ပြီးခဲ့တဲ့ ဒီဇင်ဘာ ၂၈ ရက်က မြန်မာစစ်ကောင်စီဟာ သူတို့ရဲ့ မဲလိမ်မဲခိုးပွဲ အပိုင်း ၁ ကို မြို့နယ်ပေါင်း ၃၃၀ အနက် ၁၀၂ မှာ တင်းတင်းကျပ်ကျပ် ထိန်းချုပ်ပြီး ကျင်းပခဲ့ပါတယ်။ အင်အားအကြီးဆုံး ပါတီဖြစ်တဲ့ အမျိုးသားဒီမိုကရေစီအဖွဲ့ချုပ် (NLD) ကို ရွေးကောက်ပွဲ ဝင်ခွင့်ပိတ်ပင်ထားသလို တိုင်းပြည်အနှံ့မှာလည်း လေကြောင်းတိုက်ခိုက်မှုတွေ ဆက်တိုက် လုပ်ဆောင်နေဆဲဖြစ်ပါတယ်။ ဒါပေမဲ့ စိုးရိမ်စရာကောင်းတဲ့ လက္ခဏာရပ်တွေ တွေ့လာရပါတယ်။ အမေရိကန်ပြည်ထောင်စု အပါအဝင် ကမ္ဘာ့အစိုးရတချို့ဟာ စစ်အုပ်စုနဲ့ ပြန်ပြီး ထိတွေ့ဆက်ဆံဖို့ ပြင်ဆင်နေပုံရပါတယ်။ အခုအချိန်ဟာ သမ္မတထရမ့်ပ် အစိုးရအဖွဲ့အနေနဲ့ အမေရိကန်ရဲ့ မြန်မာ့အရေး မူဝါဒကို ပြောင်းလဲပစ်ရမဲ့အချိန် မဟုတ်ပါဘူး။
"ပါတီစုံဒီမိုကရေစီ အထွေထွေရွေးကောက်ပွဲများကို နှောင့်ယှက်ဟန့်တားဖျက်ဆီးခြင်းမှ ကာကွယ်ပေးရေးဥပဒေ" ဆိုတဲ့ ခေါင်းစဉ်တပ်ပြီး မဲလိမ်မဲခိုးပွဲကို ဝေဖန်သူ ပြည်သူ ၂၀၀ ကျော်ကို စစ်အုပ်စုက ဖမ်းဆီးထားပါတယ်။ စစ်အုပ်စုရဲ့ မဲလိမ်မဲခိုးပွဲကို ဝေဖန်ထားတဲ့ ဖေ့စ်ဘွတ်ခ်ပို့စ်တွေကို Like ပေးမိရင်တောင် အဖမ်းခံရနိုင်ခြေများနေပါတယ်။ တိုင်းပြည်နယ်မြေရဲ့ ထက်ဝက်တောင် မစိုးမိုးနိုင်တော့တဲ့ စစ်အုပ်စုကို သူတို့လိုချင်နေတဲ့ နိုင်ငံရေး အသိအမှတ်ပြုမှု ပေးလိုက်မယ်ဆိုရင် ဒါဟာ ဝါရှင်တန်ရဲ့ ရေရှည်အကျိုးစီးပွားကိုရော၊ မြန်မာပြည်သူတွေရဲ့ အကျိုးစီးပွားကိုပါ ထိခိုက်စေမှာဖြစ်ပါတယ်။
၂၀၂၁ ခုနှစ်မှာ လူထုရွေးကောက်ထားတဲ့ NLD အစိုးရနဲ့ ဒေါ်အောင်ဆန်းစုကြည်ကို ဖြုတ်ချပြီး အာဏာသိမ်းပြီးကတည်းက အမေရိကန်ရဲ့ မူဝါဒဟာ စစ်ကောင်စီကို သံတမန်ရေးအရ အပယ်ခံဖြစ်အောင်လုပ်တာနဲ့ စီးပွားရေး ပိတ်ဆို့မှုတွေလုပ်တာပဲ ဖြစ်ပါတယ်။ အမေရိကန်ဟာ ဗြိတိန်၊ ဥရောပသမဂ္ဂနဲ့ ကနေဒါလို မဟာမိတ်တွေနဲ့ ပူးပေါင်းပြီး စစ်ကောင်စီကို ဖိအားပေးခဲ့ပါတယ်။ ဒါပေမဲ့ အခုတော့ ထရမ့်ပ်အစိုးရအဖွဲ့က အမေရိကန်ရဲ့ မူဝါဒကို အကြီးအကျယ် ပြောင်းလဲဖို့ စဉ်းစားနေတဲ့ အရိပ်အယောင်တွေ ပြလာပါတယ်။
