကြဲတာပါ။ ဂျိုင်ရိုကော်ပတာနဲ့ ကြဲတာပါ။ ထိခိုက်သေဆုံးသူတွေထဲ ကလေးတွေလည်း ပါတယ်။ အသေးစိတ်ကိုတော့ မေးထားတုန်းပဲ” လို့ပြောပါတယ်။
စစ်ကောင်စီဟာ ဂျိုင်ရိုကော်ပတာ ၂ စီး အသုံးပြု ဗုံးကြဲတိုက်ခိုက်တာဖြစ်ပြီး အရပ်သားပြည်သူ ၇ ယောက် သေဆုံးသလို ၅ ယောက် ဒဏ်ရာရရှိခဲ့တယ်လို့ သိရပါတယ်။
ဒဏ်ရာရရှိသူတွေထဲမှာလည်း စိုးရိမ်ရသူတွေပါပြီး ဆေးရုံကို ပို့ထားရတယ်လို့ သိရပါတယ်။
ဟုမ္မလင်းမြို့ကို စစ်ခေါင်းဆောင် ဖေဖော်ဝါရီ ၁၅ ရက်က ရောက်ရှိခဲ့ပြီးနောက် လေကြောင်းကနေ တိုက်ခိုက်လာတာ ဖြစ်ပါတယ်။
အဲဒီခရီးစဥ်မှာ စစ်ကောင်စီဘက်က စစ်ခေါင်းဆောင်နဲ့အတူ ရေတပ်ချုပ်၊ လေတပ်ချုပ်၊ စစ်ရေးချုပ်၊ ကစထ-၁ မှူး၊ စစ်ကိုင်းတိုင်း တိုင်းမှူးတို့ ပါလာတာ တွေ့ရပါတယ်။
