တောင်အာဖရိကနိုင်ငံ၊ ဗန်ဒဲရ်ဘိုင်ယာ့လ်မြို့မှာ ဇန်နဝါရီ ၁၉ ရက်က ကျောင်းသားတွေ လိုက်ပါလာတဲ့ မီနီဘတ်စ် တစီးနဲ့ လော်ရီထရပ်ကားတစီး တိုက်မိပြီးတော့ ကျောင်းသားငယ် ၁၃ ယောက် သေဆုံးခဲ့ရတဲ့အတွက် တောင်အာဖရိကနိုင်ငံက ဝမ်းနည်းရပါကြောင်း ဒေသဆိုင်ရာ အရာရှိတွေက ထုတ်ပြန်ပါတယ်။

ဂျိုဟန်နက်စ်ဘာ့ဂ်မြို့ တောင်ဘက်ရှိ ဗန်ဒဲရ်ဘိုင်ယာ့လ် စက်မှုမြို့အနီးမှာ ယာဉ်တိုက်မှု ဖြစ်ပွားခဲ့အပြီးမှာ ဒဏ်ရာရရှိခဲ့တဲ့ တခြားကလေး ၃ ယောက်ဟာ ဆေးရုံမှာ ကုသမှု ခံယူနေရကြောင်း အရာရှိတွေက အစောပိုင်းကြေညာချက်မှာ ပြောကြားခဲ့ပါတယ်။ 

သမ္မတ စီရဲလ်ရာမာဖိုဆာက သေဆုံးသူတွေရဲ့ မိသားစုတွေ၊ ဆရာတွေနဲ့ မိတ်ဆွေတွေကို ဝမ်းနည်းကြောင်းနဲ့ ကျောင်းသားတွေကို ကာကွယ်ဖို့ “ကျွန်ုပ်တို့ တတ်နိုင်သမျှ လုပ်ဆောင်ရမယ်”လို့လည်း ကြေညာချက်မှာပြောပါတယ်။

တောင်အာဖရိကနိုင်ငံဟာ ၂၀၂၅ ခုနှစ်က လမ်းပေါ်သေဆုံးမှု ၁၁,၄၁၈ ယောက် ရှိခဲ့ပြီး အရင်နှစ်ထက် ၆ ရာခိုင်နှုန်းကျဆင်းသွားပေမဲ့ တနေ့လျှင် ပျမ်းမျှ ၃၀ ကျော်နှုန်းနဲ့  သေဆုံးနေဆဲဖြစ်ပါတယ်။

မြန်နှုန်းမြင့်မောင်းနှင်မှုနဲ့ အရက်သောက်ပြီး မောင်းနှင်မှုတို့ဟာ သေဆုံးမှုတွေရဲ့ အဓိကအကြောင်းရင်းတွေဖြစ်တယ်လို့ သယ်ယူပို့ဆောင်ရေးဝန်ကြီး ဘာဘရာခရီးစီးက ကိုးကားပြောပါတယ်။

ယာဉ်တိုက်မှုဖြစ်ပွားရာနေရာမှာ အရေးပေါ်ဝန်ဆောင်မှုအဖွဲ့တွေ ရောက်ရှိနေကြပြီး ယာဉ်တိုက်မှုရဲ့ အခြေအနေတွေကို စုံစမ်းစစ်ဆေးမှုတွေ ဆက်လက်လုပ်ဆောင်နေကြပါတယ်။ 

Source:Reuters