ချက်သမ္မတနိုင်ငံ ရှရစ်ဘ်-စ်ကာ မြို့ရဲ့ မြို့တော်ခန်းမမှာ ဇန်နဝါရီ ၁၉ ရက် မနက်က ပစ်ခတ်မှုတခု ဖြစ်ပွားခဲ့ရာမှာ လူတယောက်သေဆုံး၊ ရဲအရာရှိ ၃ ယောက်အပါအဝင် အနည်းဆုံး ၆ ယောက် ဒဏ်ရာရရှိခဲ့ပြီး သေနတ်သမားလည်း သူ့ကိုယ်သူ အဆုံးစီရင်သွားတယ်လို့ အာဏာပိုင်တွေက ပြောပါတယ်။ 

ပရာ့ဂ်မြို့မြောက်ဘက် ၁၁၀ ကီလိုမီတာ (၇၀ မိုင်) အကွာရှိ ရှရစ်ဘ်-စ်ကာ မြို့ အဆောက်အအုံကို လုံခြုံအောင် ထိန်းသိမ်းထားနိုင်ခဲ့ကြောင်း ရဲတပ်ဖွဲ့က ပြောပါတယ်။ 

လက်ရှိအချိန်မှာ အကြမ်းဖက်မှု ဒါမှမဟုတ် အစွန်းရောက်ဝါဒဆိုင်ရာ ရည်ရွယ်ချက်ရှိကြောင်း ပြသနေတဲ့ အချက်အလက် မရှိသေးကြောင်းနဲ့ နိုင်ငံရေး၊ ဘာသာရေး အကြောင်းရင်းကြောင့် ဖြစ်ပွားခဲ့တဲ့ တိုက်ခိုက်မှုလည်း မဟုတ်ကြောင်း၊ အချက်အလက်အားလုံးအရတော့ ပုဂ္ဂိုလ်ရေးဆိုင်ရာ ဆက်ဆံရေးနဲ့ဆိုင်တဲ့ အကြောင်းရင်းကြောင့် ဖြစ်ပွားခဲ့တာလို့သာ ရှုမြင်ရကြောင်း ရဲတပ်ဖွဲ့က X ပေါ်မှာ ပြောကြားခဲ့ပါတယ်။ 

ပြည်ထဲရေးဝန်ကြီး လူဘိုမီယာ မက်နာ က “မနက်ခင်းမှာ သေနတ်သမားတယောက်က မြူနီစပယ်ရုံးကို တိုက်ခိုက်မှုကြောင့် လူ ၂ ယောက်သေဆုံးခဲ့ပါတယ်။ တယောက်က ဓားစာခံဖြစ်ပြီး နောက်တယောက်ကတော့ တိုက်ခိုက်သူပါ” လို့ ပြောကြားခဲ့ပါတယ်။ 

ဒဏ်ရာရသူ ၆ ယောက်ထဲက အရပ်သား ၃ ယောက်ဟာ ဆေးရုံတက်နေပြီး အမျိုးသမီးတယောက် ပြင်းထန်တဲ့ ဒဏ်ရာရရှိခဲ့ပါတယ်။ ကျန်ဒဏ်ရာရသူ ၃ ယောက်ဖြစ်တဲ့ ရဲအရာရှိတွေကတော့ အသက်အန္တရာယ် လွတ်ကင်းပြီး အသေးစားဒဏ်ရာလောက်သာ ရရှိခဲ့တယ်လို့ ဆိုပါတယ်။ 

ရဲအရာရှိတွေဟာ ဘာကိုမျှ စောင့်မနေဘဲ ကျူးလွန်သူကို ဖယ်ရှားဖို့ အဆောက်အအုံထဲကို ဝင်ရောက်ကာ ပြန်လည်ပစ်ခတ်ခဲ့ကြကြောင်းနဲ့ ရရှိထားတဲ့ အချက်အလက်တွေအရ တိုက်ခိုက်သူဟာ သူ့ရဲ့ ကိုယ်ပိုင် တရားမဝင်ကိုင်ဆောင်ထားတဲ့ သေနတ်တလက်ကို ကိုယ်တိုင် ခလုတ်ဆွဲရင်း အသက်ဆုံးရှုံးခဲ့တာလို့ ချက်ရဲတပ်ဖွဲ့ဥက္ကဋ္ဌ မာတင် ဗွန်ဒရာဆက်က ပြောပါတယ်။

ထိခိုက်ဒဏ်ရာရရှိသူတွေအား ကူညီပေးဖို့ စိတ်ပညာရှင်တွေကို အခင်းဖြစ်ပွားရာနေရာ စေလွှတ်ပေးခဲ့ကြောင်း ရဲတပ်ဖွဲ့က ပြောကြားခဲ့ပါတယ်။ 

Source:Reuters