လွတ်လပ်ရေးနေ့မှာ ရန်ကုန်မြို့အတွင်း အိမ်နဲ့ဆိုင်ခန်းတွေကို အလံထောင်ဖို့ စစ်ကောင်စီရဲ့ အုပ်ချုပ်ရေးအဖွဲ့တွေက ညွှန်ကြားထားပေမဲ့ မထောင်ကြသူ များတယ်လို့ မြို့ခံပြည်သူတွေဆီက သိရပါတယ်။
နေအိမ်၊ တိုက်ခန်းနဲ့ ဆိုင်ခန်းတွေ၊ ကားတွေ အားလုံး လွတ်လပ်ရေးနေ့ကို ကြိုဆိုဂုဏ်ပြုတဲ့အနေနဲ့ အလံထောင်ရမယ်ဆိုပြီး ဇန်နဝါရီ ၄ ရက်နေ့ မတိုင်ခင် ရက်ပိုင်းအလိုကတည်းက ညွှန်ကြားထားတာပါ။
စစ်ကောင်စီက အဲဒီလို ညွှန်ကြားထားပေမဲ့ ရန်ကုန်မြို့က ရပ်ကွက်၊ လမ်းအများစုမှာ အလံထောင်တဲ့အိမ်၊ တိုက်ခန်း နည်းနည်းလောက်ပဲရှိတာကို တွေ့ရပါတယ်။
စစ်ကောင်စီထောက်ခံသူတွေနဲ့ အရေးယူ ပြဿနာရှာခံရမှာ ကြောက်တဲ့သူ တချို့လောက်ပဲ အလံထောင်ထားကြတယ်လို့ မြို့ခံပြည်သူတွေက ပြောပါတယ်။
သင်္ဃန်းကျွန်းမြို့နယ်မှာ နေသူတယောက်က “ကိုယ့်ဆန္ဒနဲ့ကိုယ် အလံထောင် သူရှားတယ်။ ဒလန် ပေါတဲ့ရပ်ကွက်၊ စစ်တပ်အလိုကျ တသဝေမတိမ်း လိုက်နာတဲ့ အုပ်ချုပ်ရေးမှူးရှိတဲ့ ရပ်ကွက်မှာဆို အလံထောင်တဲ့သူနည်းနည်း ပိုတွေ့ရတယ်။ ဒါကလည်း ကြောက်စိတ်နဲ့ထောင်တာ။ အိမ်မှာတော့ လိုလိုမယ်မယ် အလံဆောင်ထားတယ်။ တခုခု ပြဿနာရှာလာရင် အထောင်ပြဖို့အတွက် ဆောင်တာ” လို့ ပြောပါတယ်။
လိုင်းကားတွေ၊ ဆိုက်ကားနဲ့ ဘေးတွဲဆိုင်ကယ် အများစုကတော့ လမ်းမှာ အဖမ်းဆီးခံရမှာစိုးလို့ အလံထောင်ထားကြတာကိုလည်း တွေ့ရပါတယ်။
စစ်ကောင်စီက အခုနှစ်မှာမှ အိမ်တိုင်း အလံထောင်ဖို့ ညွှန်ကြားတာဖြစ်ပြီး ပြည်သူအများစုက ဆန့်ကျင်ထားကြတာ ဖြစ်ပါတယ်။
ပြည်သူအများဟာ အခုလို စစ်ကောင်စီက ခိုင်းတာကိုတော့ ဆန့်ကျင်ပေမဲ့ ဒီမိုကရေစီအင်အားစုတွေက လှုံ့ဆော်တဲ့ အသံတိတ်သပိတ်လို လှုပ်ရှားမှုတွေမှာတော့ လိုက်ပါဆောင်ရွက်ကြတာ တွေ့ရပါတယ်။
