စစ်ကိုင်းတိုင်း၊ စစ်ကိုင်းမြို့နယ်မှာ ဒီဇင်ဘာ ၂၇ ရက် နေ့လယ်ပိုင်းက စစ်ကောင်စီတပ်က ဒရုန်းနဲ့ ဗုံးကြဲလို့ ဒေသခံပြည်သူ ၃ ယောက် သေဆုံးကာ ဒဏ်ရာရသူတွေလည်း ရှိခဲ့သလို လူနေအိမ်တချို့လည်း ထိခိုက်ပျက်စီးခဲ့တယ်လို့ ဒေသခံတွေဆီကနေ သိရပါတယ်။

Wetlet Informational Network ရဲ့ တာဝန်ရှိသူ ကိုနဂါးလေးက “စစ်ကိုင်းမြို့ရဲ့မြောက်ဘက် ၂ မိုင်ခွဲလောက်ဝေးပြီးတော့ စစ်ကိုင်း-မုံရွာ ကားလမ်းနဲ့ အရမ်းကြီးမဝေးလှတဲ့ တအိမ်တည်းရွာထဲက လက်ဖက်ရည်ဆိုင်ပေါ်ကို ဒရုန်းနဲ့ ဗုံး ၃ လုံး ကြဲသွားလို့ အမျိုးသား ၂ ယောက်နဲ့ အမျိုးသမီးတယောက်တို့ သေဆုံးသွားပါတယ်။ ဒဏ်ရာရသူတွေကလည်း ၂ ယောက် ၃ ယောက်လောက် ရှိပါတယ်။ ရွာထဲက လက်ဖက်ရည်ဆိုင်ပေါ်ကို တည့်တည့်ကျလို့ အဲဒီလက်ဖက်ရည်ဆိုင်လည်း ပျက်စီးသွားသလို ဘေးအိမ်တွေလည်း ပျက်စီးသွားပါတယ်” လို့ ပြောပါတယ်။

စစ်ကောင်စီတပ်က ဒရုန်းနဲ့ဗုံးကြဲလို့ သေဆုံးသွားကြသူတွေဟာ အဆိုပါ တအိမ်တည်း​ကျေးရွာမှာ နေထိုင်ကြတဲ့ အသက် ၆၅ နှစ်အရွယ် ဦးလှဆောင်၊ အသက် ၄၂ နှစ်အရွယ် ကိုစိုးသူနဲ့ အသက် ၃၀ အရွယ် အမျိုးသမီးတယောက်တို့ ဖြစ်ကြပြီး ဒဏ်ရာရသူတွေထဲမှာလည်း စိုးရိမ်ရသူတွေ ပါဝင်တယ်လို့ ဆိုပါတယ်။

စစ်ကိုင်းမြို့အခြေစိုက် တော်လှန်ရေးတပ်ဖွဲ့ဝင်တယောက်က “တအိမ်တည်း​ရွာမှာ တိုက်ပွဲဖြစ်နေတာ မရှိဘဲနဲ့ ပြည်သူကို ပစ်မှတ်ထားပြီးတော့ စစ်တပ်ဘက်က ဗုံးကြဲသွားတဲ့ ဒရုန်းဟာ ပန်ကာ ၆ လက်နဲ့ ဒရုန်းအကြီးစား ဖြစ်ပါတယ်။ စစ်ကိုင်းမြို့ပေါ်မှာရှိတဲ့ ရဲတပ်ရင်း ၁၆ ထဲကနေ လွှတ်တင်လိုက်တာလို့ သိရပါတယ်” လို့ DVB ကို ပြောပါတယ်။

အဆိုပါ တအိမ်တည်းကျေးရွာဟာ စစ်ကောင်စီတပ်ကပြုလုပ်မဲ့ အတုအယောင် ရွေးကောက်ပွဲ မကျင်းပဖြစ်တဲ့ ကျေးရွာတရွာ ဖြစ်တယ်လို့လည်း သူက ဆက်ပြောပါတယ်။

စစ်ကိုင်းမြို့နယ်ထဲမှာ ရပ်ကွက်/ကျေးရွာအုပ်စု ၁၁၀ ရှိတဲ့အနက် ရပ်ကွက်/ကျေးရွာအုပ်စု ၃၀ နီးပါးမှာသာ ရွေးကောက်ပွဲ ကျင်းပနိုင်မယ်လို့ စစ်ကောင်စီလက်အောက်ခံ ​ပြည်ထောင်စုရွေးကောက်ပွဲကော်မရှင်က ကြေညာထားပါတယ်။

ပြီးခဲ့တဲ့ ၂၀၂၄ ခုနှစ်၊ နိုဝင်ဘာ ၁၃ ရက် ညနေပိုင်းမှာလည်း အဆိုပါ တအိမ်တည်းကျေးရွာထဲကို စစ်ကောင်စီတပ်က လက်နက်ကြီးနဲ့ ပစ်ခတ်ခဲ့လို့ အသက် ၁၄ နှစ်အရွယ် မောင်ဝေလျှံထက် သေဆုံးခဲ့ကာ ဒေသခံ ၄ ယောက်ထက်မနည်း ဒဏ်ရာရရှိခဲ့ပါတယ်။