အင်ဒိုနီးရှားနိုင်ငံမှာ ပြီးခဲ့တဲ့သီတင်းပတ်တွေက ရေကြီးမှုနဲ့ မြေပြိုမှုတွေကြောင့် အဆိုးရွားဆုံး ထိခိုက်ခဲ့ရတဲ့ ဒေသတွေထဲက တခုဖြစ်တဲ့ မြောက်ဆူမားတြားရှိ အလယ်ပိုင်း တာပန်နူလီမှာ လုယက်ခံရတဲ့ စူပါမားကက်တခုရဲ့ အခြေအနေကို ပြသထားတဲ့ မျက်မြင်သက်သေဗီဒီယိုကို နိုဝင်ဘာ ၂၉ ရက်က ရိုက်ကူးခဲ့ပါတယ်။

အယ်လ်ဖာမီဒီဒေသ စူပါမားကက်မှာ ဗလာကျင်းနေတဲ့ ဈေးဗန်းစင်တွေ၊ ပြိုလဲပျက်စီးနေပြီး ကြမ်းပြင်မှာ ပြန့်ကျဲနေတဲ့ ပစ္စည်းအပိုင်းအစတွေနဲ့ အဆောက်အအုံအတွင်းမှာလည်း သူတို့ တွေ့ရှိသမျှကို ယူဆောင်ဖို့ ဟိုဒီလမ်းလျှောက်နေတဲ့ လူအနည်းငယ်ကို တွေ့ရှိရပါတယ်။

ဒေသခံမီဒီယာတွေဟာ မြောက်ဆူမားတြား ဒေသဆိုင်ရာ ရဲတပ်ဖွဲ့က ကော်မရှင်နာ ဖဲရီ ဝါလင်တူကန်ဟာ အနီးအနားရှိဆိုင်တွေ လုယက်ခံရကြောင်း ပြထားတဲ့ နိုဝင်ဘာ ၃၀ ရက်က လူမှုမီဒီယာ ဗီဒီယိုတွေကို တုံ့ပြန်ခဲ့ကြောင်း ဖော်ပြပါတယ်။

အင်ဒိုနီးရှားနိုင်ငံ ဆူမားတြားကျွန်းမှာ ရေကြီးရေလျှံမှုနဲ့ မြေပြိုမှုတွေကြောင့် သေဆုံးသူဦးရေ ၇၀၀ ကျော်အထိ မြင့်တက်လာကြောင်း သဘာဝဘေးအန္တရာယ်အေဂျင်စီက ဒီဇင်ဘာ ၂ ရက်မှာ ပြောကြားခဲ့ပါတယ်။

အာဏာပိုင်တွေဟာ အခြေခံအဆောက်အအုံတွေကို ပြုပြင်ဖို့နဲ့ အဆက်အသွယ် ပြတ်တောက်နေတဲ့ နေရာတွေကို အကူအညီတွေပေးပို့ဖို့ အလျင်စလို လုပ်ဆောင်ခဲ့ကြပါတယ်။

ဖိလစ်ပိုင်နဲ့ ဗီယက်နမ်တို့မှာ ဆက်တိုက် တိုက်ခတ်ခဲ့တဲ့ တိုင်ဖွန်းမုန်တိုင်းတွေ အပါအဝင် အင်ဒိုနီးရှား၊ မလေးရှားနဲ့ ထိုင်းနိုင်ငံတို့မှာလည်း ရေကြီးရေလျှံမှုနဲ့ မြေပြိုမှုတွေကြောင့် အရှေ့တောင်အာရှမှာ လနဲ့ချီ ဆိုးရွားပြီး အသက်ဆုံးရှုံးမှုများတဲ့ ရာသီဥတုအပြီးမှာ လူ ၉၀၀ နီးပါး သေဆုံးခဲ့ပြီး ဖြစ်ပါတယ်။

Source: Reuters