နိုင်ဂျီးရီးယားနိုင်ငံ မြောက်ပိုင်းမှာ လုံခြုံရေးစိုးရိမ်ချက်ကြောင့် စာသင်ကျောင်းတွေကို ၂ လနီးပါးကြာ ပိတ်ထားခဲ့ရပြီးနောက်မှာ အာဏာပိုင်တွေဟာ ပြန်ပေးဆွဲအန္တရာယ် ခြိမ်းခြောက်မှုတွေကို ကာကွယ်ဖို့အတွက် ကိုယ်ထူကိုယ်ထ စောင့်ကြည့်ကြပ်မတ်ရေးအဖွဲ့တွေနဲ့ အရပ်ဘက် ကာကွယ်ရေးဝန်ထမ်းတွေကို စီစဉ်စေလွှတ်ခဲ့မှုနဲ့အတူ ဇန်နဝါရီ ၁၂ ရက်မှာတော့ ကျောင်းတွေပြန်ဖွင့်ခဲ့ပြီး ကျောင်းသားတွေလည်း စာသင်ခန်းတွေဆီ ပြန်ရောက်လာပါတယ်။

ကာဒူနာပြည်နယ်၊ ကာမင်မာရှီမြို့ရှိ အစိုးရအလယ်တန်းကျောင်းမှာ ဆရာ၊ ဆရာမတွေဟာ အညိုရောင်ဟီဂျပ်ဘ် ဝတ်ဆင်ထားကြတဲ့ ကျောင်းသားတွေ ဂိတ်တွေကတဆင့် ဝင်ရောက်လာကြတာတွေကို စောင့်ကြည့်ခဲ့ပြီး ကျောင်းဝင်းအပြင်ဘက်ရှိ လမ်းဘေးဈေးသည်တွေဟာ ကလေးတွေကို မုန့်တွေ ပြန်ရောင်းချခဲ့ပါတယ်။

မကြာသေးမီနှစ်တွေအတွင်း ကျောင်းသားကလေးတွေကို အစုလိုက်အပြုံလိုက် ပြန်ပေးဆွဲခြင်းက ထပ်ခါတလဲလဲ ခြိမ်းခြောက်မှုတခု ဖြစ်လာတဲ့ ဒေသတခုမှာ ကျောင်းတွေ ပြန်လည်ဖွင့်လှစ်တာဟာ ပုံမှန်အခြေအနေဆီ ပြန်ရောက်ရှိလာတာကို အမှတ်အသားပြုနေပြီး အာဏာပိုင်တွေဟာ ပညာရေးလက်လှမ်းမီမှုနဲ့ ဘေးကင်းရေးဆိုင်ရာ စိုးရိမ်မှုတွေကို ဟန်ချက်ညီအောင် တွန်းတွန်းတိုက်တိုက် လုပ်ဆောင်ခဲ့ကြတာလည်း ဖြစ်ပါတယ်။

ကျောင်းသူတယောက်ကတော့ သူတို့ ကျောင်းကို ပြန်သွားရတာ စိတ်ချရတယ်လို့ ခံစားရပြီး ဘာလို့လဲဆိုတော့ ဆရာ၊ ဆရာမတွေနဲ့ အိမ်မှာလည်း ကျမတို့ကို ဂရုစိုက်ပေးခဲ့တဲ့ အသက်ကြီးသူတွေ ရှိပါတယ်လို့ ပြောဆိုပါတယ်။

သူ့ရဲ့အဖေ အရပ်ဘက်ဝန်ထမ်း ဟာရုဒါ ဒန်ဂျူးမား ကလည်း ပြန်ပေးဆွဲခံရမှာကို ကြောက်ရွံ့နေရတာကြောင့် ကလေးတွေရဲ့ ပညာရေးအခွင့်အရေးကို ဆုံးရှုံးစေမှာမဟုတ်ကြောင်း ပြောပါတယ်။

ကျောင်းတွေဆီ ဦးတည်ထားတဲ့ ကားလမ်းတွေပေါ်မှာ ကာဒူနာပြည်နယ် စောင့်ကြည့်ရေးဌာနမှ ထရပ်ကားတွေကို မြင်တွေ့ခဲ့ရပြီး ကျောင်းတွေပြန်ဖွင့်ခြင်းနဲ့အတူ လုံခြုံရေးတိုးမြှင့်မှုရဲ့ တစိတ်တပိုင်းအဖြစ် အဓိကနေရာတွေမှာ အရပ်ဘက်ကာကွယ်ရေးအရာရှိတွေကို တာဝန်ချထားခဲ့ပါတယ်။

မြောက်ပိုင်းနိုင်ဂျီးရီးယားမှာ လက်နက်ကိုင်အဖွဲ့တွေရဲ့ ငွေညှစ်ဖို့ တောင်းဆိုတဲ့ ကျောင်းပြန်ပေးဆွဲမှု လှိုင်းတွေကို ကြုံတွေ့ခဲ့ရပြီး မကြာသေးမီနှစ်တွေအတွင်းမှာ ကျောင်းသားရာပေါင်းများစွာ ပြန်ပေးဆွဲခံခဲ့ရတာပါ။

တိုက်ခိုက်မှုတွေကြောင့် ပညာရေးကို အနှောင့်အယှက်ဖြစ်စေပြီး ပြည်နယ်အများအပြားမှာ ကျောင်းတွေကို ယာယီပိတ်သိမ်းခဲ့ရပါတယ်။

Source: Reuters