မကွေးတိုင်း၊ မြိုင်မြို့နယ်ထဲကို စစ်ကောင်စီတပ်က ဇန်နဝါရီ ၂၉ ရက် တရက်တည်းမှာ လေကြောင်းတိုက်ခိုက်မှု ၁၅ ကြိမ်ထက်မနည်း ပြုလုပ်ခဲ့တယ်လို့ ဒေသခံတွေနဲ့ တော်လှန်ရေးတပ်ဖွဲ့ဝင်တွေဆီကနေ သိရပါတယ်။

ဒေသခံတယောက်က “နေ့လယ် ၁ နာရီကျော်ကျော်လောက်မှာ ပါရာမော်တာ ၂ စီးနဲ့ တွင်းမ ပျူရွာမြောက်ဘက်နားကို ဗုံး ၂ ကြိမ် ကြဲသွားတယ်။ ညနေ ၅ နာရီလောက်မှာ မြိုင်အနောက်တောင်ဘက် နှင်းဆီကန်ရွာတွေဘက်ကို ဂျက်ဖိုက်တာ ၃ စီးနဲ့ ဗုံး ၁၃ လုံးလောက် ထပ်​ကြဲသွားတာပါ” လို့ ပြောပါတယ်။

မြိုင်မြို့နယ် တောင်ဘက်ခြမ်းမှာရှိတဲ့ တွင်းမ ပျူစောထီးကျေးရွာအနီးကို ဗုံးတွေ ကြဲချသွားတဲ့ ပါရာမော်တာ ၂ စီးဟာ ပခုက္ကူအခြေစိုက် တပ်မ ၁၀၁ ထဲကနေ တက်လာတာဖြစ်ပြီး နှင်းဆီကန်ကျေးရွာဘက်ကို ဗုံးတွေကြဲချသွားတဲ့ ဂျက်ဖိုက်တာ ၃ စီးဟာ တံတားဦးလေတပ်ကနေ တက်လာတာ ဖြစ်တယ်လို့ ဆိုပါတယ်။

မြိုင်အခြေစိုက် လက်နက်ကြီးတပ်ဖွဲ့ရဲ့ တာဝန်ရှိသူက “တွင်းမ ပျူရွာ​မှာ အင်အား ၂၀၀ ကျော်လောက်ပါတဲ့ စကမ စစ်ကြောင်း ရှိနေတယ်။ နယ်မြေကြိုရှင်းပေးတဲ့သဘောနဲ့ ဗုံးလာကြဲတာလို့ ​ယူဆရတယ်။ ​ရန်သူစစ်ကြောင်း ရှိနေသေးတော့ ပျက်စီးတဲ့ မြေပြင်အခြေအနေကို မသိရသေးဘူးဗျ” လို့ DVB ကို ပြောပါတယ်။

ဇန်နဝါရီ ၂၈ ရက်ကလည်း တွင်းမ ပျူစောထီးကျေးရွာ​မှာ အထိုင်ချ တပ်စွဲနေတဲ့ အဆိုပါ စစ်ကောင်စီစစ်ကြောင်းဟာ ​စစ်ဘေးရှောင်တွေရဲ့ ယာယီတဲအ​ဆောက်အအုံတွေကိုပါ မီးရှို့ဖျက်ဆီးသွားခဲ့ကြတယ်လို့ သူက ဆက်ပြောပါတယ်။

အဆိုပါ စစ်ကောင်စီစစ်ကြောင်းဟာ ပြီးခဲ့တဲ့ ဇန်နဝါရီ ၁၅ ရက်ကလည်း မြိုင်မြို့နယ်ထဲက နှောပင်ကျေးရွာကို ဝင်ရောက် မီးရှို့ဖျက်ဆီးခဲ့ကြတာကြောင့် စပါးကျီတွေနဲ့ နွားတင်းကုတ်တွေ အပါအဝင် လူနေအိမ် စုစုပေါင်း ၁၁၅ လုံး မီးလောင်ပျက်စီးခဲ့ပါသေးတယ်။