မြန်မာနိုင်ငံမှာ လူနည်းစုဘာသာရေး ဖိနှိပ်ခံရမှုတွေနဲ့ ပတ်သက်ပြီးတော့ UK ပါလီမန် လွှတ်တော်ထဲမှာ လာမယ့် ဇန်နဝါရီ ၈ ရက်မှာ ဆွေးနွေးသွားဖို့ ရှိနေပါတယ်။

လန်ဒန်မြို့က ဝက်စ်မင်စတာခန်းမမှာ ကျင်းပသွားမယ့် ဒီဆွေးနွေးပွဲကိုတော့ ပါလီမန် လွှတ်တော်အမတ် ဂျင်မ် ရှန်နွန်က အဆိုတင်သွင်းခဲ့တာဖြစ်ပြီး Backbench Business Committee က ဦးဆောင်ကျင်းပသွားမယ်လို့ သိရပါတယ်။

ဂျင်မ် ရှန်နွန်ဟာ ဒီမိုကရက်တစ် ယူနီယံနစ်ပါတီ (DUP) ကိုယ်စားပြု နိုင်ငံရေးသမားတယောက်ဖြစ်ပြီး ၂၀၁၀ ခုနှစ်က စတင်ပြီးတော့ စထရန်ဖို့ဒ် မဲဆန္ဒနယ် လွှတ်တော်အမတ် (MP) အဖြစ် တာဝန်ထမ်းဆောင်နေသလို DUP ရဲ့ ကျန်းမာရေးနဲ့ လူ့အခွင့်အရေးဆိုင်ရာ ပြောရေးဆိုခွင့်ရှိသူလည်း ဖြစ်ပါတယ်။

ဒါ့အပြင် သူဟာ နိုင်ငံတကာ ဘာသာရေး ဒါမှမဟုတ် ယုံကြည်ချက်လွတ်လပ်ခွင့်ဆိုင်ရာ ပါတီအားလုံးပါဝင်တဲ့ လွှတ်တော်အဖွဲ့ ဥက္ကဋ္ဌဖြစ်ပြီးတော့ လူ့အခွင့်အရေးကို ထောက်ခံ အားပေးကာ နှလုံးခုန်စက် အသုံးပြုခွင့်နဲ့ ဘာသာရေးလွတ်လပ်ခွင့်တို့လို ကိစ္စရပ်တွေအတွက် ဥပဒေကြမ်းတွေကို စတင်တင်သွင်းခဲ့သူလည်း ဖြစ်ပါတယ်။

လတ်တလော မြန်မာနိုင်ငံမှာတော့ စစ်အာဏာသိမ်း ၅ နှစ်နီးပါး ကာလတွေအတွင်း စစ်တပ်က လူ့အခွင့်အရေးချိုးဖောက်မှုတွေကို ကျယ်ကျယ်ပြန့်ပြန့် ကျူးလွန်ခဲ့သလို ဘာသာရေးနယ်မြေနဲ့ အဆောက်အအုံတွေ ရာနဲ့ချီ ဖျက်ဆီးပစ်ခဲ့တယ်လို့ သိရပါတယ်။

အမျိုးသားညီညွတ်ရေးအစိုးရ (NUG)၊ လူ့အခွင့်အရေးဆိုင်ရာဝန်ကြီးဌာနကတော့ အကြမ်းဖက်စစ်အုပ်စုက အရပ်သားပြည်သူတွေအပေါ် ဘက်ပေါင်းစုံက လူ့အခွင့်အရေး ချိုးဖောက်မှုတွေနဲ့ တိုက်ခိုက်မှုတွေကို မှတ်တမ်းတင်နေပြီး နိုဝင်ဘာ ၃၀  ရက်အထိ ရရှိထားတဲ့  နောက်ဆုံး အချက်အလက်တွေအရ လေကြောင်းတိုက်ခိုက်မှုတွေကြောင့် ဘာသာရေး အဆောက်အအုံ ၆၂၁  ခုအပါအဝင် စာသင်ကျောင်း ၄၁၀ ကျောင်း၊ ဆေးရုံ၊ ဆေးခန်း ၁၃၉  ခု ပျက်စီးဆုံးရှုံးခဲ့ရတယ်လို့ ဆိုပါတယ်။ 

မကြာခင်မှာ ကျင်းပမယ့် မြန်မာ လူနည်းစု ဘာသာရေးဖိနှိပ်မှု ဆွေးနွေးပွဲအပြီးမှာတော့ ၃ နာရီကြာ မှတ်တမ်းအပြည့်အစုံကို ထုတ်ပြန်ပေးသွားမယ်လို့ သိရပါတယ်။