မြန်မာ့အရေး တိုးတက်လာဖို့ ကုလသမဂ္ဂရဲ့ တက်ကြွတဲ့အခန်းကဏ္ဍကို ဂျပန်က မျှော်လင့်နေပြီး နှစ်ဖက်စလုံးက အနီးကပ်ပူးပေါင်းဆောင်ရွက်ဖို့ သဘောတူခဲ့ကြပါတယ်။

ဂျပန်နိုင်ငံခြားရေးဝန်ကြီး မိုတဲဂီတိုရှီမစ်ဆုနဲ့ ကုလသမဂ္ဂအတွင်းရေးမှူးချုပ်ရဲ့ မြန်မာနိုင်ငံဆိုင်ရာ အထူးကိုယ်စားလှယ် ဂျူလီဘစ်ရှော့တို့ မနေ့ ဒီဇင်ဘာ ၁ ရက်က ဂျပန်နိုင်ငံ၊ တိုကျိုမြို့မှာ တွေ့ဆုံရာ သဘောတူညီမှုရရှိခဲ့တာပါ။

ဂျပန်နိုင်ငံခြားရေးဝန်ကြီးဌာနရဲ့ ဖိတ်ကြားချက်နဲ့ ဂျပန်နိုင်ငံကို ရောက်ရှိနေတဲ့ ဂျူလီဘစ်ရှော့နဲ့ ဝန်ကြီး မိုတဲဂီတို့  မိနစ် ၃၀ ကြာတွေ့ဆုံပြီး  မြန်မာနိုင်ငံရဲ့ ပိုမိုဆိုးရွားလာနေတဲ့ အခြေအနေတွေနဲ့ ပတ်သက်ပြီး ဆွေးနွေးခဲ့ကြတယ်လို့ ဂျပန်နိုင်ငံခြားရေးဌာနက ထုတ်ပြန်ပါတယ်။

ဒီတွေ့ဆုံမှုအတွင်း ဂျပန်နိုင်ငံခြားရေးဝန်ကြီး မိုတဲဂီက မြန်မာနိုင်ငံရဲ့ အခြေအနေ ပိုမိုဆိုးရွားလာနေတဲ့အပေါ် အလေးအနက် စိုးရိမ်မကင်းဖြစ်မိကြောင်း ထုတ်ဖော်ပြောကြားခဲ့ပြီး မြန်မာစစ်တပ်ကို အခြေအနေတွေ တိုးတက်ကောင်းမွန်လာအောင် တိုက်တွန်းနေတာတွေနဲ့ မြန်မာပြည်သူတွေအတွက် လူသားချင်းစာနာမှုအကူအညီတွေ ပေးအပ်နေတာ အပါအဝင် မြန်မာ့အရေး ကြိုးပမ်းဆောင်ရွက်နေတာတွေကို ရှင်းလင်းပြောကြားခဲ့ပါတယ်။

အထူးကိုယ်စားလှယ် ဂျူလီဘစ်ရှော့ကလည်း အာဏာသိမ်းမှုဖြစ်ပွားပြီးနောက်ပိုင်း ကုလသမဂ္ဂရဲ့ မြန်မာ့ရေး ဆောင်ရွက်ချက်တွေနဲ့ အနာဂတ်အလားအလာတွေကို ရှင်းပြခဲ့ပြီး ဂျပန်ရဲ့ အရေးပါတဲ့ အခန်းကဏ္ဍနဲ့ ကြိုးပမ်းအားမှုတွေကို တန်ဖိုးထား အသိအမှတ်ပြုကြောင်း တုံ့ပြန်ပြောဆိုခဲ့ပါတယ်။

ဂျပန်နိုင်ငံခြားရေးဝန်ကြီးက မြန်မာ့အရေး တိုးတက်ကောင်းမွန်လာဖို့အတွက် ကုလသမဂ္ဂက တက်ကြွစွာ ပါဝင်ဆောင်ရွက်လိမ့်မယ်လို့ မျှော်လင့်ကြောင်း ပြောကြားခဲ့ပါတယ်။

နှစ်ဖက်ခေါင်းဆောင်တွေဟာ မြန်မာ့အရေးနဲ့ပတ်သက်လို့ ဆက်လက် နီးနီးကပ်ကပ် ပူးပေါင်းဆောင်ရွက်သွားဖို့ သဘောတူညီခဲ့ကြကြောင်း ဂျပန်နိုင်ငံခြားရေးဝန်ကြီးဌာနရဲ့ ထုတ်ပြန်ချက်မှာ ဖော်ပြထားပါတယ်။

ဂျူလီဘစ်ရှော့ကို မြန်မာနိုင်ငံဆိုင်ရာ ကုလအထူးသံတမန်အဖြစ် ၂၀၂၄ ခုနှစ်၊ ဧပြီ ၅ ရက်မှာ ခန့်အပ်ခဲ့တာဖြစ်ပြီး မြန်မာ့အရေး သိုသိပ်လျှို့ဝှက်စွာ လုပ်ဆောင်နေပေမဲ့ ခုချိန်ထိ သိသာထင်ရှားတဲ့ရလဒ် တခုမှ ထွက်ပေါ်လာခြင်း မရှိသေးပါဘူး။

ဂျူလီဘစ်ရှော့ဟာ မြန်မာနိုင်ငံထဲ စီးပွားရေးလုပ်ကိုင်နေတဲ့ တရုတ်နိုင်ငံပိုင်ကုမ္ပဏီတွေနဲ့ စီးပွားရေးဆက်နွှယ်မှုတွေ ရှိတာကြောင့် အကျိုးစီးပွားပဋိပက္ခတွေအပေါ်စုံစမ်းစစ်ဆေးပေးဖို့ ဆိုပြီး JFM အပါအဝင် အရပ်ဘက်အဖွဲ့အစည်း ၃၀၀ နီးပါးက မတ် ၁၇ ရက်မှာ ကုလသမဂ္ဂကို တောင်းဆိုထားပါတယ်။