ကချင်ပြည်နယ်၊ ဗန်းမော်မြို့ရှိ စစ်ကောင်စီတပ်စခန်းတွေကို ကချင်လွတ်မြောက်ရေးတပ်မတော် (KIA)က ဇန်နဝါရီ ၁၄ ရက် မနက်အစောပိုင်းမှာ ပြန်လည်တိုက်ခိုက်နေပြီးတော့ တိုက်ပွဲတွေ ပြင်းထန်နေတယ်လို့ ရှေ့တန်းက သတင်းရင်းမြစ်ကနေ သိရပါတယ်။
မနက်အစောပိုင်းကစတင်ပြီး ဗန်းမော်မြို့ပတ်ဝန်းကျင်က စစ်ကောင်စီတပ်စခန်းတွေကို စတင်တိုက်ခိုက်ခဲ့ပြီးတော့ တနေ့လုံး တိုက်ပွဲတွေ ပြင်းထန်နေတယ်လို့ ဗန်းမော်ရှေ့တန်းက တပ်သားတယောက်ဆီကနေ သိရပါတယ်။
“မနက် မိုးလင်းကတည်းကနေစနေတာ တနေကုန်လုံး ချနေတာ၊ ဗန်းမြို့ပေါ်ပဲ ချနေကြတာ။ ဗန်းမော်မြို့ပတ်ဝန်းကျင်က တပ်စခန်းတွေ အားလုံးကို ပြန်ချနေတယ်။”
စစ်ကောင်စီဘက်လည်း တိုက်ပွဲဖြစ်ပွားနေတဲ့ ပတ်ဝန်းကျင်ကို တရက်လုံးနီးပါး လေကြောင်းကနေ ပြင်းပြင်းထန်ထန် ခုခံတိုက်ခိုက်နေကြတယ်လို့လည်း ပြောပါတယ်။
“လေယာဉ်လည်း တနေကုန်လုံးလာနေတာပဲ၊ တနေကုန်လုံး ချနေတာ၊ Y-12က အဲဒီလောက် မလာဘူး၊ ဂျက်လေယာဉ်က ပိုများသလိုပဲ တနေကုန်နီးပါး လိုက်ချနေတယ်။”
တနေကုန်ဖြစ်တဲ့ တိုက်ပွဲအတွင်း စစ်ကောင်စီ နေရာယူထားတဲ့ တပ်စခန်းတချို့ကိုလည်း သိမ်းပိုက်ရရှိတာတွေ ရှိတယ်လို့ သိရပါတယ်။
ကချင်လွတ်မြောက်ရေးတပ်မတော်က အရာရှိတယောက်ကလည်း ဇန်နဝါရီ ၁၄ ရက်နေ့ ဗန်းမော်တိုက်ပွဲနဲ့ ပတ်သက်လို့ “ဗန်းမော် ပထရ-၉၉၃ အဝင် ခြေကုပ်စခန်း သိမ်းပိုက်ရရှိကာ ရန်သူ ၂၀ ခန့် လက်နက်ချ” ဆိုပြီး လူမှုကွန်ရက် ဖေ့စ်ဘွတ်ခ်မှာ ဝေမျှထားပါတယ်။
အမှတ်-၉၃၃ ထောက်ပံရေးနဲ့ ပို့ဆောင်ရေးတပ်ရင်းဟာ ဗန်းမော်နဲ့ မိုးမောက်ကြားက ၅ မိုင် ပတ်ဝန်းကျင်မှာ တည်ရှိတဲ့ တပ်စခန်း ဖြစ်ပါတယ်။
ဗန်းမော်မြို့သိမ်းတိုက်ပွဲကို ကချင်လွတ်မြောက်ရေးတပ်မတော်က ရပ်နားထားရာကနေ လွန်ခဲ့တဲ့ ဒီဇင်ဘာ ၂၅ မှာ ပြန်လည်စတင်ခဲ့ပြီးတော့ ဇန်နဝါရီလဆန်းပိုင်းမှာ ခဏရပ်နားကာ ၁၅ ရက်မှာ ပြန်လည်တိုက်ခိုက်နေတာ ဖြစ်ပါတယ်။
