မိခင်ဖြစ်သူ ဒေါ်အောင်ဆန်းစုကြည် ကျန်းမာရေးကောင်းမွန်တယ်ဆိုတဲ့ စစ်တပ်ရဲ့ ထုတ်ပြန်ချက်နဲ့ ပတ်သက်ပြီး သက်သေပြဖို့အတွက် တွေဆုံခွင့်ပေးရမယ်လို့ သားဖြစ်သူ ကိုထိန်လင်း (ခ) ကင်မ်အဲရစ်က ပြောလိုက်ပါတယ်။

အာဏာသိမ်းစစ်တပ်က မတရားနှစ်ရှည်ဖမ်းဆီးထားတဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်ဆောင်ဆန်းစုကြည်ရဲ့ ကျန်းမာရေးအခြေအနေကို ကောင်းမွန်တယ်ဆိုပြီး သက်သေမပြနိုင်ဘဲ ဒီဇင်ဘာ ၁၆ ရက်နေ့မှာ ထုတ်ပြန်ခဲ့ပါတယ်။

ဒီထုတ်ပြန်ချက်နဲ့ပြီး သားဖြစ်သူ ကင်မ်အဲရစ်က “စစ်အစိုးရက မေမေဟာ ကျန်းမာရေးကောင်းမွန်ပါတယ်လို့ အတင်းအကျပ်ယုံခိုင်းနေပေမဲ့ သက်သေအထောက် အထားမရှိတဲ့ ပြောဆိုချက်တွေဟာ နှစ်ပေါင်းများစွာ ဝါဒဖြန့်ချိရေးနဲ့ လျှို့ဝှက်ဖုံးကွယ်ပြီးလုပ်ခဲ့တဲ့ လုပ်ရပ်တွေအတွက် ဘာမှယုံကြည်စရာ မရှိပါဘူး” လို့ သူရဲ့ လူမှုကွန်ရက်တဆင့် ပြောကြားခဲ့တာ ဖြစ်ပါတယ်။

စစ်အုပ်စုအနေနဲ့ မိခင်ဖြစ်သူ ကျန်းမာရေးကောင်းမွန်တယ်ဆိုတာကို တကယ် ယုံကြည်စေချင်တယ်ဆိုရင် တွေ့ခွင့်ပေးရမယ်လို့ ပြောကြားခဲ့ပြီး တွေ့ခွင့်မပေးနိုင်ရင်လည်း လက်ခံယုံကြည်နိုင်သူနဲ့ အတည်ပြုချက်ပေးကာ အမှန်တရားကို မြင်သာအောင် ပြသဖို့ လိုတယ်လို့လည်း ကင်မ်အဲရစ်က  ပြောပါတယ်။

“သက်သေအထောက်အထားမရှိတဲ့ အကြောင်းပြချက်တွေကို ယုံကြည်ဖို့ မဖြစ်နိုင်ပါ။ Shakespeare ရဲ့ Hamlet မှာ ပြောထားသလို အလွန်အကျွံကာကွယ်ပြောဆိုနေသူက ပိုပြီး သံသယဖြစ်စရာ ကောင်းပါတယ်။ စစ်တပ်က တကယ်ယုံကြည်စေချင်ရင် အဖြေက ရိုးရှင်းပါတယ်၊ သက်သေပြပါ၊ မေမေနဲ့ တွေ့ခွင့်ပေးပါ၊ လက်ခံယုံကြည်နိုင်သူနဲ့ အတည်ပြုချက်ပေးပါ၊ အမှန်တရားကို မြင်သာအောင် ပြပါ။”

နေပြည်တော်မှာ အကျဉ်းကျခံနေရတဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ ပတ်သက်တဲ့ သတင်းအချက်လက်တွေ ပြတ်တောက်နေတာကြောင့် စစ်အုပ်စုလက်ထဲမှာ ကွယ်လွန်သွားမှာကို စိုးရိမ်ကြောင်း ဒေါ်အောင်ဆန်းစုကြည်ရဲ့ သားဖြစ်သူ ကင်မ်အဲရစ်က Reuters သတင်းဌာနနဲ့ ဒီဇင်ဘာ ၁၄ ရက်က ပြုလုပ်ခဲ့တဲ့ အင်တာဗျူးမှာ ပြောကြားခဲ့ပါတယ်။

အကျဉ်းထောင်အတွင်း ကျန်းမာရေးချို့ယွင်းနေတယ်ဆိုတဲ့ သတင်းတချို့သာသိရပြီး ၂ နှစ်နီးပါးကြာ အဆက်အသွယ် ပြတ်တောက်နေတာကြောင့် စစ်အုပ်စုလက်ထဲမှာ ကွယ်လွန်သွားရင် သိခွင့်မရမှာကို စိုးရိမ်ကြောင်းလည်း သားဖြစ်သူ ကင်မ်အဲရစ်က ပြောကြားခဲ့တာပါ။

၂၀၂၁ ခုနှစ် စစ်အာဏာသိမ်းပြီး ချက်ချင်းမှာပဲ စစ်တပ်က နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို ဖမ်းဆီးထိန်းသိမ်းပြီး လူထုလှုံ့ဆော်မှု၊ အဂတိလိုက်စားမှု၊ ရွေးကောက်ပွဲလိမ်လည်မှုစတဲ့ အမှုတွေစွပ်စွဲပြီး စုစုပေါင်း ထောင်ဒဏ် ၂၇ နှစ် ချမှတ်ထားတာ ဖြစ်ပါတယ်။

ဒေါ်အောင်ဆန်းစုကြည်ဟာ သူ့ရဲ့ ရှေ့နေနဲ့ လည်းတွေ့ခွင့်မရသလို အကျဉ်းသားတယောက်ရဲ့ ရပိုင်ခွင့် အခွင့်ရေးဖြစ်တဲ့ မိသားစုနဲ့ ထောင်ဝင်စာတွေ့ဆုံခွင့်လည်း မရဖြစ်နေပြီး ပြင်ပနဲ့ အဆက်အသွယ် ဖြတ်တောက်ခံထားရပါတယ်။