စစ်ကိုင်းတိုင်း၊ ကသာမြို့ကို တော်လှန်ရေးတပ်တွေ ဝင်တိုက်တာကြောင့် စစ်ကောင်စီတပ်က မြို့ဝင် မြို့ထွက်ကို ဒီဇင်ဘာ ၂၉ ရက်က စတင်ပိတ်လိုက်တာကြောင့် ဒေသခံတွေ အပြင်မထွက်နိုင် ဖြစ်နေတယ်လို့ သိရပါတယ်။

ဒီဇင်ဘာ ၂၇ ရက် မနက်ပိုင်းကစလို့ အပြန်အလှန်ပစ်ခတ်သံတွေ စတင်ပြီးနောက် ဒီဇင်ဘာ ၂၉ ရက်အထိ မြို့ပတ်ဝန်းကျင်မှာ တိုက်ပွဲတွေဖြစ်နေကာ ဒေသခံတွေ မြို့ပြင်ထွက် တိမ်းရှောင်ကြပေမဲ့ စစ်ကောင်စီက ပြန်လှည့်ခိုင်းခဲ့တယ်လို့ ဆိုပါတယ်။

ဒေသခံတယောက်က “ဒီဇင်ဘာ ၂၇ ရက်မှာ မြို့ပတ်လည်မှာ ဖြစ်နေပါတယ်။ လက်နက်ကြီးသံရော၊ အသေးသံတွေပါ ကြားနေရပါတယ်။ မြို့အနေအထားလည်း တိတ်ဆိတ် ခြောက်ကပ်နေပါတယ်။ မနားပါဘူး၊ အသံတွေက မြို့ပတ်လည်မှာ ကြားရပါတယ်” လို့ ပြောပါတယ်။

ဒီဇင်ဘာ ၂၈ ရက် ရွေးကောက်ပွဲကျင်းပနေချိန်မှာလည်း ကသာမြို့ထွက်က အပြန်အလှန် ပစ်ခတ် ထိတွေ့တိုက်ပွဲ ဖြစ်နေပြီး ခမရ ၃၀၉ စစ်တပ်ကနေ မြို့ပြင်ကို လှမ်းပစ်တာတွေ၊ မြို့တွင်းမှာလည်း လက်နက်ရိက္ခာတွေနဲ့ ကသာမြို့ထွက်ကို စစ်ကြောင်းထိုးဖို့ စစ်သား‌တွေ စီတန်း ထွက်ခွာတာကို မြင်တွေ့ရတယ်လို့ ဆိုပါတယ်။

ဒေသခံတယောက်က “မဲသာသွားပေးလိုက်ရတာ တမနက်လုံး၊ တညလုံး ပွက်လောရိုက်နေတာ။ လက်နက်ကြီးသံတွေ၊ အသေးသံတွေ ကြားထဲကပဲ။ ဒီလိုအနေအထားမျိုးနဲ့ မဲပေးရတာကတော့ ထူးခြားအံ့ဘွယ်ပါပဲ။ ဘယ်အချိန် ကိုယ့်‌ခေါင်းပေါ် ကျလာမလဲ သည်းထိတ်ရင်ဖိုနဲ့၊ မဲရုံ‌ရှေ့ကနေလည်း စစ်သားတွေက တန်းစီပြီး စစ်ကြောင်းထိုးဖို့ မြို့ပြင်ကို သွားနေကြ၊ မဲပေးမယ့်သူတွေက တန်းစီနေကြတဲ့ မြင်ကွင်း၊ ဒီလိုမျိုး ဘယ်နိုင်ငံမှာများ ရှိလဲနော်” လို့ ပြောပါတယ်။

ဒါ့အပြင် ညနေ ၄ နာရီခွဲမှာ ဂျက်ဖိုက်တာတစီး မြို့ပေါ်ကို အချိန်ကြာစွာ ပျံဝဲနေကာ မြို့ထွက်နေရာကို ဗုံး ၂ လုံး ပစ်ချသွားခဲ့တယ်လို့ ဆိုပါတယ်။

ညနေပိုင်းမှာတော့ ကသာမြို့အထွက်နဲ့ နီးတဲ့ ရပ်ကွက်တချို့က ပြည်သူတွေ စတင်တိမ်းရှောင်ကြပြီး မြို့ပေါ်ရပ်ကွက်တွေရှိ နီးစပ်ရာ အသိမိတ်ဆွေ၊ ဆွေမျိုးသားချင်းတွေဆီကို သွားရောက်နေထိုင်နေကြရပါတယ်။