ပြီးခဲ့တဲ့ နိုဝင်ဘာလတုန်းက အမေရိကန် ပြည်ထဲရေးဝန်ကြီး ခရစ္စတီနိုးအမ်က အမေရိကန်မှာ ရောက်နေတဲ့ မြန်မာဒုက္ခသည် ထောင်ပေါင်းများစွာအတွက် ခွင့်ပြုထားတဲ့ ယာယီနေထိုင်ခွင့် (TPS) အစီအစဉ်ကို ရပ်ဆိုင်းတော့မယ်လို့ ကြေညာခဲ့ပါတယ်။ မြန်မာပြည်တွင်းက တကယ့်အခြေအနေတွေနဲ့ လုံးဝဆန့်ကျင်ဘက်ဖြစ်နေတဲ့ ကြေညာချက်တခုကို သူက ထုတ်ပြန်လိုက်တာဖြစ်ပါတယ်။
"မြန်မာနိုင်ငံက အခြေအနေတွေဟာ မြန်မာနိုင်ငံသားတွေ နေရပ်ပြန်ဖို့ စိတ်ချရတဲ့ အနေအထားအထိ တိုးတက်ကောင်းမွန်လာပါပြီ။ အရေးပေါ်အခြေအနေ အဆုံးသတ်တာ၊ လွတ်လပ်ပြီး တရားမျှတတဲ့ ရွေးကောက်ပွဲအတွက် စီစဉ်တာ၊ အပစ်အခတ်ရပ်စဲရေးတွေ အောင်မြင်တာ၊ ဒေသန္တရအုပ်ချုပ်ရေးတွေ တိုးတက်လာတာ အပါအဝင် အုပ်ချုပ်ရေးနဲ့ တည်ငြိမ်ရေးမှာ သိသာထင်ရှားတဲ့ တိုးတက်မှုတွေ ရှိနေပါပြီ" လို့ သူက ပြောခဲ့တာပါ။
အမေရိကန် ပြည်ထဲရေးဌာန တာဝန်ရှိသူတွေကလည်း ဝါရှင်တန်မှာရှိတဲ့ လူ့အခွင့်အရေး လှုပ်ရှားသူတွေရဲ့တွေ့ဆုံခွင့် တောင်းဆိုချက်တွေကို ပယ်ချခဲ့ပါတယ်။ လက်ရှိမူဝါဒကို ပြန်လည်သုံးသပ်နေတယ်ဆိုတဲ့ အကြောင်းပြချက်နဲ့ ဆွေးနွေးဖို့ ရှောင်လွှဲနေကြတာပါ။ ပြည်ထဲရေးဌာနရဲ့ TPS ရပ်ဆိုင်းမှုကြောင့် ထိခိုက်နစ်နာရသူတွေကတော့ လက်ပိုက် ကြည့်မနေကြပါဘူး။ AALDEF နဲ့ IRAP လို အဖွဲ့အစည်း ၂ ခုက ထရမ့်ပ်အစိုးရရဲ့ ဆုံးဖြတ်ချက်ဟာ ဥပဒေနဲ့ ညီမညီ စစ်ဆေးပေးဖို့ မြောက်ပိုင်း အီလီနွိုက်တရားရုံးမှာ ဦးတိုက်လျှောက်ထားခဲ့ကြပါပြီ။
မကြာသေးမီက ကျရောက်ခဲ့တဲ့ အပြည်ပြည်ဆိုင်ရာ လူ့အခွင့်အရေးနေ့တုန်းကလည်း ကနေဒါ၊ နော်ဝေနဲ့ ဗြိတိန်တို့လို အနောက်နိုင်ငံတွေက စစ်ကောင်စီကို အကြမ်းဖက်မှုတွေရပ်ဖို့၊ နိုင်ငံရေးအကျဉ်းသားတွေ လွှတ်ပေးဖို့ ကြေညာချက်ထုတ်ပြန်ရာမှာ အမေရိကန်က မပါဝင်ခဲ့ပါဘူး။ ဒါ့အပြင် ဇန်နဝါရီ ၁၁ ရက်ရွေးကောက်ပွဲအပိုင်း ၂ နဲ့ ဇန်နဝါရီ ၂၅ ရက် ကျင်းပမဲ့ ရွေးကောက်ပွဲ အပိုင်း ၃ တွေအပေါ်မှာလည်း ထရမ့်ပ်အစိုးရက ဘာသံမှ မထွက်ဘဲ ငြိမ်နေပါတယ်။ နိုင်ငံခြားရေးဝန်ကြီး မာကိုရူဘီအိုရဲ့ ပြောကြားချက်အရ အမေရိကန်ဟာ တခြားနိုင်ငံတွေရဲ့ ရွေးကောက်ပွဲတွေအပေါ် ဝေဖန်မှတ်ချက်ပေးမှာ မဟုတ်ဘူးလို့ ဆိုထားလို့ပါပဲ (သမ္မတထရမ့်ပ် တိုက်ရိုက်စိတ်ဝင်စားတဲ့ လက်တင်အမေရိကနဲ့ ဥရောပကလွဲရင်ပေါ့လေ)။
မြန်မာ့အရေး လေ့လာသူတွေကတော့ အမေရိကန်အစိုးရရဲ့ လက်ရှိ လုပ်ရပ်တွေကို နားမလည်နိုင် ဖြစ်နေကြပါတယ်။ ဒါဟာ ဗိုလ်ချုပ်တွေနဲ့ ပြန်ပေါင်းထုတ်ဖို့ ကျယ်ကျယ်ပြန့်ပြန့် ပြောင်းလဲလိုက်တဲ့ မဟာဗျူဟာလား၊ ဒါမှမဟုတ် တိကျတဲ့ မဟာဗျူဟာမရှိဘဲ စိတ်ကူးပေါက်ရာ လုပ်နေတဲ့ တခုချင်းစီသော ဆုံးဖြတ်ချက်တွေပဲလား ဆိုတာ ဝေခွဲမရ ဖြစ်နေကြပါတယ်။
ပြီးခဲ့တဲ့ နွေရာသီတုန်းကဆိုရင် မြန်မာ့မြေရှားသတ္တု (Rare-earth) လုပ်ငန်းမှာ အမေရိကန်က ရင်းနှီးမြှုပ်နှံဖို့ အဆိုပြုချက်တွေကို အစိုးရအဖွဲ့က ကြားနာခဲ့တယ်လို့ သတင်းထွက်ခဲ့ပါတယ်။ တရုတ်က မြန်မာ့မြေရှားသတ္တုကဏ္ဍကို လွှမ်းမိုးထားပြီး သူတို့ လိုအပ်ချက်ရဲ့ ၅၇ ရာခိုင်နှုန်းကို မြန်မာဆီကရနေတာပါ။ လောလောဆယ် ဒီအဆိုပြုချက်တွေ ရှေ့မရောက်သေးပေမဲ့ အခွင့်အရေးရရင်ရသလို ထရမ့်ပ်ရဲ့ အဖွဲ့သားတွေက စစ်ဗိုလ်ချုပ်တွေနဲ့ ထိတွေ့ဆက်ဆံလာမှာကို လေ့လာသူတွေက စိုးရိမ်နေကြပါတယ်။
ဇူလိုင်လတုန်းကလည်း ထရမ့်ပ်က စစ်ကောင်စီခေါင်းဆောင် "အဆွေတော် မင်းအောင်လှိုင်" ဆီကို စာတစောင် ပေးပို့ခဲ့ဖူးပါတယ်။ မြန်မာ့ပို့ကုန်တွေအပေါ် အခွန် ၄၀ ရာခိုင်နှုန်း ကောက်ခံမယ်လို့ အကြောင်းကြားတဲ့စာပါ။ အမေရိကန်က မြန်မာအပေါ် ကောက်တဲ့ အခွန်နှုန်းဟာ ကမ္ဘာမှာ အမြင့်ဆုံး စာရင်းဝင်ပြီး အရှေ့တောင်အာရှမှာ လာအိုနဲ့အတူ အမြင့်ဆုံး ဖြစ်နေပါတယ်။
ဒါပေမဲ့ မင်းအောင်လှိုင်ကတော့ အခွန်ကိစ္စကို ညည်းညူမနေဘဲ သမ္မတဆီကို စာပြန်ခဲ့ပါတယ်။ သမ္မတက စာပို့တဲ့အတွက် ကျေးဇူးတင်ကြောင်းနဲ့ မြန်မာဟာ ဖွံ့ဖြိုးမှုအနည်းဆုံး နိုင်ငံဖြစ်တဲ့အတွက် ပိတ်ဆို့မှုတွေကို လျှော့ပေးဖို့ တောင်းဆိုခဲ့ပါသေးတယ်။
