တနင်္သာရီတိုင်း၊ ပုလောမြို့နယ်၊ ဆားခဲကျေးရွာမှ CDM ကျောင်းအုပ်ဆရာမ ဒေါ်အေးသီအောင်နဲ့ ခင်ပွန်းဖြစ်သူတို့ အသတ်ခံရမှုနဲ့ ပတ်သက်ပြီး ကျူးလွန်သူ ၄ ယောက်ကို ဖမ်းဆီးရမိခဲ့တယ်လို့ ကရင်အမျိုးသားအစည်းအရုံး (KNU) မြိတ်-ထားဝယ်ခရိုင်က ဒီဇင်ဘာ ၂၁ ရက်မှာ ထုတ်ပြန်ပါတယ်။
ပုလောမြို့နယ် ပညာရေးဘုတ်အဖွဲ့မှ တာဝန်ခံဖြစ်တဲ့ CDM ကျောင်းအုပ်ဆရာမ ဒေါ်အေးသီအောင်နဲ့ ခင်ပွန်းဖြစ်သူတို့ဟာ ပုလောမြို့နယ်၊ ဆားခဲရွာ၊ နေအိမ်မှာ ဒီဇင်ဘာ ၁၆ ရက် မနက် ၁ နာရီလောက်မှာ အသတ်ခံခဲ့ရတာပါ။
ပြစ်မှုကျူးလွန်သူတွေဖြစ်တဲ့ မောင်အောင်နိုင်ဦး၊ မောင်ဖြိုးဝေဦး၊ မောင်ဇော်ထိုက်နဲ့ မောင်ဝင်းစိုး တို့ဟာ ဒီဇင်ဘာ ၁၃ ရက်က KNU တပ်ရင်း (၇) တပ်ခွဲ (၅) အချုပ်ခန်းထဲမှ ထွက်ပြေးလာသူတွေ ဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။
အဆိုပါ ပြစ်မှုကျူးလွန်သူ ၄ ယောက်ထဲမှ ၃ ယောက်ကို ဒီဇင်ဘာ ၁၇ ရက်နဲ့ ကျန်တယောက်ကို ၁၈ ရက်က ဖမ်းဆီးခဲ့ပြီး စုံစမ်းစစ်ဆေးခဲ့ရာမှ ဆရာမဒေါ်အေးသီအောင်နဲ့ ခင်ပွန်းကို သတ်ဖြတ်ခဲ့တဲ့အမှု ပေါ်လာတယ်လို့ KNU မြိတ်-ထားဝယ်ခရိုင်အတွင်းအရေးမှူး ပဒိုစောအယ်နားက ပြောပါတယ်။
ကျူးလွန်သူ ၄ ယောက်ထဲမှ မောင်ဝင်းစိုးက ဆရာမကြီးကို သတ်ဖြတ်ခဲ့ပြီး ကျန်သုံးယောက်က ဆရာမရဲ့ ခင်ပွန်းဖြစ်သူကို ချုပ်နှောင်ရာမှာပါဝင်ပြီး ပြစ်မှုကျူးလွန်ပြီးနောက် နားကပ်၊ ဆွဲကြိုးနဲ့ လက်ကောက်တို့ကို ယူဆောင်ကာ ထိုင်းနိုင်ငံကို ထွက်ပြေးဖို့ ကြိုးစားနေချိန်အတွင်း ပြန်လည်ဖမ်းဆီးရမိခဲ့တယ်လို့ ထုတ်ပြန်ချက်ထဲမှာ ဖော်ပြထားပါတယ်။
KNU မြိတ်-ထားဝယ်ခရိုင်အတွင်းရေးမှူး ပဒိုစောအယ်နားက “ကျနော်တို့ အကုန်လုံး စုံစမ်းစစ်ဆေးပြီးတော့ ကျနော်တို့အဖွဲ့အစည်းရဲ့ ဥပဒေအတိုင်း အရေးယူဆောင်ရွက်သွားမှာပါ” လို့ ပြောပါတယ်။
ဆရာမ ဒေါ်အေးသီအောင်နဲ့ ခင်ပွန်း အသတ်ခံရတဲ့ ဖြစ်စဥ်အပေါ် KNU ရဲ့ ထုတ်ပြန်ချက်နဲ့ ပတ်သက်ပြီး တော်လှန်ရေးအဖွဲ့အစည်းတွေကြားမှာ ဝေဖန်မှုတွေ ရှိနေပါတယ်။
ဆရာမကြီးနဲ့ ခင်ပွန်း သတ်ဖြတ်မှုနဲ့ ပတ်သက်ပြီး တရားမျှတမှုနဲ့ အမှုမှန်ပေါ်ပေါက်ဖို့အတွက် သေချာစွာ စုံစမ်းစစ်ဆေးပေးဖို့ လွတ်လပ်သော CDM နိုင်ငံဝန်ထမ်းအဖွဲ့အစည်း ဖြစ်မြောက်ရေး ကော်မတီက ဒီဇင်ဘာ ၂၁ ရက်နေ့မှာ ထုတ်ပြန်ထားပါသေးတယ်။