“ကျမတို့တွေနေတာက မြို့ထွက်မှာ၊ မြို့ပတ်လည်မှာက အသံက ပေါင်းစုံနေပြီ၊ မြို့ပြင်ထွက်လို့ လုံးဝမရတော့ဘူး။ ရပ်ကွက် ၉ ပတ္တမြားရပ်ကွက်မှာ လူထိခိုက်တာရှိတယ်၊ အမျိုးသမီးတဦး ခြေထောက် ယမ်းစမှန်တယ်၊ အမျိုးသားတဦး ဆီးခုံနားထိတယ် သိထားရတော့ တိုက်ပွဲနဲ့နီးတဲ့ နေရာမျိုးကနေ ရှောင်ကြရတာ။”

ဒီဇင်ဘာ ၂၉ ရက် မနက်ပိုင်းမှာတော့ ကသာမြို့ ထွက်ပေါက်တွေ လုံးဝပိတ်နေပြီလို့ သိရပြီး အထုပ်အပိုးပြင်ဆင်ကာ ကား၊ ဆိုင်ကယ်၊ သုံးဘီးတွေနဲ့ ထွက်ခွာကြပေမဲ့ စစ်တပ်ပိတ်ထားလို့ မြို့ခံတွေလည်း ကသာမြို့အထွက် တုန်ပေါရွာအနီးကနေ ပြန်လှည့်ခဲ့ကြရတယ်လို့ သိရပါတယ်။

“စစ်ရေးအနေအထားက ဒီဘက်က မြို့ထဲရှိတဲ့ စစ်တပ်က မြို့ပြင်ဖြစ်တဲ့ ကျေးရွာတွေဘက်ကို စစ်ကြောင်းထိုးတယ်။ ဟိုဘက်က PDF တွေက အတိုးမခံဘူး။ အဲတော့ မြို့ပတ်လည်မှာ အသံတွေ မစဲဘူး။ ခမရ ၃၀၉ ကလည်း လက်နက်ကြီး ပစ်တယ်။ ကသာမြို့အထွက် ပတ္တမြားရပ်ကွက်ကလည်း ပစ်နေတယ်။ ဇေယျာချောင်ရပ်ကွက် ၅ အရှေ့ကုန်းမှာလည်း စစ်တပ်က ပစ်နေတယ်။‌ အထက ၂ ကျောင်းဘောလုံးကွင်းထဲလည်း ရဲတွေ ပစ်တယ်။ စေတီကုန်း၊ မိဿလင်း၊‌ ရပ်ကွက် ၈ ရွှေကုက္ကိုသစ်ပင်နားကနေ စစ်တပ်က ပစ်နေတယ်။ ကသာမြို့ အောက်ဘက်ရပ်ကွက် ၁၀ သဖန်းကိုင်းမှာလည်း စစ်သားတွေ နေရာယူထားပြီး ပစ်တယ်။ ခမရ ၃၀၉ အနောက်၊ သာယာကုန်း(ကချင်စု)မှာလည်း စစ်တပ် ရှိတယ်။ တခါတခါ ဧရာဝတီမြစ် အရှေ့ဘက်ကမ်းကို အကျဉ်းထောင်ကနေ လှမ်းပစ်တယ်။”

ပစ်ခတ်မှုတွေကြောင့် ကသာမြို့ပေါ်က ဈေးဆိုင်တွေ ပိတ်ထားကြပြီး၊ တိတ်ဆိတ်ခြောက်ကပ်နေကာ ရွေးကောက်ပွဲရလဒ်ကိုလည်း ဘယ်သူမှ စိတ်ဝင်တစားမရှိကြဘူးလို့ ဆိုပါတယ်။

ဒီနေ့ နောက်ဆုံးရသတင်းအရ ရပ်ကွက် ၇ ကြံတောရပ်ကွက်မှာ အိမ် ၂ လုံး မီးလောင်နေသလို အမျိုးသားတယောက် ဒရုန်းဗုံးကျလို့ သေဆုံးတယ်လို့ သိရပါတယ်။

ကသာမြို့ပေါ်ကို Y12 ပျံဝဲနေသလို မြို့ပြင်ကို ဗုံးကြဲတိုက်ခိုက်တာတွေ ရှိနေတယ်လို့ သိရပါတယ်။

ကသာမြို့နယ်မှာ စစ်ကောင်စီက ရွေးကောက်ပွဲမပြုလုပ်ခင် ဒီဇင်ဘာ ၄ ရက်ကစပြီး ဒီနေ့အထိ နေ့စဉ်ဆိုသလို လက်နက်ကြီး၊ လေယာဉ်နဲ့ ဗုံးကြဲပစ်ခတ်နေတာလို့ ဒေသခံတွေက ပြောပါတယ်။