နောက်သီတင်းပတ် နှစ်ပတ်အကြာမှာပဲ အမေရိကန် ဘဏ္ဍာရေးဌာနက မင်းအောင်လှိုင်နဲ့ နီးစပ်တဲ့ စစ်တပ်အသိုင်းအဝိုင်းက ခရိုနီလုပ်ငန်းရှင်တချို့အပေါ် ပိတ်ဆို့မှုတွေကို တိတ်တဆိတ် ရုပ်သိမ်းပေးလိုက်ပါတယ်။ ဒီကိစ္စကို နိုင်ငံရေးအရ မဟုတ်ဘဲ လုပ်ထုံးလုပ်နည်းအရ လုပ်တာပါလို့ လေ့လာသူတချို့က လျှော့ပြောကြပေမဲ့ စစ်ကောင်စီကတော့ ဒါကို နိုင်ငံတကာ အသိုက်အဝန်းက သူတို့ကို ပြန်လက်ခံဖို့ ခြေလှမ်းစပြီဆိုပြီး ဝမ်းသာအားရ ဖြစ်ခဲ့ကြပါတယ်။
၂၀၂၅ နှစ်ကုန်ပိုင်းမှာတော့ အမေရိကန် တရားရေးဌာနက "Scam Center Strike Force" ဆိုတဲ့ အဖွဲ့သစ်တခု ဖွဲ့စည်းခဲ့သလို ကွန်ဂရက်ကလည်း ဥပဒေအသစ် ပြဋ္ဌာန်းခဲ့ပါတယ်။ အာဏာသိမ်းပြီးနောက်ပိုင်း မြန်မာ၊ ကမ္ဘောဒီးယားနဲ့ ထိုင်းနယ်စပ်တွေမှာ မှိုလိုပေါက်လာတဲ့ ကျားဖြန့် (Cyber scam) လုပ်ငန်းတွေကို နှိမ်နင်းဖို့ပါ။
အမေရိကန်အစိုးရဟာ သူတို့ရဲ့ အမျိုးသားလုံခြုံရေးနဲ့ နိုင်ငံသားတွေရဲ့ အကျိုးစီးပွားကို ထိခိုက်လာပြီဆိုရင် မြန်ဆန်ထိရောက်စွာ တုံ့ပြန်နိုင်တယ် ဆိုတာကို ဒီလုပ်ရပ်က သက်သေပြနေသလိုပါပဲ။ ဘဏ္ဍာရေးဌာနရဲ့ အဆိုအရ ကျားဖြန့်လုပ်ငန်းတွေကြောင့် ၂၀၂၄ တနှစ်တည်းမှာတင် အမေရိကန်တွေ ဒေါ်လာ ၁၀ ဘီလီယံကျော် ဆုံးရှုံးခဲ့ပါသတဲ့။
မြန်မာစစ်အုပ်စုကတော့ သူတို့နယ်မြေထဲမှာ ဆယ်စုနှစ်တခုလောက် ကြီးထွားလာတဲ့ ဒီကျားဖြန့်လုပ်ငန်းတွေနဲ့ ပတ်သက်မှုမရှိကြောင်း ငြင်းဆိုထားပြီး ကရင်ပြည်နယ် အရှေ့ဘက်ခြမ်းက KK Park လို နေရာမျိုးတွေကို ဟန်ပြ နှိမ်နင်းမှုတွေ လုပ်ပြခဲ့ပါတယ်။ ဒါပေမဲ့ ဝေဖန်သူတွေကတော့ မြန်မာ၊ ကမ္ဘောဒီးယားနဲ့ ထိုင်းက အကျင့်ပျက် အရာရှိတွေ၊ အစိုးရပိုင်း တာဝန်ရှိသူတွေ ကိုယ်တိုင် အကျိုးအမြတ် ရနေသမျှကာလပတ်လုံး စစ်အုပ်စုဟာ ဒီတရားမဝင် စီးပွားရေးကို တိုက်ဖျက်ရာမှာ စိတ်ချရတဲ့ မိတ်ဖက် မဟုတ်ဘူးလို့ ထောက်ပြကြပါတယ်။
