ကွန်ဂိုဒီမိုကရက်တစ်သမ္မတနိုင်ငံမှာ ငြိမ်းချမ်းရေးသဘောတူညီချက်တွေ ရထားပေမဲ့ တောင်ကီဗူးပြည်နယ်မှာ အကြမ်းဖက်မှုတွေ ပေါ်ပေါက်ခဲ့လို့ အရပ်သားတွေ သေဆုံးခဲ့ပါတယ်။
ဗုံးဆန်ဒဏ်ရာတွေရထားတဲ့ ကလေးတွေကို သစ်သားအခေါင်းတွေနဲ့ သယ်လာတဲ့ ရွာသားတွေဟာ ကွန်ဂိုနိုင်ငံဆန်ဂီမြို့က ဆေးရုံရဲ့ စင်္ကြံတွေပေါ်မှာ ဒီဇင်ဘာ ၆ ရက်က ရောက်ရှိနေပါတယ်။
ရူဇီဇီလွင်ပြင်တလျှောက်က ရပ်ရွာတွေကို အသစ်ဗုံးကြဲတိုက်ခိုက်တာတွေကြောင့် လူအများအပြားသေဆုံးပြီး မိသားစုတွေဟာ လူဗန်ဂီနဲ့ ကာတိုဂိုတာကနေ ဆန်ဂီမြို့ဆီ ဘေးကင်းရာ ထွက်ပြေးတိမ်းရှောင်ခဲ့ရပါတယ်။
ကွန်ဂိုနဲ့ ရဝမ်ဒါတို့ဟာ အမေရိကန် သမ္မတ ဒေါ်နယ်ထရမ့်ပ်လက်ထက်မှာ အမေရိကန်က ကြားဝင်စေ့စပ်ပေးတဲ့ ငြိမ်းချမ်းရေး သဘောတူညီချက်ကို လက်မှတ်ရေးထိုးပြီး ၂ ရက်အကြာမှာ အကြမ်းဖက်မှုတွေ မြင့်တက်လာခဲ့ပါတယ်။
အစောပိုင်းကတော့ သဘောတူညီချက်ဟာ နှစ်ပေါင်းများစွာ ကြာနေတဲ့ ပဋိပက္ခတွေကို ရပ်တန့်ဖို့ရည်ရွယ်တဲ့ အောင်မြင်မှု တခုအဖြစ် ချီးကျူးဂုဏ်ပြုခဲ့ကြပါတယ်။
အဲဒီအစား တောင်ကီဗူးပြည်နယ်ရဲ့ အစိတ်အပိုင်းတချို့မှာ ပဋိပက္ခတွေ ပိုပြင်းထန်လာပြီး လူဗန်ဂီ၊ ကာတိုဂိုတာနဲ့ ကာမန်ယိုလာ ရွာတွေတဝိုက်မှာ ပေါက်ကွဲမှုတွေ ဖြစ်ခဲ့ပါတယ်။
ထောင်ပေါင်းများစွာသော လူတွေဟာ တကျော့ပြန်ဖြစ်နေတဲ့ ရန်လိုမှုတွေကနေ ထွက်ပြေးနေရပါတယ်။
ဆေးရုံမှာ ပြီးခဲ့တဲ့ ၂၄ နာရီအတွင်း ဒဏ်ရာရသူ ၃၇ ယောက် ရှိပြီး အဲဒီထဲမှာ အသက် ၅ နှစ်ကနေ ၂၀ နှစ်ကြား အရွယ်မရောက်သေးသူ အယောက် ၂၀ ပါတယ်လို့ ဆေးရုံဒါရိုက်တာရေနေး ကင်ယန်ဂူ က ပြောပါတယ်။
အသက် ၂ နှစ်အောက် ကလေးတယောက်အပါအဝင် အလောင်း ၆ လောင်း ရရှိခဲ့ပြီး သေဆုံးသူ ၃ ယောက်နဲ့ ဆေးရုံမှာ သေဆုံးသွားသူ ၃ ယောက် ပါဝင်ပါတယ်။
RN5 တလျှောက်မှာ ဗုံးကြဲတိုက်ခိုက်မှုတွေ ဆက်ဖြစ်နေလို့ စန်ဂီမြို့မှာ ခိုလှုံသူအရေအတွက်နဲ့ သေဆုံးသူ အရေအတွက် အပြည့်အစုံကို ဆုံးဖြတ်ဖို့ ခက်ခဲနေပါတယ်။
Source: Reuters
