စစ်တပ်ရဲ့ အတုအယောင်ရွေးကောက်ပွဲမှာ ဝင်ရောက်ယှဉ်ပြိုင်ကာ အားပေးကူညီနေပြီး ပြည်သူ့ဆန္ဒတွေကို ဆန့်ကျင်သူတွေကို အမျိုးသားဒီမိုကရေစီအဖွဲ့ချုပ်ပါတီ (NLD) ရဲ့ ဆုံးဖြတ်ချက်တွေ၊ စည်းမျဥ်းစည်းကမ်းတွေကို လိုက်နာတာမရှိသူအဖြစ် သတ်မှတ်ပြီး ပါတီဝင် ၉ ယောက်ကို ပါတီဝင်အဖြစ်ကနေ ထပ်မံထုတ်ပယ်လိုက်တယ်လို့ ဒီကနေ့ ဒီဇင်ဘာ ၂၈ ရက်မှာ NLD က ထုတ်ပြန်ပါတယ်။

ပါတီဝင်အဖြစ်က ထုတ်ပယ်ခံရသူတွေမှာ ရပ်စောက်မြို့နယ် မြို့နယ်အလုပ်အမှုဆောင်အဖွဲ့ ရှမ်းပြည်နယ်ရဲ့ အဖွဲ့ဝင် ဒေါ်ခင်ညို၊ လင်းခေးမြို့နယ် ပါတီဝင် စိုင်းဆေဟန်၊ ဧရာဝတီတိုင်း ရေကြည်မြို့နယ် မြို့နယ်အလုပ်အမှုဆောင်အဖွဲ့ ဥက္ကဋ္ဌ ဦးဇော်မင်း၊ မြောင်းမြမြို့နယ် မြို့နယ်အလုပ်အမှုဆောင်အဖွဲ့ အဖွဲ့ဝင် ဦးသန့်ဇော်ဝင်း၊ မအူပင်မြို့နယ် ပါတီဝင် ဒေါ်ခင်မျိုးသက်၊ ရန်ကုန်တိုင်း လသာမြို့နယ် ပါတီဝင် ဦးဝင်းမြင့်သန်း၊ ဒဂုံမြို့သစ် တောင်ပိုင်းမြို့နယ် မြို့နယ်အလုပ်အမှုဆောင်အဖွဲ့ ဥက္ကဋ္ဌ ဦးနေဝင်းထွန်း၊ အဖွဲ့ဝင် ဦးသူရအောင်နဲ့ ရှမ်းတဲကြီးရပ်ကွက် အလုပ်အမှုဆောင်အဖွဲ့ ဥက္ကဋ္ဌ ဦးမြင့်ဦး တို့ပဲ ဖြစ်ပါတယ်။

အာဏာသိမ်းစစ်ကောင်စီရဲ့ နိုင်ငံရေးတရားဝင်မှု ရရှိစေဖို့ ရည်ရွယ်ပြီး အတုအယောင် ရွေးကောက်ပွဲ ကျင်းပဖို့ ကြံစည်အားထုတ်နေမှုကို NLD အဖွဲ့ရဲ့ ကြားကာလ ဗဟိုကော်မတီ အစည်းအဝေးတွေမှာ အသိအမှတ်မပြုဖို့နဲ့ ပူးပေါင်းဆောင်ရွက်ခြင်းမပြုဖို့ ထုတ်ပြန်တားမြစ်ထားပြီး ဖြစ်တာကို မျက်ကွယ်ပြုတဲ့အတွက် ခုလိုထုတ်ပယ်ရတာပါလို့ ဆိုပါတယ်။

ဒါ့အပြင် အမှတ်စဉ် ၃ ပါ ပဲခူးတိုင်း ဒိုက်ဦးမြို့နယ် အလုပ်အမှုဆောင်အဖွဲ့ဝင် ဦးသန်းထိုက်အောင်ကို ပါတီဝင်အဖြစ် ထုတ်ပယ်တာကို ပယ်ဖျက်ပြီး အမှတ်စဥ် ၄ ပါ ဒိုက်ဦးမြို့နယ် အလုပ်အမှုဆောင်အဖွဲ့ဝင် ဦးအေးလွင်၊ အမှတ်စဥ် ၇ ပါ ဒဂုံဆိပ်ကမ်းမြို့နယ် တွဲဖက်အတွင်းရေးမှူးဟောင်း ၈၇ ရပ်/ကျေး အလုပ်အမှုဆောင်အဖွဲ့ ဦးအောင်မိုးနဲ့ အမှတ်စဥ် ၁၂ ပါ အဖွဲ့ဝင် ၈၇ ရပ်/ကျေး အမျိုးသမီးလုပ်ငန်းအဖွဲ့ ဒေါ်တင်အေး တို့ကို ပြင်ဆင်ဖော်ပြထားတယ်လို့ ထုတ်ပြန်ချက်မှာ ပါရှိပါတယ်။

ပြီးခဲ့တဲ့ ၂၀၂၀ ရွေးကောက်ပွဲမှာ အမျိုးသားဒီမိုကရေစီအဖွဲ့ချုပ် (NLD) က မဲဆန္ဒနယ်အားလုံးရဲ့ ၈၂ ဒသမ ၃၆ ရာခိုင်နှုန်း အနိုင်ရရှိပြီး လွှတ်တော်ကိုယ်စားလှယ် အယောက် ၉၂၀ ရွေးချယ်တင်မြှောက်ခံခဲ့ရပါတယ်။

ကေခိုင်