မကွေးတိုင်း၊ ငဖဲမြို့နယ်မှာ ဖေဖေါ်ဝါရီ ၁၄ ရက်က စစ်ကောင်စီလက်အောက်ခံ ပြည်သူ့စစ်တပ်ဖွဲ့ဝင် ၃ ယောက် လက်နက်ခဲယမ်းတွေနဲ့အတူ အလင်းဝင် ပူးပေါင်းလာကြတယ်လို့ ချင်းကာကွယ်ရေးတပ်-အရှို (CDF Asho) ဆီကနေ သိရပါတယ်။

CDF Asho ရဲ့ ပြန်ကြားရေးတာဝန်ရှိသူက “သူတို့ ၃ ယောက်လုံးဟာ စစ်မှုထမ်းတပ်သားအဖြစ် ပေါ်တာဆွဲခံရပြီးတော့ စစ်မှုထမ်းနေကြရသူတွေပါ။ ငဖဲမြို့နယ်ထဲမှာရှိတဲ့ ပဇီကျေးရွာနားက ၇ မိုင်ကုန်းစစ်တပ်စခန်းမှာ တာဝန်ကျနေပြီးတော့မှ အလင်းဝင်ချင်ကြလို့ ငဖဲမြို့နယ် ပကဖ ဆီကို အရင်ဦးစွာ ဆက်သွယ်လာကြတာပါ။ ငဖဲမြို့နယ် ပကဖ က သူတို့ကိုခေါ်ထုတ်ပေးဖို့ ကျနော်တို့ဆီကို တဆင့် အကူအညီတောင်းခဲ့တာကြောင့် သွားရောက်ခေါ်ထုတ်လာရတာ။ အခုလောလောဆယ်တော့ သူတို့တွေ ကျနော်တို့ဆီမှာနေနေကြပြီးတော့ သူတို့ရဲ့ မိသားစုတွေနဲ့ ဆက်သွယ်ခွင့်ပေးထားပါတယ်။ သူတို့ရဲ့တောင်းဆိုမှုတွေကြောင့် လွတ်မြောက်နယ်မြေကို ပို့ဆောင်ပေးဖို့ စီစဉ်ထားပါတယ်”လို့  ပြောပါတယ်။

အလင်းဝင်လာသူတွေဟာ တပ်သား သန့်ဇင်ဝင်း (ပစ-၁၇၇၅၇၅)၊ တပ်သား ဟိန်းထက်အောင် (ပစ-၁၇၇၇၀၁) နဲ့ တပ်သား သဲဇော်အောင် (ပစ-၁၄၄၈၃၄) တို့ဖြစ်ပြီး သူတို့နဲ့အတူ MA2 သေနတ် ၁ လက်၊ MA1 သေနတ် ၂ လက်၊ ကျည်ဘောက် ၁၀ ခု၊ ကျည်ကာအင်္ကျီ ၃ ထည်နဲ့ ကျည်ဆန်တချို့ပါ ယူလာပါတယ်။

အလင်းဝင်တပ်သား ကိုသန့်ဇင်ဝင်းက “အခုလို အလင်းဝင်ရတဲ့အကြောင်းအရင်းကတော့ဗျာ စစ်တပ်ထဲမှာ ကျနော်တို့ကို ကြီးနိုင်ငယ်ညှဉ်း လုပ်တာမျိုးတွေရှိတယ်။ ပြီးတော့ လစာလည်း အပြည့်အဝထုတ်ပေးတာ မရှိတဲ့အပြင် ကျနော်တို့လက်ထဲမှာလည်း ငွေသားကိုင်ဆောင်ခွင့် မပေးဘူး။ အစားအသောက်နဲ့ ပတ်သက်ပြီးတော့လည်း အဆင်မပြေဘူး။ အဲဒိကိစ္စတွေနဲ့ ပတ်သက်ပြီးတော့ ကျနော်တို့တွေဒီဘက်ကို ဘက်ပြောင်းလာကြတာ” လို့ ​ပြောပါတယ်။

တပ်သား သန့်ဇင်ဝင်း ပါအဝင် အခုပူးပေါင်းလာကြသူ ၃ ယောက်ဟာ စစ်ကိုင်းတိုင်းအတွင်းက အရာတော်မြို့နယ်နဲ့ မြင်းမူမြို့နယ်တွေထဲကဖြစ်ကြပြီး အလုပ်ကနေပြန်လာတဲ့အချိန် စစ်ကောင်စီတပ်ရဲ့ ပေါ်တာဆွဲဖမ်းဆီးတာခံခဲ့ကြရတာပါ။

ဒီနောက် ရှမ်းပြည်နယ်၊ ကျိုင်းတုံမြို့မှာ စစ်သင်တန်းအပါတ်စဥ် ၁၆ တက်ရောက်ခဲ့ရသလို မိုင်းပန်မြို့အခြေစိုက် စကခ ၁၇ လက်အောက်ခံ ခမရ ၅၂၀ မှာ တာဝန်ထမ်းဆောင်ခဲ့ရပြီးနောက် ငဖဲမြို့နယ်ထဲက ပဇီကျေးရွာနားမှာရှိတဲ့ ၇ မိုင်ကုန်းစစ်တပ်စခန်းကို ပို့ဆောင်ခံခဲ့ရတာလို့ သူကဆက်ပြောပါတယ်။

ငဖဲမြို့နယ်မှာရှိကြတဲ့ စစ်ကောင်စီတပ်လက်အောက်တွေမှာ အကြောင်းအမျိုးနဲ့ တာဝန်ထမ်းဆောင်နေကြရသူတွေအနေနဲ့လည်း အမြန်ဆုံးချိတ်ဆက်လာရောက်ပူးပေါင်းကြဖို့နဲ့ အလင်းဝင်ရောက်လာကြသူတွေရဲ့ အသက်အန္တရာယ်ကို လုံးဝတာဝန်ယူတယ်လို့လည်း CDF Asho ဆီကနေ သိရပါတယ်။