မကြာသေးမီက ထုတ်ပြန်ခဲ့တဲ့ "အမျိုးသားလုံခြုံရေး မဟာဗျူဟာ" မှာ ထရမ့်ပ်အစိုးရက အမေရိကန် အကျိုးစီးပွား ဖြစ်ထွန်းမယ်ဆိုရင် အာဏာရှင်နိုင်ငံတွေနဲ့ တွဲလုပ်ဖို့ ဝန်မလေးကြောင်း ဖော်ပြထားပါတယ်။ "အုပ်ချုပ်ပုံစနစ်နဲ့ လူ့အဖွဲ့အစည်း မတူညီတဲ့ နိုင်ငံတွေနဲ့ ဆက်ဆံရေးကောင်း တည်ဆောက်တာဟာ ကိုယ်ကျိုးစီးပွားအတွက်ဖြစ်လို့ ဒါဟာ ဟန်ဆောင်မှု မဟုတ်ပါဘူး" လို့ ဆိုထားပါတယ်။
ဒါပေမဲ့ မြန်မာစစ်ကောင်စီနဲ့ ဆက်ဆံရေးကောင်း တည်ဆောက်လို့ရမဲ့အကျိုးအမြတ် ဆိုတာ ဘာမှ မရှိပါဘူး။ ရှင်းရှင်းပြောရရင် ရလာမဲ့အကျိုးက စွန့်စားရတာနဲ့ မကာမိပါဘူး။ မြန်မာ့မြေရှားသတ္တု ကွင်းဆက်အပေါ် တရုတ်ရဲ့ ချယ်လှယ်ထားမှုကို ဝါရှင်တန်အနေနဲ့ ဘယ်လိုမှ ဖြိုခွင်းလို့ မရနိုင်သလို၊ စစ်အုပ်စုနဲ့လည်း တူညီတဲ့ အကျိုးစီးပွား ဘာမှမရှိပါဘူး။ တရုတ်၊ အိန္ဒိယနဲ့ ထိုင်းတို့ကတော့ နယ်နိမိတ်ချင်း ထိစပ်နေတဲ့အတွက် အကြောင်းအမျိုးမျိုးကြောင့် စစ်တပ်နဲ့ ဆက်ဆံရေးကို ထိန်းထားကြရတာပါ။
နယ်စပ်တည်ငြိမ်ရေး၊ စွမ်းအင်နဲ့ အခြေခံအဆောက်အအုံ ရင်းနှီးမြှုပ်နှံမှုလုံခြုံရေးအတွက် တရုတ်က စစ်အုပ်စုနဲ့ ပေါင်းတယ်။ အိန္ဒိယကလည်း နယ်စပ်က သူပုန်တွေကို နှိမ်နင်းဖို့ ပူးပေါင်းတယ်။ ထိုင်းကလည်း ရေနံနဲ့ သဘာဝဓာတ်ငွေ့ ရင်းနှီးမြှုပ်နှံမှုတွေ ရှိသလို နယ်စပ်က သူ့နိုင်ငံသားတွေ လုံခြုံရေးအတွက် စစ်ကောင်စီနဲ့ တွဲလုပ်နေကြတာ ဖြစ်ပါတယ်။
ဝါရှင်တန်ဟာ တရုတ်နဲ့ ယှဉ်ပြိုင်ရာမှာ သြဇာကျဆင်းနေတဲ့အတွက် စစ်ကောင်စီကို ပြန်ပေါင်းသင့်ပြီလို့ အချောင်သမားတွေက ပြောကောင်းပြောနိုင်ပါတယ်။ ဒါပေမဲ့ ဒါဟာ အမြော်အမြင်နည်းတဲ့ အယူအဆဖြစ်ပါတယ်။ အမေရိကန်အနေနဲ့ မြန်မာ့ဒီမိုကရေစီ တော်လှန်ရေး အင်အားစုတွေကို ကူညီထောက်ပံ့ပေးတာက ပိုအကျိုးရှိပါလိမ့်မယ်။ ဒါမှသာ စစ်အာဏာရှင်စနစ် မလွဲမသွေ ကျဆုံးသွားတဲ့အခါ တရုတ်ကို မယုံကြည်တဲ့ မြန်မာပြည်သူတွေရဲ့ ထောက်ခံမှုနဲ့ မေတ္တာကို ဝါရှင်တန်က ရရှိထားမှာ ဖြစ်ပါတယ်။
