မန္တလေးတိုင်း၊ စဉ့်ကူးနဲ့ စစ်ကိုင်းတိုင်း ဝက်လက်နယ်အစပ်မှာရှိတဲ့ ထုံးဘိုကုန်း၊ ရှားကွဲနဲ့ ရေခမိုးရွာဝန်းကျင်နေရာတွေကို ဇန်နဝါရီ ၈ ရက်မနက်မှာ စစ်ကောင်စီတပ်က စစ်ကြောင်းထိုးပြီး လေကြောင်းကနေ ဗုံးကြဲနေတယ်လို့ ဒေသခံ ပကဖ တာဝန်ရှိသူတယောက် DVB ကို ပြောပါတယ်။

ခန့်မှန်းခြေ အင်အား ၂၀၀ နဲ့ ၂၅၀ ဝန်းကျင်လောက်ရှိတဲ့ စစ်ကောင်စီတပ်သားတွေက ထုံးဘိုကုန်းရွာမှာ တပ်စွဲနေရာကနေ ၃ မိုင်လောက်သာဝေးတဲ့ ရှားကွဲရွာဘက်ကို စစ်ကြောင်း ထိုးလာတဲ့အတွက် ရွှေဘိုခရိုင်တပ်ရင်း ၂၊ ခွဲ ၄ ဦးဆောင်တဲ့တပ်တွေက ခုခံ တိုက်ခိုက်ခဲ့တာလို့ သိရပါတယ်။

ဒေသခံ ပကဖ ရဲဘော်က “ဟိုတနေ့က လက်နက်ခဲခမ်းတွေကို လေကြောင်းက လာချသွားတာ ၂ ခေါက်။ ပြီးတော့ ၂ ရက်နားပြီး မနေ့ကနေ စပြီး တောင်ဘက်ကိုထိုးတာ။ ရှားကွဲဘက်ကိုထိုးတာ၊ အခု တော်တော်လေးထိနာလို့ Y-12 နဲ့ပတ်ချနေတာ။ ကျောင်မြောင်း ခမရ ၁၂ ကနေလည်း ဆူစိုက်ဒုန်း(အသေခံဒရုန်း) နဲ့ ချတယ်။ Y-12 က ၇ ချက်တွဲလိုက် AS (လေကြောင်းဗုံးကြဲ) လုပ်သွားပြီးဗျအခု၊ ထုံးဘိုကုန်းဘက် ပြန်ဆုတ်နေပြီ ထင်တယ် ” လို့ ပြောပါတယ်။

ဒါအပြင် စစ်တပ်က ရွှေလှေရွာဘက်က လက်နက်ကြီး ၆ ခါထက်မနည်းပစ်ကူပေးခဲ့ပြီး နောက်ဆက်တွဲ အခြေအနေတွေကိုတော့ စောင့်ကြည့်နေတုန်းပဲလို့ သူကဆက်ပြောပါတယ်။

ပြီးခဲ့တဲ့ ဒီဇင်ဘာလကတည်းက ဝက်လက်နယ်ထဲ ရောက်နေတဲ့ အဲဒီစစ်ကြောင်းဟာ အင်ဒေါင်းရွာထဲ ဝင်ရောက်အထိုင်ချထားတဲ့အချိန် ဇန်နဝါရီ ၂ ရက်က အမျိုးသမီးတချို့ကို အဓမ္မပြုကျင့်ခဲ့တယ်လို့ လည်းဆိုပါတယ်။

ဒေသခံတချို့ကို လူသားဒိုင်းအဖြစ် အသုံးပြုဖို့၊ လက်နက်ခဲယမ်း သယ်ဖို့နဲ့ လမ်းပြဖို့အတွက် ဖမ်းဆီးခဲ့ပြီး တချို့ကိုတော့ ပြန်လွှတ်ပေးတယ်လို့ သိရပါတယ်။

အဲဒီစစ်ကြောင်းကြောင့် လက်ရှိအချိန်ထိ စစ်ကိုင်းတိုင်း ဝက်လက်နယ်နဲ့ မန္တလေးတိုင်း၊ စဉ့်ကူးနယ်အကြား ဧရာဝတီမြစ်ကမ်းဘေးမှာရှိတဲ့ ရွာပေါင်း ၂၀ ဝန်းကျင်လောက်က ဒေသခံတွေ စစ်ဘေးရှောင်နေကြရကြောင်း သိရပါတယ်။