စစ်ကိုင်းတိုင်း၊ စစ်ကိုင်းမြို့နယ်မှာ ကြံ့ခိုင်ရေးပါတီ မဲဆွယ်ပွဲအတွက် စစ်တပ်၊ ရဲနဲ့ အုပ်ချုပ်ရေးမှူးတို့က စက်ရုံ အလုပ်ရုံတွေက ဝန်ထမ်းတွေကို ဖိအားပေး ခြိမ်းခြောက်ခေါ်နေတယ်လို့ ဒေသခံတွေက ပြောပါတယ်။
မတတ်သာလို့ မဲဆွယ်ပွဲတက်လာသူတွေကို ဓာတ်ပုံ ဗွီဒီယိုရိုက်ပြီး ရပ်ကွက်နေပြည်သူ မဲဆန္ဒရှင်တွေ မဲဆွယ်ပွဲတက်တယ်လို့ လူမှုကွန်ရက်မှာ မဟုတ်မမှန် လိမ်လည်ဝါဒဖြန့်နေတယ်လို့ ဆိုပါတယ်။
ဒီဇင်ဘာ ၅ ရက်နေ့က စစ်ကိုင်းမြို့မှာလုပ်တဲ့ ကြံ့ခိုင်ရေးပါတီမဲဆွယ်ပွဲမှာ ပတ္တမြားရပ်ကွက်၊ စိန်ကုန်းရပ်ကွက်၊ ပိုးတန်းရပ်ကွက်၊ ရွာထောင်ရပ်ကွက်၊ သောတာပန်ရပ်ကွက်တို့က မဲဆန္ဒရှင် ပြည်သူတွေနဲ့တွေ့တယ်ဆိုပြီ လူမှုကွန်ရက်မှာ တင်ထားတာဟာ တကယ်တော့ ရပ်ကွက်ကပြည်သူတွေမဟုတ်ဘဲ စစ်ကိုင်းမြို့ စက်ရုံ အလုပ်ရုံတွေက ဝန်ထမ်းတွေပဲဖြစ်တယ်လို့ ဆိုပါတယ်။
စက်ရုံတာဝန်ရှိသူတယောက်က “အရင်လ မဲဆွယ်ပွဲတုန်းက ငလျင်ထောက်ပံ့ကြေး ပေးမယ်ဆိုပြီး လိမ်ခေါ်တာ၊ ပွဲပြီးတော့ ဘာမှမပေးဘူး။ ဒီတခါ မဲဆွယ်ပွဲလည်း ခေါ်တယ်။ ဘယ်သူမှ မသွားဘူး။ ရပ်ကွက်ထဲကလူတွေမလာလို့ စက်ရုံကို စစ်သားနဲ့ရဲတွေရောက်လာပြီး မဲဆွယ်ပွဲကို အခုချက်ချင်းတက်ရမယ်။ ဝန်ထမ်းတွေကို ပါတီအင်္ကျီတွေ အဓမ္မဝတ်ခိုင်းပြီး အခမ်းအနားလုပ်တဲ့နေရာကို ပို့ခိုင်းတာ၊ မပို့ရင်လည် စက်ရုံကို တခုခုလုပ်မှာစိုးလို့ ပို့ပေးရတာ” လို့ ပြောပါတယ်။
အဲဒီနေ့က ကြံ့ခိုင်ရေးပါတီက ဝင်ပြိုင်မဲ့ ပြည်သူ့လွှတ်တော်ကိုယ်စားလှယ်လောင်း ဦးသက်ပုံ၊ အမျိုးသားလွတ်တော်ကိုယ်စားလှယ်လောင်း ဦးဝင်းတင့်နဲ့ တိုင်းလွှတ်တော် ကိုယ်စားလှယ်လောင်း ဦးမင်းမင်းဇေယျာမြင့်၊ ဦးသော်နိုင်ဦး တို့ လာရောက်မဲဆွယ်ခဲ့တာပါ။
