ဧရာဝတီတိုင်း၊ သာပေါင်းမြို့နယ်ထဲက တိုက်ပွဲတွေမှာ ကာကင်းစခန်းတွေ လက်လွှတ်ဆုံးရှုံးခဲ့ရတာနဲ့ ပတ်သက်လို့ သာပေါင်းတပ်က အရာရှိတချို့ကို စစ်ကောင်စီက စစ်ဆေးနေတယ်လို့ တပ်ရင်းနဲ့ နီးစပ်သူတွေဆီက သိရပါတယ်။

ဇန်နဝါရီ ၃၀ ရက်နဲ့ ၃၁ ရက်အတွင်း သာပေါင်းမြို့နယ်ထဲက တိုက်ပွဲတွေမှာ ကာကင်းစခန်း ၃ ခုထက်မနည်း လက်လွှတ်ခဲ့ရတဲ့ အခြေအနေနဲ့ ပတ်သက်လို့ ခလရ ၃၀၈ သာပေါင်းတပ်ရင်းမှာ စစ်ဆင်းရေးကွပ်ကဲနေတဲ့ ဗိုလ်မှူးတယောက်နဲ့ တပ်ရင်းမှူးတယောက်ကို စစ်ကောင်စီက ဖမ်းဆီးစစ်ဆေးနေတာလို့ သိရပါတယ်။

သာပေါင်းခလရ ၃၀၈ တပ်ရင်းနဲ့ နီးစပ်သူက “သာပေါင်းဘက်မှာတော့ အစည်းအဝေးတက်ဖို့ သွားတာလို့ သတင်းဖြန့်ထားတယ်။ အမှန်တော့ သာပေါင်းတိုက်ပွဲမှာ ကာကင်းစခန်းတွေ လက်လွှတ်ရပြီး နောက်ရက်ဆို ပုသိမ်က တိုင်းမှူးက စစ်ဆေးဖို့လို အပ်တာကြောင့်ဆိုပြီး ခေါ်ထားတာ။ ပုသိမ်မှာ အဖမ်းခံရထားတာ။ လက်လွှတ်ရမဲ့အခြေအနေမဟုတ်ဘဲ ဆုံးရှုံးရလို့ စစ်ဆေးခံထိတာ” လို့ ပြောပါတယ်။

အဲဒီဖြစ်စဉ်နဲ့ပတ်သက်လို့ အရာရှိ ၂ ယောက်ကို စစ်တပ်က ဖေဖော်ဝါရီ ၂ ရက်လောက်က စတင်ကာ ပုသိမ် အနောက်တောင်တိုင်းစစ်ဌာနချုပ် (နတခ) မှာ ထိန်းသိမ်းစစ်ဆေးနေတာဖြစ်ပြီး စစ်ဆေးခံနေရတာ အချိန်တပတ်လောက်အထိရှိပြီလို့ သိရပါတယ်။

အနောက်တောင်တိုင်းစစ်ဌာနချုပ် (နတခ) နဲ့ နီးစပ်သူက “ပထမ သာပေါင်းတပ်ထဲမှာပဲ စစ်ဆေးဖို့၊ တိုက်ပွဲတွေက ပြင်းထန်နေတော့ ပုသိမ်ဘက်ကို ပြောင်းစစ်ဆေးနေတာလို့ သိရတယ်” လို့ ပြောပါတယ်။

အဲဒီ သာပေါင်း ခလရ ၃၀၈ က တပ်ရင်းမှူး အပါအဝင် ကွပ်ကဲရေးအရာရှိတွေကို စစ်ကောင်စီ ဧရာဝတီတိုင်း၊ ဒု-တိုင်းမှူးက ကွင်းဆင်းကာ ကိုယ်တိုင်ဖမ်းဆီးခဲ့ပြီး ပုသိမ်မှာ တိုင်းမှူးက စစ်တာလို့ သိရပါတယ်။

လက်ရှိအခြေအနေမှာ သာပေါင်းမြို့နယ်ထဲက ရခိုင်ပြည်နယ်နဲ့ ထိစပ်နေတဲ့ ကျေးရွာတွေမှာ စစ်ကောင်စီတပ်နဲ့ အာရက္ခတပ်တော် (AA) မဟာမိတ်တပ်တွေနဲ့ ပြင်းထန်တဲ့တိုက်ပွဲတွေ ဖြစ်ပွားနေပါတယ်။