ကင်မ်ရစ်ရဲ့ ပြောဆိုချက်အတိုင်း ဒေါ်အောင်ဆန်းစုကြည် အသက်အန္တရာယ် စိုးရိမ်ရပြီး ပြည်တွင်းမှာ ဘာသတင်းအချက်အလက်မှ မရဘူးလို့ NLD ဗဟိုအလုပ်အမှုဆောင်အဖွဲ့ဝင် ဒေါက်တာမျိုးညွန့်က ပြောပါတယ်။

စစ်ကောင်စီက ဖမ်းဆီးအကျဉ်းချထားတဲ့ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ ပတ်သက်တဲ့ သတင်းအချက်အလက်တွေ လုံးဝမရတော့တာကြောင့် အသက်ရှင်လျက်ရှိတာ မသေချာတော့ဘူးလို့ သားဖြစ်သူ ကိုထိန်လင်း(ခ)ကင်မ်အဲရစ်က ဒီဇင်ဘာ ၁၄ ရက်နေ့က ရိုက်တာသတင်းဌာနကို ပြောဆိုခဲ့တာပါ။ 

ဂျပန်နိုင်ငံ၊ တိုကျိုမြို့မှာ ပြုလုပ်ခဲ့တဲ့ ဒေါ်အောင်ဆန်းစုကြည်၊ သမ္မတကြီး ဦးဝင်းမြင့်နဲ့ နိုင်ငံရေးအကျဉ်းသားအားလုံး ပြန်လည်လွတ်မြောက်ရေး တောင်းဆိုတဲ့ All In One Piece Movement မှာ ကိုထိန်လင်း ကိုယ်တိုင်ပါဝင်ခဲ့ပြီး အခုလို ပြောဆိုခဲ့တာ ဖြစ်ပါတယ်။ 

ပြည်တွင်းမှာရှိနေတဲ့ NLD ဗဟိုအလုပ်အမှုဆောင်အဖွဲ့ဝင် ဒေါက်တာမျိုးညွန့်က ကိုထိန်လင်းရဲ့ ပြောဆိုချက်ကို ထောက်ခံပြီး ဒေါ်အောင်ဆန်းစုကြည်နဲ့ပတ်သက်ပြီး ခိုင်လုံတဲ့ ဘာသတင်းအချက်အလက်မှ မရဘူးလို့ ဆိုပါတယ်။

NLD ဗဟိုအလုပ်အမှုဆောင်အဖွဲ့ဝင် ဒေါက်တာမျိုးညွန့်က “သမ္မတကြီးကိုတော့ သူ့အိမ်က ထောင်ဝင်စာ ပို့တယ်ပေါ့လေ။ ဒါပေမဲ့ ပါဆယ်ပဲ ပို့ရတာပါ။ ကျနော်တို့ သိသရွေ့တော့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကတော့ အခု ဘယ်ရောက်နေမှန်း မသိဘူး၊ သူ့ရဲ့ကျန်းမာရေးနဲ့ပတ်သက်တဲ့ သတင်းတွေလည်း တိတိကျကျ စိတ်ချယုံကြည်ရတဲ့ သတင်းရပ်ကွက်တွေက မရတာလည်းကြာပြီ ဆိုတော့ ကျနော်တို့က သူ့အတွက် အသက်အန္တရာယ်ပါ စိုးရိမ်ရတယ်လို့ ထင်ပါတယ်။ တစ်အချက် ကျနော်တို့ ခေါင်းဆောင်ဟာ ထောင်တွင်းအခြေအနေနဲ့ ပြင်းထန်တဲ့ ငလျင်အန္တရာယ်ကို ကြုံခဲ့ရတယ်၊ နောက်ပြီး ထောင်တွင်းမှာ ကုသဖို့မသင့်တဲ့ နှလုံးရောဂါတို့လို ရောဂါမျိုးကို ခံစားနေရတယ်၊ အဲဒီနှစ်ချက်ကြောင့် ကျနော်တို့က စိုးရိမ်တယ်လို့ ထွက်ပြောရခြင်း ဖြစ်ပါတယ်။ လုံးဝကို မဖြစ်သင့်တဲ့ ကိစ္စတခုပါပဲခင်ဗျ၊ ပြည်သူအများစုရဲ့ ရင်ထဲမှာ ဒေါ်အောင်ဆန်းစုကြည် လွတ်မြောက်ရေး၊ တိုင်းပြည်ရဲ့ အနာဂတ်မှာ ပါဝင်နိုင်ရေးဟာ အမြဲတမ်းရှိနေမယ်လို့ ကျနော်တို့ ယုံကြည်ပါတယ်။ ဒါပေမဲ့ အကြောက်တရားရဲ့ ဖိစီးမှုကြောင့်သာ လူတွေ နှုတ်ဆိတ်နေကြတာလို့ ကျနော် ထင်ပါတယ်။ စိတ်ချယုံကြည်ရတဲ့ သတင်း၊ ကိုယ်တိုင်ကိုယ်ကျ မြင်ခဲ့တွေ့ခဲ့တဲ့သူတွေဆီကနေပြီးတော့ ကျနော်တို့ရတဲ့သတင်းမျိုး ဘာမှမရှိပါဘူး” လို့ ပြောပါတယ်။

စစ်ကောင်စီ အာဏာစသိမ်းခဲ့တဲ့ ၂၀၂၁ ဖေဖော်ဝါရီ ၁ ရက်နေ့ မနက်အစောပိုင်းမှာကတည်းက ဒေါ်အောင်ဆန်းစုကြည် အပါအဝင် NLD အစိုးရခေါင်းဆောင်တွေကို စစ်ကောင်စီက ဓားစာခံသဖွယ် ဖမ်းဆီးခဲ့တာပါ။

