ရန်ကုန်မြို့မှာ ဒီဇယ်ဈေး  ၁ လီတာမှာ ၁၈၅ ကျပ် ကနေ  ၂၂၅ ကျပ် အထိကျဆင်းလာပြီး လက်ရှိမှာ ၁ လီတာဈေး ကျပ်၃,၀၀၀  အောက်ပြန်ရောက်ရှိလာပါတယ်။

ဒီတပတ်အတွက် စစ်ကောင်စီသတ်မှတ်တဲ့ ရန်ကုန်လက်လီရည်ညွှန်းဈေးက ဒီဇယ်တလီတာကို ၂၈၀၅ ကျပ်၊ ပရီမီယံဒီဇယ် ၁ လီတာကို ၂၈၀၅ ကျပ်၊ ဓာတ်ဆီ 92  ၁ လီတာကို ၂၅၂၅ ကျပ်၊ ဓာတ်ဆီ 95 ၁ လီတာကို ၂၆၁၀ ကျပ်ဖြစ်ပါတယ်။

ဒီဇင်ဘာ ၄ ရက်အထိ ဒီဇယ် ၁ လီတာဈေးတွေက ကျပ် ၃,၀၀၀ အထက်မှာရှိနေခဲ့တာဖြစ်ပြီး သီတင်းပတ် ၄ ပတ်အတွင်းမှာ ကျပ် ၃,၀၀၀ အောက်ကို ပြန်ရောက်ရှိလာတာပါ။

ဓာတ်ဆီဈေးတွေကတော့ ပြီးခဲ့တဲ့ သီတင်းပတ်ဈေးနှုန်းနဲ့ နှိုင်းယှဉ်ရင် ၁ လီတာမှာ ၃၅ ကျပ်ကနေ ကျပ် ၄၀ ခန့် အထိ အနည်းငယ် ပြန်တက်လာတာ တွေ့ရပါတယ်။

တဖက်မှာလည်း စစ်ကောင်စီ လက်အောက်ခံ စွမ်းအင်ဝန်ကြီးဌာနကပြည်တွင်းမှာချက်တဲ့ Ron 68၊ Ron 72၊ Ron 77 ဓာတ်ဆီတွေကို ဒီဇင်ဘာ ၄ ရက်က စပြီး ၂၀၀ ကျပ် လျှော့ချ ရောင်းပေးသွားမယ်လို့ ကြေညာထားပါတယ်။

အရင်က ပြည်တွင်းမှာချက်လုပ်တဲ့ ဓာတ်ဆီတွေကို ပုဂ္ဂလိက စက်သုံးဆီဖြန့်ဖြူးရေး လုပ်ငန်းတွေဆီ တင်ဒါစနစ်နဲ့ ရောင်းချခဲ့တာဖြစ်ပြီး အခုနှစ် ဇန်နဝါရီလကစပြီး သုံးစွဲသူတွေဆီ တိုက်ရိုက် ရောင်းချလာတာပါ။

စစ်ကောင်စီဗဟိုဘဏ်ကလည်း ဒီဇင်ဘာ ၃ ရက်က အွန်လိုင်းနိုင်ငံခြားငွေကြေးဈေးကွက်(FX Trading Platform) ကတဆင့် စက်သုံးဆီလုပ်ငန်းရှင်တွေအတွက် အမေရိကန်ဒေါ်လာ သန်း ၃၀ ရောင်းချပေးမယ်လို့ ကြေညာထားပါတယ်။