စစ်ကိုင်းတိုင်း၊ အရာ​တော်မြို့နယ်ထဲမှာ ဒီဇင်ဘာ ၉ ရက်က ရိက္ခာသယ်လာတဲ့ ပျူစောထီးတွေကို ပစ်ခတ်ဖမ်းဆီးရာ ၂ ယောက်သေဆုံးပြီး ၈ ယောက်ကို အရှင်ဖမ်းမိခဲ့တယ်လို့ မုံရွာခရိုင် တပ်ရင်း ၂၁ (တိုက်နယ် ၉ - MRTF တပ်ဖွဲ့) ဆီကနေ သိရပါတယ်။

မုံရွာခရိုင် တပ်ရင်း ၂၁ ရဲ့ ပြန်ကြားရေးတာဝန်ခံက “အရာ​တော်မြို့နယ်ထဲမှာရှိတဲ့ ငွေတွင်း ပျူစောထီးရွာက ပျူတွေကို ပစ်ခတ်ဖမ်းဆီးရာမှာ ၂ ယောက် သေပြီးတော့ ၈ ယောက်ကိုတော့ အဲဒီနေ့မနက် ၉ နာရီခွဲလောက်မှာ အရှင်ဖမ်းဆီးနိုင်ခဲ့တာ” လို့ ပြောပါတယ်။

အရှင်ဖမ်းဆီးရမိတဲ့ ပျူစောထီးတပ်ဖွဲ့ဝင်တွေထဲမှာ ငွေတွင်းပျူစောထီးခေါင်းဆောင်ရဲ့ ညာလက်ရုံး​တယောက်လည်း ပါဝင်တယ်လို့ ဆိုပါတယ်။

မုံရွာခရိုင် တပ်ရင်း ၂၁ ရဲ့ တာဝန်ရှိသူတယောက်က “ငွေတွင်းပျူရွာမှာ ရိက္ခာပြတ်တဲ့အခါ အဲဒီရွာနဲ့ ၂ မိုင်လောက်ဝေးတဲ့ ညောင်ဒူးလေးရွာကို သွားပြီး ရိက္ခာသယ်ကြရတယ်။ အခုလည်း အဲ့လို ရိက္ခာသယ်ပြီး ပြန်လာတဲ့ ပျူ ၁၀ ယောက်ကို ငွေတွင်းနဲ့ ညောင်ဒူးလေးရွာကြားမှာ ပစ်ခတ်တိုက်ခိုက်ခဲ့တာမှာ ပျူ ၂ ယောက်ကတော့ နေရာမှာတင် သေသွားတော့ ၈ ယောက်ကို အရှင်ဖမ်းမိလာတာပါ။ စစ်ဆေးကြည့်လိုက်တော့ အရှင်ဖမ်းမိလာတဲ့အထဲမှာ ငွေတွင်းပျူစောထီးခေါင်းဆောင် ကျော်ဆွေရဲ့ ညာလက်ရုံး​တယောက် ပါလာတယ်။ ဖမ်းမိသူတွေကိုတော့ စစ်ဆေးစရာတွေ စစ်ဆေး​မေးမြန်းပြီး သုံ့ပန်းဥပဒေနဲ့အညီပဲ ထိန်းသိမ်းထားပါတယ်” လို့ ပြောပါတယ်။

အဆိုပါ ပျူစောထီးအဖွဲ့ဝင်တွေ သယ်ဆောင်လာကြတဲ့ စားနပ်ရိက္ခာတွေကို တော်လှန်ရေးတပ်တွေက သိမ်းဆည်းခဲ့ပါတယ်။

အဲဒီပစ်ခတ်ဖမ်းဆီးမှုကိုတော့ မုံရွာခရိုင်အမှက် ၂၁ တပ်ရင်း (တိုက်နယ် 9) MRTF နဲ့အတူ ရွာခံမဟာမိတ်တပ်ဖွဲ့တွေ ပူးပေါင်းဆောင်ရွက်ခဲ့ကြတာလို့ သိရပါတယ်။