မကွေးတိုင်းထဲက ၆ မြို့နယ်မှာရှိတဲ့ စစ်စခန်းတွေကို တိုက်ခိုက်နေပြီး အခုအခါ စလင်းမြို့နဲ့ ဆင်ဖြူကျွန်းမြို့တို့ကို တော်လှန်ရေးအင်အားစုတွေက ဝန်းရံပိတ်ဆို့ထားတယ်လို့ အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနက ဒီဇင်ဘာ ၂၈ ရက် ညပိုင်းမှာ ထုတ်ပြန်ပါတယ်။

မကွေးတိုင်း စစ်ရေးအခြေအနေကို သတင်းထုတ်ပြန်တာဖြစ်ပြီး မကွေးတိုင်းက စလင်းမြို့နယ်နဲ့ ပွင့်ဖြူမြို့နယ် အပါအဝင်  မြို့နယ် ၆ မြို့နယ်က စစ်စခန်းတွေကို ဒီဇင်ဘာ ၂၃ ရက်မနက် ကစလို့ မကွေးတိုင်းစစ်ဌာနရဲ့ ဦးစီးကွပ်ကဲမှုနဲ့ စတင်ထိုးစစ်ဆင်တိုက်ခိုက်ခဲ့တာလို့ ဆိုပါတယ်။

ထိုးစစ်အတွင်း အဲဒီမြို့နယ်တွေမှာရှိတဲ့ စစ်ကောင်စီရဲ့ အုပ်ချုပ်ရေးနဲ့ စစ်ရေးကဏ္ဍဆိုင်ရာ အခြေခံအဆောက်အအုံတွေကို မီးရှို့ဖျက်ဆီးခဲ့တယ်လို့ ဆိုပါတယ်။

ဒီဇင်ဘာ ၂၅ ရက် ည ၇ နာရီလောက်မှာ စလင်းမြို့ကနေ ဆင်ဖြူကျွန်းမြို့ဆီကို ဦးတည်လာတဲ့ အင်အား ၁၇၀ လောက်ပါတဲ့ စစ်ကူစစ်ကြောင်းကို တော်လှန်ရေးတပ်တွေက ကြားဖြတ်တိုက်ရာမှာ စစ်ကြောင်းမှာပါတဲ့ လက်နက်ခဲယမ်းနဲ့ ဒရုန်းတွေတင်ဆောင်လာတဲ့ ကား ၅ စီးလုံး နေရာမှာပေါက်ကွဲပျက်စီးပြီး စစ်ကောင်စီဘက်က အထိအခိုက် အကျအဆုံးအများကြီးနဲ့ ထွက်ပြေးသွားတယ်လို့ ထုတ်ပြန်ပါတယ်။

ပြီးတော့ လေယာဉ်ဗုံးတွေထုတ်လုပ်တဲ့ ဆိပ်ဖြူမြို့နယ်ထဲက ကပစ ၂၁၊ ကပစ ၂၂၊ လက်နက်ကြီး ကျည်ဆန်တွေထုတ်လုပ်တဲ့ ပေါက်မြို့နယ်က ကပစ ၂၄ တို့ကို သွယ်တန်းထားတဲ့ မဟာဓာတ်အားလိုင်းတိုင်ပေါင်း ၁၀၀ ကျော်ကို တပြိုင်နက်တည်း မိုင်းခွဲတိုက်ခိုက်ခဲ့တယ်လို့လည်း ဆိုပါတယ်။