၂၀၂၅ ခုနှစ် တစ်နှစ်တာအတွင်း တော်လှန်ရေးအဖွဲ့တွေကြားနဲ့ စစ်ကောင်စီတပ်တွေကြား တိုက်ပွဲပေါင်း ၇,၁၃၉ ကြိမ်အထိ ဖြစ်ပွားခဲ့တယ်လို့ ကာကွယ်ရေးဝန်ကြီးဌာနက ဇန်နဝါရီ ၅ ရက်နေ့က ထုတ်ပြန်ပါတယ်။
ဒီတိုက်ပွဲတွေကြောင့် စစ်ကောင်စီဘက်က သေဆုံးသူ ၅,၆၉၉ ယောက်၊ ထိခိုက်ဒဏ်ရာရသူ ၂,၇၂၆ ယောက်နဲ့ သုံ့ပန်းအဖြစ် ဖမ်းဆီးရမိသူ ၁,၁၂၄ ယောက်အထိ ရှိခဲ့ပြီး စုစုပေါင်း အင်အားပြုန်းတီးမှုက ၉,၅၀၀ ကျော်အထိ ရောက်ရှိခဲ့တယ်လို့ ဆိုပါတယ်။
ဒေသအလိုက်ကြည့်ရင် အညာဒေသနဲ့ စစ်တောင်းမြစ်ဝှမ်းဒေသတွေမှာ ပြည်သူ့ကာကွယ်ရေးတပ်မတော်နဲ့ ပြည်သူ့ကာကွယ်ရေးအဖွဲ့တွေက ဆင်နွှဲခဲ့တဲ့ တိုက်ပွဲပေါင်း ၂,၉၈၄ ကြိမ်အထိ ရှိခဲ့တယ်လို့ သိရပါတယ်။
တိုက်ပွဲအမျိုးအစားအရတော့ ရင်ဆိုင်တိုက်ပွဲ၊ စခန်းသိမ်းတိုက်ပွဲနဲ့ ရန်သူ့စစ်ကြောင်းတွေကို ကြားဖြတ်တိုက်ခိုက်ခဲ့တဲ့ တိုက်ပွဲကြီးတွေ ၁,၃၈၆ ကြိမ်ရှိခဲ့သလို ပြောက်ကျားပစ်ခတ်တာနဲ့ မိုင်းဆွဲတိုက်ခိုက်တာလို တိုက်ပွဲငယ်တွေကိုလည်း ၈၀၀ ကြိမ်ကျော် ဆင်နွှဲနိုင်ခဲ့တယ်လို့ ဆိုပါတယ်။
ဒါ့အပြင် စစ်တပ်စခန်းတွေနဲ့ စစ်ကြောင်းတွေကို ဒရုန်းတွေ သီးသန့် အသုံးပြုပြီး တိုက်ခိုက်ခဲ့တဲ့ အကြိမ်ရေကလည်း ၇၀၀ ကျော်ရှိခဲ့တယ်လို့ ကာကွယ်ရေးဝန်ကြီးဌာနက ပြောကြားထားပါတယ်။
