အီတလီနိုင်ငံ၊ နေပယ်လ်စ်မြို့ရဲ့ လူချမ်းသာနယ်မြေ ချီယာယာခရိုင်ထဲက သမိုင်းဝင် ဆန်နာဇာရို ပြဇာတ်ရုံဟာ ဖေဖော်ဝါရီ ၁၇ ရက်က မီးလောင်ကျွမ်းမှုကြီး ဖြစ်ပွားခဲ့ပြီး ရုံအတွင်းပိုင်း အလုံးစုံနီးပါး ဆိုးဆိုးရွားရွား ပျက်စီးသွားခဲ့ကြောင်း အာဏာပိုင်တွေက ပြောပါတယ်။

မီးသတ်ဌာနရဲ့ ထုတ်ပြန်ချက်အရ ဖေဖော်ဝါရီ ၁၇ ရက် အရုဏ်တက်ချိန်လောက်မှာ မီးဟာ အနီးနားရှိ တိုက်ခန်းတွဲကနေ စတင်လောင်ကျွမ်းခဲ့တာလို့ ယူဆထားပြီး ၁၉ ရာစုလက်ရာ သစ်သားပြဇာတ်ရုံဆီကို အရှိန်အဟုန်နဲ့ ကူးစက်သွားခဲ့တာ ဖြစ်ပါတယ်။

ဒီမီးလောင်မှုကြောင့် ပြဇာတ်ရုံရဲ့ အမိုးခုံးကြီး ပြိုကျပျက်စီးသွားခဲ့သလို အတွင်းပိုင်းက ခမ်းနားထည်ဝါလှတဲ့ ရွှေရောင်အနားကွပ် ပရိသတ်ထိုင်ခုံတွေနဲ့ ပွဲကြည့်စင်မြင့်တွေလည်း ပြာကျသွားခဲ့ရပါတယ်။

နေပယ်လ်စ် မီးသတ်တပ်ဖွဲ့မှူး ဂျိုဇက်ပဲ ပါဒူဝါနို ကတော့ “ပြဇာတ်ရုံရဲ့ အကြွင်းအကျန် အနည်းငယ်ပဲ ကျန်ပါတော့တယ်” လို့ သတင်းထောက်တွေကို ပြောကြားခဲ့ပါတယ်။

ဒေသခံတွေရဲ့ အဆိုအရ မနက်စောစောကတည်းက ရပ်ကွက်တဝိုက် မီးခိုးလုံးတွေ ထူထူထပ်ထပ် ဖုံးလွှမ်းနေခဲ့ပြီး အနီးအနားရှိ အဆောက်အအုံတွေက မိသားစု ၂၂ စုကို ဘေးလွတ်ရာ အရေးပေါ် ရွှေ့ပြောင်းပေးခဲ့ရပါတယ်။

မီးခိုးရှူသွင်းမိပြီး မီးခိုးမွှန်သူ ၄ ယောက်ကို ဆေးရုံတင်ပို့ခဲ့ရပေမဲ့ သေဆုံးမှုနဲ့ အပြင်းအထန် ဒဏ်ရာရရှိသူတွေတော့ မရှိပါဘူး။

နေပယ်လ်စ် မြို့တော်ဝန် ဂေတာနို မန်ဖရေဒီရဲ့ အဆိုအရ ကနဦးလက္ခဏာတွေအရ  ဒီမီးလောင်မှုဟာ မတော်တဆ စတင်လောင်ကျွမ်းခဲ့တာလို့ ယူဆရကြောင်း ပြောပါတယ်။ အသေးစိတ် အကြောင်းရင်းကိုတော့ ဆက်လက်စုံစမ်းစစ်ဆေးနေဆဲ ဖြစ်ပါတယ်။

သမိုင်းဝင် တီယာထရို ဆန်နာဇာရို ပြဇာတ်ရုံကို ၁၈၄၇ ခုနှစ်မှာ ဖွင့်လှစ်ခဲ့ပြီး အီတလီနိုင်ငံရဲ့ နာမည်ကြီး သရုပ်ဆောင်တွေနဲ့ ပြဇာတ်ရေးဆရာတွေ အများအပြားကို လက်ခံဖျော်ဖြေခဲ့ပါတယ်။

လက်ရှိမှာလည်း ဂီတဖျော်ဖြေမှုတွေနဲ့ ပြင်ပပြဇာတ်အဖွဲ့တွေရဲ့ ဖျော်ဖြေမှုတွေကို ပေါင်းစပ် စီစဉ်တင်ဆက်နေတဲ့ နေရာတခုလည်း ဖြစ်ပါတယ်။

Source: Reuters