ရုရှားက ယူကရိန်းကို ညလုံးပေါက် ဗုံးကြဲတိုက်ခိုက်မှုကြောင့် ဆောင်းရာသီ အအေးဒဏ်အောက်မှာ ယူကရိန်းနိုင်ငံသား တသန်းကျော်အတွက် လျှပ်စစ်ဓာတ်အားပြတ်တောက်စေခဲ့ပြီးနောက်  အမေရိကန်က ကြားဝင်စေ့စပ်ပေးတဲ့ UAE  ငြိမ်းချမ်းရေးဆွေးနွေးပွဲတွေ သဘောတူညီချက်မရဘဲ ပျက်ပြယ်သွားပါတယ်။ 

ရုရှားရဲ့ လေကြောင်းတိုက်ခိုက်မှုတွေကြောင့် ယူကရိန်းနဲ့ ရုရှားတို့ကြား ပဋိပက္ခအတွက် အာရပ်စော်ဘွားများ ပြည်ထောင်စု (UAE) မြို့တော် အဘူဒါဘီမှာ ဇန်နဝါရီ ၂၄ ရက်က ကျင်းပပြီး အမေရိကန်ကြားဝင်စေ့စပ်ပေးတဲ့ ဒုတိယနေ့ဆွေးနွေးပွဲဟာ သဘောတူညီချက်မရဘဲ အဆုံးသတ်ခဲ့တာ ဖြစ်ပါတယ်။

ယူကရိန်းမြို့တော် ကိယက်ဗ်နဲ့ ဒုတိယအကြီးဆုံးမြို့ ခါကိဗ်မြို့ကို ရုရှားက ဒရုန်းတွေ ဒုံးကျည်တွေ ရာပေါင်းများစွာသုံးပြီး ဗုံးကြဲတိုက်ခိုက်ခဲ့ပါတယ်။

ဆွေးနွေးပွဲပြီးဆုံးပြီးတဲ့နောက် ထုတ်ပြန်ချက်တွေထဲမှာ ဘယ်လို သဘောတူညီချက်မှ မရခဲ့ဘူးလို့ ဖော်ပြခဲ့ပေမဲ့ ရုရှားနဲ့ ယူကရိန်း ၂ နိုင်ငံစလုံးက အနာဂတ်မှာ နောက်ထပ်ဆွေးနွေးဖို့ လမ်းဖွင့်ထားတယ်လို့ ပြောပါတယ်။၊

ဆွေးနွေးပွဲတွေရဲ့ အဓိကအာရုံစိုက်မှုဟာ စစ်ပွဲကို အဆုံးသတ်ဖို့ ဖြစ်နိုင်ခြေရှိတဲ့ ကန့်သတ်ချက်ဘောင်တွေပဲလို့ အစည်းအဝေးအပြီးမှာ ယူကရိန်း သမ္မတ ဗိုလိုဒီမာ ဇလန်းစကီးက X လူမှုကွန်ယက်ပေါ်မှာ ရေးခဲ့ပါတယ်။

ဒီရက်တွေအတွင်း ကျင်းပခဲ့တဲ့ အစည်းအဝေးတွေရဲ့ ရလဒ်အနေနဲ့ နှစ်ဖက်စလုံးက ဆွေးနွေးပွဲရဲ့ ရှုထောင့်တခုစီကို သက်ဆိုင်ရာ အစိုးရတွေဆီမှာ ပြန်အစီရင်ခံဖို့၊ ခေါင်းဆောင်တွေနဲ့ နောက်ထပ်ခြေလှမ်းတွေကို ညှိနှိုင်းဖို့ သဘောတူခဲ့ကြတယ်လို့ ဇလန်းစကီးက ပြောခဲ့ပြီး နောက်ထပ် အစည်းအဝေးတွေကို နောက်အပတ်အစောပိုင်းမှာ ကျင်းပနိုင်တယ်လို့ ဖြည့်စွက်ပြောပါတယ်။

ယူကရိန်းနဲ့ ရုရှားတို့အကြား မျက်နှာချင်းဆိုင်ထိတွေ့ဆက်ဆံမှုရှိခဲ့ပြီး ဒါဟာ ရုရှားရဲ့ အပြည့်အဝကျူးကျော်စစ်ကြောင့် ဖြစ်လာတဲ့ ၄ နှစ် နီးပါးကြာစစ်ပွဲမှာ ရှားရှားပါးပါးဖြစ်တယ်။

အမေရိကန်အစိုးရရဲ့ ငြိမ်းချမ်းရေးမူဘောင်က ထင်ရှားတဲ့ အချက်တွေကို ကိုင်တွယ်ဖြေရှင်းခဲ့တယ်လို့ ယူအေအီးအစိုးရပြောရေးဆိုခွင့်ရှိသူက ပြောပါတယ်။

ဆွေးနွေးပွဲတွေဟာ အဘူဒါဘီစံတော်ချိန် ညနေ ၅ နာရီ မတိုင်မီ ပြီးဆုံးသွားပြီလို့ ယူကရိန်း ဦးဆောင်ညှိနှိုင်းရေးမှူး ရုစတမ်အူမာရော့ဗ်ရဲ့ ပြောရေးဆိုခွင့်ရှိသူက သတင်းထောက်တွေကို ပြောပါတယ်။

Source:Reuters