အင်ဒိုနီးရှားနိုင်ငံ၊ အနောက်ဂျာဗားပြည်နယ်၊ အနောက်ဘန်ဒေါင်းခရိုင်၊ ကျီဆာရူအာ နယ်မြေအတွင်း မြေပြိုမှုကြောင့် သေဆုံးသူဦးရေဟာ ဇန်နဝါရီ ၂၆ ရက်မှာ ၃၄ ယောက်အထိ မြင့်တက်လာခဲ့ပြီး အင်ဒိုနီးရှား ကယ်ဆယ်ရေးအဖွဲ့တွေဟာ ရွှံ့နွံထူထပ်တဲ့နေရာတွေနဲ့ အပျက်အစီးတွေအောက်မှာ ပိတ်မိနေတယ်လို့ ယူဆရသူ အများအပြားကို ရှာဖွေရေးကြိုးပမ်းမှုတွေ တိုးမြှင့်လုပ်ဆောင်နေပါတယ်‌။

အနောက်ဘန်ဒေါင်းရှိ ဘေးအန္တရာယ် စီမံခန့်ခွဲမှုအေဂျင်စီ အဆိုအရ အနောက်ဂျာဗားရဲ့ အရေးပေါ်ဝန်ဆောင်မှုတွေ၊ စစ်တပ်နဲ့ ရဲတပ်ဖွဲ့က အဖွဲ့တွေ အပါအဝင် ဘေးအန္တရာယ်ဒေသမှာ ကယ်ဆယ်ရေးဝန်ထမ်း ၃၀၀ ကျော်ကို လက်ရှိ တာဝန်ချထားပါတယ်။

ရှာဖွေရေးလုပ်ငန်းတွေကို ပံ့ပိုးပေးဖို့အတွက် အိမ်နီးချင်းပြည်နယ်တွေက ကယ်ဆယ်ရေးသမားတွေကိုလည်း ထပ်မံစေလွှတ်ထားပါတယ်။

ကယ်ဆယ်ရေးနဲ့ ရှာဖွေရေးဝန်ထမ်းတွေ အင်အားတိုးလာတာနဲ့အတူ ကယ်ဆယ်ရေးလုပ်ငန်းတွေ ကိုလည်း ပိုပြီး နက်နက်ရှိုင်းရှိုင်း လုပ်ဆောင်နိုင်မယ်လို့  မျှော်လင့်ကြောင်း အနောက်ဘန်ဒေါင်း ဘေးအန္တရာယ် စီမံခန့်ခွဲမှုအေဂျင်စီရဲ့ အကြီးအကဲ အာဆက် ဆီဟာဘူဒင်က ပြောကြားပါတယ်။

တချိန်တည်းမှာပဲ အမျိုးသားရှာဖွေကယ်ဆယ်ရေးအေဂျင်စီဟာ ယိုဂျာကာတာက အဖွဲ့တွေကို ထပ်မံစေလွှတ်ခဲ့ပြီး ဗဟိုဂျာဗားမှ ကယ်ဆယ်ရေးသမားတွေလည်း စစ်ဆင်ရေးမှာ ပါဝင်ခဲ့ကြောင်းလည်း ဆိုပါတယ်။

သေဆုံးသူတွေရဲ့ မိသားစုဝင်တွေနဲ့ ဒေသခံ စေတနာ့ဝန်ထမ်းတွေလည်း ကယ်ဆယ်ရေးနဲ့ ရှာဖွေရေး လုပ်ငန်းတွေမှာ ပူးပေါင်းပါဝင်ခဲ့ကြပြီး အာဏာပိုင်တွေကို တတ်နိုင်သမျှ ကူညီပေးနေကြပါတယ်။ ဒီဘေးအန္တရာယ်ကြောင့် အနီးနားရှိ ရပ်ရွာတွေကိုလည်း ပြင်းပြင်းထန်ထန် ထိခိုက်ခဲ့ရကြောင်း ဒေသခံ စေတနာ့ဝန်ထမ်းတွေက  ပြောပါတယ်။

စနေနေ့က မြေပြိုမှုဟာ ၂ ညဆက်တိုက် မိုးသည်းထန်စွာ ရွာသွန်းမှုကြောင့် ဖြစ်ပေါ်လာခဲ့ပြီး တောင်တန်းဒေသ ကျီဆာရူအာဒေသရှိ မတ်စောက်တဲ့ တောင်စောင်းတွေမှာ ရေတွေစိမ့်ဝင် ဖုံးလွှမ်းသွားခဲ့တာပါ။

မြေကြီး၊ ကျောက်တုံးတွေနဲ့ အမြစ်က ကျွတ်ထွက်တဲ့ သစ်ပင်တွေဟာ လူနေအိမ်တွေ၊ စိုက်ခင်းတွေနဲ့ သစ်တောမြေတွေကို ဖြတ်သန်းတိုက်ချသွားခဲ့ပါတယ်။

အောက်တိုဘာလမှ မတ်လအထိ ကြာမြင့်လေ့ရှိတဲ့ မိုးရာသီအတွင်း အင်ဒိုနီးရှားနိုင်ငံဟာ ရေကြီးရေလျှံမှုနဲ့ မြေပြိုမှုတွေကို မကြာခဏ ကြုံတွေ့ရလေ့ ရှိပါတယ်။

Source: Reuters