တော်လှန်ရေးအဖွဲ့တွေ ပိုပြီးစည်းလုံးညီညွတ်ကြဖို့ အမျိုးသားညီညွတ်ရေးအတိုင်ပင်ခံကောင်စီ (NUCC)က ဖေဖော်ဝါရီ ၁ ရက် ဒီနေ့ ထိုင်းနိုင်ငံမှာ သတင်းစာရှင်းလင်းပွဲကို ပြုလုပ်ခဲ့ပြီး တိုက်တွန်းလိုက်ပါတယ်။
၂၀၂၅ ခုနှစ်အတွင်း လုပ်ဆောင်ခဲ့တာတွေနဲ့ ၂၀၂၆ ခုနှစ်မှာ တော်လှန်ရေးအနိုင်တိုက်ရေး လုပ်ငန်းစဉ်တွေကို ရှင်းပြခဲ့ပြီး ထိုင်း-မြန်မာနယ်စပ် တနေရာမှာနဲ့ အွန်လိုင်းက Zoom ကနေပါ ပြုလုပ်ခဲ့တာဖြစ်ပါတယ်။
ဒီပွဲအတွင်း ဦးဆောင်ဆွေးနွေးသူတယောက်ဖြစ်တဲ့ NUCC အတိုင်ပင်ခံကောင်စီဝင် ဒေါ်နှင်းနှင်းမွှေးက ၂၀၂၆ ခုနှစ်ထဲမှာ အာဏာသိမ်းစစ်တပ် ကျောထောက်နောက်ခံအစိုးရ ပေါ်လာနိုင်ပြီး စိန်ခေါ်မှုတွေ ပိုများလာမှာဖြစ်လို့ တော်လှန်ရေးအောင်မြင်ဖို့အတွက် အဖွဲ့အစည်းတွေ ကျောချင်းကပ် ရင်ချင်းအပ်ကြပြီး ပိုမိုစည်းလုံးညီညွတ်ကြဖို့ တိုက်တွန်းပြောကြားခဲ့ပါတယ်။
အမျိုးသားညီညွတ်ရေးအတိုင်ပင်ခံကောင်စီ (NUCC) ကို ၂၀၂၁ ခုနှစ်၊ မတ် ၈ ရက်မှာ အဖွဲ့ပေါင်း ၃၃ ဖွဲ့နဲ့ ဖွဲ့စည်းခဲ့တာပါ။
လက်ရှိမှာ အမျိုးသားဒီမိုကရေစီအဖွဲ့ချုပ် (NLD)၊ Kachin Political Interim Coordination (KPICT)၊ ကရင်အမျိုးသားအစည်းအရုံး(KNU) နဲ့ ကရင်နီအမျိုးသားတိုးတက်ရေးပါတီ (KNPP) တို့ အပါအဝင် ၈ ဖွဲ့က နုတ်ထွက်ထားပေမဲ့ နောက်ထပ် အဖွဲ့ပေါင်း ၁၇ ဖွဲ့ကလည်း အဖွဲ့ဝင်အသစ်အဖြစ် လျှောက်ထားလာတယ်လို့ သတင်းစာရှင်းပွဲဦးဆောင်သူတယောက်ဖြစ်တဲ့ ခွန်မြင့်ထွန်းက ပြောပါတယ်။
သတင်းစာရှင်းလင်းပွဲကို Mizzima၊ DVB၊ KIC သံလွင်တိုင်းမ်တို့ အပါအဝင် သတင်းဌာန ၁၀ ခုလောက် တက်ရောက်တာကို တွေ့ရပါတယ်။
Photo : ဖိုးစီ (DVB)