ရေရှည်မှာ ကြည့်မယ်ဆိုရင် အကျင့်ပျက်ပြီး တိုက်ပွဲတွေကြား ပိတ်မိနေတဲ့ စစ်အာဏာရှင် တွေထက်စာရင် ငြိမ်းချမ်းပြီး ဒီမိုကရေစီကျတဲ့ မြန်မာနိုင်ငံကသာ အမေရိကန်အတွက် ပိုမိုခိုင်မာတဲ့ မိတ်ဖက် ဖြစ်လာမှာပါ။ နေပြည်တော်က ဗိုလ်ချုပ်တွေနဲ့ သွားပေါင်းပြီး မူဝါဒတွေ ပြောင်းပြန်လှန်မယ့်အစား၊ ဝါရှင်တန်အနေနဲ့ မြန်မာ့ အတိုက်အခံတွေနဲ့ အရပ်ဘက်အဖွဲ့အစည်း ခေါင်းဆောင်တွေကို ပိုပြီး ထောက်ပံ့အားပေးသင့်ပါတယ်။ သူတို့ကသာ တိုင်းပြည်ရဲ့ ဒီမိုကရေစီ မျိုးဆက်သစ်ကို အုတ်မြစ်ချမယ့်သူတွေ ဖြစ်ပါတယ်။
ထရမ့်ပ်အစိုးရအနေနဲ့ မြန်မာ့ပဋိပက္ခကြောင့် ဒေသတွင်းနဲ့ ကမ္ဘာ့လုံခြုံရေးကို ထိခိုက်မှာ စိုးရိမ်ကြတဲ့ မဟာမိတ်တွေနဲ့ ပူးပေါင်းဆောင်ရွက်မှုကို ချဲ့ထွင်သင့်ပါတယ်။ ဩစတြေးလျ၊ ကနေဒါ၊ ဥရောပသမဂ္ဂနဲ့ ဗြိတိန်တို့လို သဘောထားတူ မိတ်ဖက်နိုင်ငံတွေဟာ မြန်မာပြည်သူတွေရဲ့ ဒုက္ခကို လျှော့ချပေးဖို့နဲ့ အနာဂတ်မှာ တက်လာမဲ့ ဒီမိုကရေစီခေါင်းဆောင်တွေကို အားဖြည့်ပေးဖို့ စိတ်ဆန္ဒ ရှိကြပါတယ်။
စစ်အုပ်စုရဲ့ ခါးပိုက်ဆောင် ကြံ့ခိုင်ရေးပါတီ (USDP) ဟာ အဖြေကြိုထွက်ပြီးသား ဟန်ပြရွေးကောက်ပွဲမှာ နိုင်မယ်ဆိုတာ သေချာသလောက်ပါပဲ။ ဒါပေမဲ့ ဒါဟာ တိုင်းပြည်ရဲ့ နက်ရှိုင်းတဲ့ နိုင်ငံရေးပြဿနာတွေကို ဖြေရှင်းပေးနိုင်မှာ မဟုတ်ပါဘူး။ တကယ်တမ်းကျတော့ ရွေးကောက်ပွဲကြောင့်သာ ပဋိပက္ခတွေ ပိုဆိုးလာနေပါတယ်။ စစ်အုပ်စုက ရွေးကောက်ပွဲ နောက်ဆုံးအပိုင်း မတိုင်ခင် နယ်မြေစိုးမိုးမှု ရဖို့ ကြိုးစားနေသလို၊ တော်လှန်ရေးအဖွဲ့တွေကလည်း စစ်အုပ်စုရဲ့ နိုင်ငံရေး ထိန်းချုပ်မှုကို စိန်ခေါ်နေကြတာမို့ပါပဲ။ ဝါရှင်တန်အနေနဲ့ ရေရှည်ကို မျှော်ကိုးပြီး အင်ဒို-ပစိဖိတ် ဒေသမှာ မြန်မာနိုင်ငံဟာ အမေရိကန်ရဲ့ အားထားရတဲ့ မိတ်ဖက် ဖြစ်လာနိုင်မဲ့ အခြေအနေမျိုး ရောက်အောင် အုတ်မြစ်ချထားသင့်ကြောင်း တိုက်တွန်းလိုက်ရပါတယ်။
ဟန်တာ မာစတန်
Ref: Foreign Policy
