ဂျပန်ပို့ပေးမယ်ဆိုပြီး အလုပ်သမား ၁,၀၀၀ နီးပါးဆီက ငွေလိမ်လည်သွားတဲ့ Su Latt Myint Mo အေဂျင်စီမှ ဒါရိုက်တာ အဖွဲ့ဝင်တယောက်ကို အင်းစိန်ထောင်မှာ ဖမ်းဆီးစစ်ဆေးနေတယ်လို့ မြန်မာပြည်ပအလုပ်အကိုင် ဝန်ဆောင်မူလုပ်ငန်းရှင်များအသင်း (MOEAA) ဆီက သိရပါတယ်။
MOEAA မှ တာဝန်ရှိသူတယောက်က “နေပြည်တော်က ညွှန်ကြားချက်နဲ့ ဒီကိစ္စကို အပူတပြင်းကိုင်နေတာ တွေ့တယ်။ ဆက်စပ်တဲ့သူတွေတိုင်း အလုပ်သမားရုံးက ခေါ်စစ်နေတယ်” လို့ ပြောပါတယ်။
Su Latt Myint Mo အေဂျင်စီဟာ အလုပ်သမားတွေဆီက ငွေရယူပြီး ပြည်ပကို မပို့ပေးနိုင်တာနဲ့ ပတ်သက်လို့ တိုင်ကြားမှုတွေ ရှိတဲ့အတွက် အခုနှစ် မေလကတည်းက လိုင်စင်ရာသက်ပန် ပိတ်သိမ်းအရေးယူခံထားရတဲ့ အေဂျင်စီဖြစ်တယ်လို့ စစ်ကောင်စီ အလုပ်သမားဝန်ကြီးဌာနက ထုတ်ပြန်ထားပါတယ်။
အဲဒီအေဂျင်စီကို ပိုင်ရှင် တယောက်၊ ဒါရိုက်တာအဖွဲ့ဝင် ၂ ယောက်တို့နဲ့ ဖွဲ့ထားတာလို့ စစ်ကောင်စီ အလုပ်သမားဝန်ကြီးဌာနက ကနဦးထုတ်ပြန်ချက်မှာ ဖော်ပြထားသလို ငွေလိမ်လည်မှုမှာ ပါဝင်ပတ်သက်တာ မရှိဘူးဆိုပြီး ပိုင်ရှင်ဖြစ်သူက ဖြေရှင်းချက် လာပေးသွားတယ်လို့ MOEAA က ဆိုပါတယ်။
ဒါ့အပြင် ငွေလိမ်လည်ရယူခဲ့တဲ့အထဲ ပါတယ်ဆိုတဲ့ Nay Won Gabar အေဂျင်စီကလည်း အဲဒီဖြစ်စဥ်ကို သူတို့မသိရဘဲ ဒါရိုက်တာအဖွဲ့ဝင်တွေ ပေါင်းလိမ်တာဆိုပြီး MOEAA မှာ လာရောက်ထွက်ဆိုခဲ့တယ်လို့ တာဝန်ရှိသူက ပြောပါတယ်။
“ဒါက သက်ဆိုင်ရာမှာ ဆက်လက်စစ်ဆေးခံရမဲ့ကိစ္စ။ အလိမ်ခံထားရသူတွေ တိုင်စရာရှိတာ တိုင်ထားကြပါ။”
Su Latt Myint Mo အေဂျင်စီက ဂျပန်ပို့ပေးမယ်ဆိုပြီး အလုပ်သမားတယောက်ကို ကျပ်သိန်း ၂၀၀ နီးပါးနဲ့ အလုပ်သမား ၁,၀၀၀ လောက်ဆီက ငွေလိမ်လည်ထားတာဖြစ်ပါတယ်။
တာချီလိတ်လမ်းကြောင်းကနေ ဂျပန်ကို သွားရမယ်ဆိုကာ ထိုင်းနိုင်ငံခေါ်သွားပြီး ကြိုတင်ငှားထားတဲ့ အိမ်တွေမှာ ပစ်ထားခံထားရတဲ့ အလုပ်သမား ၇၀၀ နီးပါးရှိတယ်လို့ ကိုယ်တိုင်ငွေလိမ်ခံထားရတဲ့ အလုပ်သမားတွေဆီက သိရပါတယ်။
အဲဒီအေဂျင်စီက အရင်ကလည်း မလေးရှားနိုင်ငံ ပို့ပေးမယ်ဆိုကာ ငွေလိမ်လည်ရယူထားတာတွေရှိခဲ့ပြီး အလုပ်သမားအချို့က ငွေပြန်ရလိုမူနဲ့ တရားစွဲဆိုထားတယ်လို့ စစ်ကောင်စီအလုပ်သမားဝန်ကြီးဌာနက ဆိုပါတယ်။
အခုလို အလုပ်သမားတွေဆီက ငွေပမာဏများစွာ လိမ်လည်ထားတဲ့ Su Latt Myint Mo အေဂျင်စီက တာဝန်ရှိသူတွေ နဲ့ ဆက်စပ်ပါဝင်တဲ့သူတွေကို ဘယ်လိုအရေးယူသွားမယ်ဆိုတာကို အဲဒီဝန်ကြီးဌာနဘက်က အသိပေးပြောဆိုတာမရှိသေးပါဘူး။
ဒီလိုငွေလိမ်လည်မူအပေါ် ပြည်ပအလုပ်အကိုင်ဆိုင်ရာ ဥပေဒပုဒ်မ ၂၆ နဲ့ အမူဖွင့်အရေးယူလို့ရပြီး ပြစ်မူကျူးလွန်ကြောင်း ထင်ရှားရင် ထောင် ၇ နှစ်အထိ ချခံရနိုင်တဲ့အပြင် စာရွက်စာတမ်း အတုပြုလုပ်မှု၊ ငွေကြေးလိမ်လည်မှု အပါအဝင် တခြား ပုဒ်မတွေနဲ့ပါ တရားစွဲဆိုလို့ ရတယ်လို့ အေ ဂျင်စီအသိုက်အဝန်းဆီက သိရပါတယ်။
