မကွေးတိုင်း၊ နတ်မောက်မြို့နယ်မှာ ဖေ​ဖော်ဝါရီလ ၈ ရက်နေ့က တော်လှန်ရေးတပ်စခန်း ၁ ခု မီးရှို့ဖျက်ဆီးခံလိုက်ရပြီး စစ်တပ်စစ်ကြောင်းနဲ့ဖြစ်​ပွားခဲ့တဲ့တိုက်ပွဲအတွင်း စစ်သား ၁၀ ယောက်ထက်မနည်း သေဆုံးခဲ့တယ်လို့ တော်လှန်ရေးတပ်ဖွဲ့​တွေဆီကနေ သိရပါတယ်။

တိုက်ပွဲအတွင်းပါဝင်ခဲ့တဲ့ တော်လှန်ရေးရဲဘော်တယောက်က “ညောင်ဦးမြို့နယ်ထဲကနေ ချောက်မြို့နယ် ဆင်ကရွာဘက်ကို အင်အား ၁၀၀ လောက်နဲ့တက်လာတဲ့စစ်တပ်စစ်ကြောင်းက မ​ကွေးခရိုင်တပ်ရင်း ၁ ရဲ့ စခန်းတခုကိုမီးရှို့သွားတယ်။ အဲဒီနေ့ မနက် ၉ နာရီခွဲလောက်မှာ စခန်းမီးရှို့သွားတဲ့စစ်ကြောင်းကို ဗိုလ်ကုန်း​ရွာနဲ့ စန်းကန်​ရွာကြားမှာ ကြားဖြတ်တိုက်ခိုက်ခဲ့တာပါ။ တိုက်ပွဲက တနာရီအတွင်း ၂ ကြိမ်ဖြစ်ခဲ့ပြီးတော့ ရန်သူ့ဘက်က ၁၀ ယောက်ထက်မနည်းသေပြီး ဒဏ်ရာရတဲ့သူတွေများလို့ ရှေ့ဆက်မတိုးနိုင်ဘူး” လို့ ပြောပါတယ်။

အထိနာသွားတဲ့ စစ်ကောင်စီစစ်ကြောင်းဟာ ဗိုလ်ကုန်းကျေးရွာအတွင်း ဝင်ရောက်ပြီး ပြည်သူပိုင်ပစ္စည်းတွေကို ခိုးယူလုယက်သွားကြကာ ဗိုလ်ကုန်းကျေးရွာအနီးက ပြည်သူပိုင်ထန်းလျက်ချက်တဲ့ အဆောက်အအုံ ၁၀ လုံးထက်မနည်းကိုလည်း မီးရှို့ဖျက်ဆီးပြီး ညနေပိုင်းမှာ နောက်ကြောင်းပြန်လှည်သွားကြတယ်လို့လည်း သူကဆက်ပြောပါတယ်။

တိုက်ခိုက်မှုကို မကွေးခရိုင်စစ်ဌာနကွပ်ကဲမှု​အောက်က မ​ကွေးခရိုင်တပ်ရင်း ၁၊ မ​ကွေးခရိုင်တပ်ရင်း ၃၊ SR 7 မ​ကွေးတိုင်း အထူးလှုပ်ရှားတပ်ရင်း ၇၊ ဧရာ​ဒေါင်း (Local PDF) အဖွဲ့နဲ့အတူ ဒေသတွင်းတော်လှန်ရေးတပ်ဖွဲ့တွေ ပူးပေါင်းတိုက်ခိုက်ခဲ့ကြတာဖြစ်တယ်လို့ ဆိုပါတယ်။

မ​ကွေးခရိုင်တပ်ရင်း ၁ ရဲ့ တာဝန်ရှိသူတဦးက “မီးရှို့ခံလိုက်ရတာက ပင်မစခန်းမဟုတ်ပါဘူး။ ရှေ့တန်းရဲဘော်တွေဆီကို အလွယ်တကူ ထောက်ပို့လုပ်နိုင်ဖို့ဆောက်ထားတဲ့ ယာယီစခန်းဖြစ်ပါတယ်။ ပျက်စီးဆုံးရှုံးမှုပမာဏကတော့ အဆောက်အအုံ၊ ဆိုင်ကယ်တွေနဲ့ ယမ်းတွေအားလုံးအပါအဝင် သိန်း ၁၀၀ ဖိုး နီးပါးလောက်ရှိပါတယ်” လို့ DVB ကို ပြောပါတယ်။

တိုက်ပွဲအတွင်း ကျောက်ပန်းတောင်းမြို့နယ်ပြည်သူ့စစ်အဖွဲ့က တပ်ဖွဲ့ဝင် ပျူစောထီး ၁ ယောက် ကိုလည်း အရှင်ဖမ်းမိခဲ့သလို တော်လှန်ရေးရဲဘော် ၁ ယောက် ဟာလည်း လက်နက်ကြီးကျည်စ ထိမှန်ပြီး မစိုးရိမ်ရတဲ့ ထိခိုက်ဒဏ်ရာရရှိခဲ့သေးတယ်လို့ သူကဆက်ပြောပါတယ်။

မကွေးခရိုင်စစ်ဌာနအောက်မှာရှိကြတဲ့ တပ်ရင်း၊ တပ်ဖွဲ့တွေဟာ  တော်လှန်ရေးအင်အားစုတွေနဲ့ပူ းပေါင်းပြီး စစ်ဆင်ရေးတွေကိုဆောင်ရွက်နေသလို ဆက်လက်ပြီးတော့လည်း စစ်ဆင်ရေးအရှိန်ကိုမြှင့်တင်သွားမှာဖြစ်တယ်လို့လည်း သိရပါတယ်။