NLD အစိုးရထိပ်တန်းခေါင်းဆောင်တွေကို ဘယ်မှာ ထိန်းသိမ်းထားတယ်၊ ဘယ်လို နေထိုင်နေရပြီး ဘယ်လို ကျန်းမာရေးအခြေအနေတွေ ရှိနေတယ်ဆိုတာကိုတောင် မိသားစုတွေနဲ့ရှေ့နေတွေက သိခွင့်မရဘဲ စစ်ကောင်စီက သတင်းအမှောင်ချထားခဲ့တာပါ။

နိုင်ငံရေးအကျဉ်းသားဟောင်းများအဖွဲ့မှ ဦးထွန်းကြည်က “ကွယ်လွန်သွားခြင်းမျိုးလည်း ဖြစ်နိုင်တယ် ဆိုတဲ့ သူ့ရဲ့ရိုက်တာကို ပြောကြားချက်တွေပေါ့၊ သားတယောက်ရဲ့ အခုလိုမျိုး ခံစားချက်တွေကို ကျနော်တို့ အပြည့်အဝနားလည်ပါတယ်။ ဒီစစ်အာဏာရှင်တွေအဆက်ဆက်က နေဝင်းမှသည် နိုင်ငံတကာ စစ်ရာဇဝတ်ကောင် မင်းအောင်လှိုင်အထိက ဒေါ်အောင်ဆန်းစုကြည် အပေါ်မှာ အငြိုးအတေး တော်တော်ကြီးတယ်ဗျာ။ သူတို့ကြီးတဲ့ အငြိုးအတေးက သူရဲဘောကြောင်တဲ့ အငြိုးအတေးဗျ။ သူတို့ဆီမှာ ဒေါ်အောင်ဆန်းစုကြည်“ကြောက်” ရောဂါပေါ့၊ ဒေါ်အောင်ဆန်းစုကြည် Fobia ပေါ့၊ သူတို့မှာက ခိုင်ခိုင်မာမာကို ဒီရောဂါက ရှိနေတယ်လို့ ကျနော်ကတော့ အဲဒီလို ရှုမြင်သုံးသပ်တယ်၊ တုန်လှုပ်ချောက်ချားတာကတော့ တော်တော်လေးကို တုန်လှုပ်ချောက်ချားနေတယ်။ အခု ရွေးကောက်ပွဲနီးလေလေ ပိုတိုးပြီးတော့ သွေးရူးသွေးတန်းတွေနဲ့ လုပ်နေကိုင်နေတဲ့အခါကျတော့ ဒေါ်အောင်ဆန်းစုကြည်ရဲ့ အသက်အန္တရာယ်ပေါ့။ NLD ခေါင်းဆောင်တွေ ကြည့်ပေါ့ဗျာ၊ ဦးဉာဏ်ဝင်းမှသည် ဒေါက်တာဇော်မြင့်မောင်ပေါ့ဗျာ၊ တခြား ခေါင်းဆောင်တွေအပေါ်မှာလည်း သူ့ဘက်ကနေ အငြိုးအတေး တော်တော်ကြီးတယ်ဗျ၊ သေအံ့ဆဲဆဲအချိန်ကျမှ လွတ်ငြိမ်းချမ်းသာခွင့်ပေးတယ်တို့ လွတ်ငြိမ်းသက်သာခွင့်ပေးတယ်တို့ ဆိုတာ ဒါတွေက တကယ်တော့ မရိုးသားဘူးဗျ” ပြောပါတယ်။

ဒေါ်အောင်ဆန်းစုကြည်ဟာ ၂၀၂၂ ခု ဒီဇင်ဘာလမှာ ရှေ့နေအဖွဲ့နဲ့ နောက်ဆုံးတွေ့ခွင့်ရခဲ့ပြီး အဲဒီနောက်ပိုင်း ၃ နှစ်နီးပါးအကြာ လက်ရှိအချိန်အထိ စစ်ကောင်စီက ပြင်ပနဲ့ အဆက်အသွယ် ဖြတ်ထားခဲ့တာပါ။ 

စစ်ကောင်စီက ဖမ်ဆီးထားတဲ့ စုစုပေါင်းအချိန် ၅ နှစ်နီးပါးကာလအတွင်း ဒေါ်အောင်ဆန်းစုကြည်ကို နေပြည်တော် အချုပ်ထောင် အပါအဝင် နေရာအများအပြားကို ပြောင်းရွှေ့ထားခဲ့ပြီး ဘာသတင်းမှ အတည်ပြု ထုတ်ပြန်တာ မရှိတော့ပါဘူး။

ဖမ်းဆီးထားတဲ့အချိန်အတွင်းမှာ ဒေါ်အောင်ဆန်းစုကြည်ဟာ နှလုံး၊ အရိုး၊ သွားဖုံး စတဲ့ ကျန်းမာရေးပြဿနာတွေ ကြုံတွေ့နေရတယ်ဆိုတဲ့ တဆင့်သတင်းတွေသာ ကြားခဲ့ရပြီး ခိုင်လုံတဲ့ ဘာသတင်းမှမရဘူးလို့ ကင်မ်အဲရစ်က ရိုက်တာသတင်းဌာနနဲ့ အင်တာဗျူးမှာ ထည့်သွင်းပြောဆိုခဲ့ပါတယ်။ 

သုတချမ်းသာ