ရိုဟင်ဂျာတွေအပေါ် လူမျိုးတုံးသတ်ဖြတ်မှုစွပ်စွဲချက်နဲ့ အပြည်ပြည်ဆိုင်ရာတရားရုံး (ICJ) မှာ မြန်မာနိုင်ငံအပေါ် တရားစွဲထားတဲ့အမှုကို လာမဲ့နှစ် ဇန်နဝါရီမှာ ပြန်လည်ကြားနာမယ်လို့ တရားရုံးက ဒီဇင်ဘာ ၁၉ ရက်မှာ ထုတ်ပြန်ပါတယ်။
ဂမ်ဘီယာနိုင်ငံက မြန်မာနိုင်ငံကို တရားစွဲဆိုထားပြီး ၁၁ နိုင်ငံက ကြားဝင်ဆောင်ရွက်ခွင့်ရထားတဲ့ ဒီအမှုကို လာမဲ့ ဇန်နဝါရီ ၁၂ ရက်ကနေ ၂၉ ရက်အထိ နှုတ်နဲ့ လျှောက်လဲချက်တွေပေးရမှာ ဖြစ်ပါတယ်။
ဇန်နဝါရီ ၁၂ ရက်နေ ၁၅ ရက်အထိကို ဂမ်ဘီယာနိုင်ငံက လျှောက်လဲချက်ပေးရမှာဖြစ်ပြီး ၁၆၊ ၁၉ နဲ့ ၂၀ ရက်မှာတော့ မြန်မာဘက်က လျှောက်လဲချက်ပေးရမှာပါ။
ဇန်နဝါရီ ၂၁၊ ၂၂ နဲ့ ၂၃ ရက်မှာတော့ သက်သေတွေကို စစ်ဆေးတဲ့ တံခါးပိတ်ကြားနာပွဲကို တနေကုန်လုပ်မှာဖြစ်ပြီး ၂၂ ရက်ညနေပိုင်းမှာ ဂမ်ဘီယာဘက်က ကျွမ်းကျင်သူသက်သေတွေက ထွက်ဆိုမှာဖြစ်ပါတယ်။
ဇန်နဝါရီ ၂၆ ရက် နဲ့ ၂၇ ရက်မှာ ဂမ်ဘီယာဘက်က ဒုတိယအကြော့ နှုတ်နဲ့ လျှောက်လဲချက်ပေးရမှာဖြစ်ပြီး ၂၈ ရက်နဲ့ ၂၉ ရက်မှာ မြန်မာဘက်က လျှောက်လဲချက်ပေးရမယ်လို့ တရားရုံးက ထုတ်ပြန်ထားပါတယ်။
ဒီအမှုမှာ ဂမ်ဘီယာဘက်ကနေရပ်တည်ပြီး ကြားဝင်ဆောင်ရွက်ခွင့်ရထားတာ ဗြိတိန်၊ ပြင်သစ်နဲ့ ဂျာမနီအပါအဝင် ၁၁ နိုင်ငံရှိပြီး ဒီနိုင်ငံတွေရဲ့ ရပ်တည်ချက်ကို သိရှိနားလည်ပြီးဖြစ်လို့ နှုတ်နဲ့လျှောက်လဲရာမှာတော့ မလိုအပ်ဘူးလို့ တရားရုံးက ဆိုပါတယ်။
ရခိုင်ပြည်နယ်က ရိုဟင်ဂျာတွေအပေါ် စစ်တပ်ကအကြမ်းဖက်ခဲ့တာနဲ့ပတ်သက်ပြီး ၂၀၁၇ ခုနှစ်မှာ ဂမ်ဘီယာနိုင်ငံက နယ်သာလန်နိုင်ငံ၊ သည်ဟိဂ်မြို့မှာရှိတဲ့ ICJ မှာ တရားစွဲခဲ့တာဖြစ်ပါတယ်။
အဲဒီစွပ်စွဲချက်အပေါ် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ဦးဆောင်ပြီး ၂၀၁၉ ခုနှစ်တုန်းက ICJ တရားရုံးကိုသွားရောက်လျှောက်လဲ ငြင်းဆိုခဲ့ပေမဲ့ တရားရုံးကတော့ အဲဒါတွေကို ပယ်ချပြီး သက်သေတွေ မဖျောက်ဖျက်ဖို့အပါအဝင် ကြိုတင်ကာကွယ်မှုဆိုင်ရာ အစီအမံတွေချမှတ်ပေးခဲ့ပါတယ်။
၂၀၂၂ ခုနှစ်မှာ ဒုတိယအကြိမ် ကြားနာပွဲလုပ်ပြီး အဲဒီတုန်းကတက်ရောက်တဲ့ စစ်ကောင်စီဘက်က ကိုယ်စားလှယ်ကလည်း ဂမ်ဘီယာက တရားစွဲခွင့်မရှိ စတဲ့အချက်တွေနဲ့ ငြင်းဆိုခဲ့ပေမဲ့ အဲဒါအားလုံးကို တရားရုံးက ပယ်ချခဲ့ပါတယ်။
