ကရင်ပြည်နယ်၊ မြဝတီမြို့နယ်မှာ အွန်လိုင်းငွေလိမ်လုပ်ငန်းတွေကြောင့် နာမည်ဆိုးနဲ့ ကျော်ကြားနေတဲ့ ရွှေကုက္ကိုမြို့ရှိ ကျားဖြန့် အဆောက်အအုံတလုံးကို  ဒီဇင်ဘာ ၃ ရက်​ ဒီကနေ့ နေ့လယ်  ၁၂ လောက်မှာ  စစ်​ကောင်စီတပ်က ပထမဆုံးအကြိမ် မိုင်းနဲ့ ​ဖောက်ခွဲဖျက်ဆီး​ လိုက်ပါတယ်။

ကရင်နယ်ခြားစောင့်တပ် (BGF) တွေ အဓိက ထိန်းချုပ်ထားတဲ့ ​ရွှေကုက္ကိုမြိုင်မြို့သစ်မှာ အထူးစီးပွား​ရေးလုပ်ငန်းတွေနဲ့ ကျားဖြန့်အွန်လိုင်းလုပ်ငန်းတွေကို တရုတ်လူမျိုးတွေ အများစုအပါအဝင်  နိုင်ငံပေါင်းစုံက နိုင်ငံခြားသားတွေ လာရောက်လုပ်ကိုင်နေကြတာဖြစ်ပြီး အမေရိကန် အပါအဝင် နိုင်ငံတကာရဲ့ ဖိအားပေးမှုတွေ ပြင်းထန်လာချိန်မှာ အခုလို မိုင်းခွဲဖျက်ဆီးမှုတွေ စလုပ်တာပါ။

ပြီးခဲ့တဲ့လကတော့ မြန်မာ-ထိုင်းနယ်စပ် မြဝတီ​တောင်ဘက်ရှိ KK Park ကျားဖြန့်လုပ်ငန်း အ​ဆောက်အအုံတွေကို  စစ်ကောင်စီတပ်က မိုင်းခွဲဖျက်ဆီးပြခဲ့ပြီး ရွေကုက္ကိုမှာတော့ အခုမှ ပထမဆုံးအကြိမ် ဖောက်ခွဲဖျက်ဆီးပြခဲ့တာပါ။ 

ဒါ့အပြင် ရွေကုက္ကိုမှာ ငွေလိမ်လုပ်ငန်းလုပ်နေတဲ့ တရုတ်နိုင်ငံသား ၂၉၁ ယောက် အပါအဝင်  ကျားဖြန့်လုပ်သား စုစု​ပေါင်း ၃၅၈ ယောက်ကို ဒီဇင်ဘာ ၃ ရက်​က မြန်မာ-ထိုင်း ချစ်ကြည်​ရေးတံတားကနေ လွှဲပြောင်းပေးခဲ့ပါတယ်။

ဒီဇင်ဘာ ၂ ရက်ကလည်း တရုတ်နိုင်ငံသား အယောက် ၃၀၀ လောက်ကို မြဝတီမြို့ကနေ ထိုင်းနိုင်ငံဘက်ကို လွှဲပြောင်း ပေးလိုက်ပြီ မဲဆောက်မြို့ အပြည်ပြည်ဆိုင်ရာ လေယာဥ်ကွင်းကနေ နေရပ်ပြန်ပို့လိုက်ပါတယ်။

ကျားဖြန့်လုပ်ငန်းတွေမှာ လူကုန်ကူးခံရတဲ့ တရုတ်နိုင်ငံသားတွေလည်း လုပ်ကိုင်နေကြသလို မြန်မာပြည်တွင်းမှာဘဲ တရုတ်နိုင်ငံကို မပြန်လိုတဲ့ တရုတ်နိုင်ငံသားတွေလည်းရှိနေပါတယ်။ ထိုင်းနိုင်ငံဘက်မှာလည်း စစ်တပ်နဲ့ ဌာနဆိုင်ရာတွေက လုံခြုံရေးတင်းကျပ်ထားတဲ့အတွက် သောင်ရင်းမြစ်ကမ်းစပ်မှာ သောင်တင်သူတွေလည်း ရှိနေပါတယ်။

လတ်တလော ထိုင်း-မြန်မာနယ်စပ် မင်းလက်ပံဒေသမှာ စစ်ကောင်စီတပ်နဲ့ ကရင်အမျိုးသားလွတ်မြောက်ရေးတပ်မတော်(KNLA) ပူးပေါင်းတပ်တွေ  နေ့စဥ်တိုက်ပွဲ ပြင်းထန်နေပြီး နယ်စပ်ဆိပ်တချို့ကို ပိတ်တာကြောင့် ကျားဖြန့်လုပ်သားတွေ ထိုင်းနိုင်ငံဘက်ကို ကူးသွားဖို့  အခက်ခဲများစွာကြုံတွေ့ နေရပါတယ်။

Photo: DVB