မြန်မာ ယူ-၁၇ လူငယ်ဘောလုံးအသင်းဟာ မနေ့က အုပ်စုတွင်းပြိုင်ဘက် အိုမန်အသင်းကို (၂-၀) ဂိုးနဲ့ အနိုင်ရပြီးနောက်မှာ ၂၀၀၆ ခုနှစ်နောက်ပိုင်း ပထမဆုံးအကြိမ် အာရှဖလား ခြေစစ်ပွဲအောင်မြင်ဖို့ နီးစပ်လာပါတယ်။
နိုဝင်ဘာ ၂၂ ရက်ကနေစတင်ပြီး ရန်ကုန်မြို့၊ သုဝဏ္ဏကွင်းမှာ အိမ်ရှင်အဖြစ် လက်ခံ ကျင်းပနေတဲ့ ၂၀၂၆ အာရှယူ-၁၇ခြေစစ်ပွဲ အုပ်စု G မှာ မြန်မာအသင်းက ၃ ပွဲကစား ၃ ပွဲစလုံးအနိုင်ရထားပြီး ရမှတ် ၉ မှတ်နဲ့ လက်ကျန်တပွဲ အလိုမှာ ဒုတိယနေရာက အိုမန်နဲ့ တတိယနေရာက ဆီးရီးယားအသင်းတွေကို ၃ မှတ်အသာနဲ့ ဦးဆောင်နေတာပါ။
အုပ်စုနောက်ဆုံးပွဲအဖြစ် မြန်မာယူ-၁၇ အသင်းက ဆီးရီးယားအသင်းနဲ့ နိုဝင်ဘာ ၃၀ ရက်မှာ ယှဉ်ပြိုင်ရမှာဖြစ်ပြီး အနိမ့်ဆုံးသရေရလဒ်ရရှိရုံနဲ့ ခြေစစ်ပွဲအောင်မြင်မှာပါ။
မြန်မာအသင်းဟာ အုပ်စုအဖွင့်ပွဲစဉ်မှာ အာဖဂန်နစ္စတန်ကို ၃ ဂိုး ၁ ဂိုး၊ ဒုတိယပွဲစဉ်မှာ နီပေါကို ၄ဂိုး ဂိုးမရှိ၊ တတိယပွဲစဉ်မှာ အိုမန်ကို ၂ ဂိုး ဂိုးမရှိရလဒ်တွေနဲ့ အနိုင်ရရှိခဲ့တာပါ။
အာရှယူ-၁၇ ပြိုင်ပွဲမှာသမိုင်းမှာ မြန်မာလူငယ်အသင်းက ၂၀၀၀ ပြည့်နှစ်၊ ၂၀၀၂ ခုနှစ်၊ ၂၀၀၆ ခုနှစ် ပြိုင်ပွဲတွေမှာ ခြေစစ်ပွဲအောင်မြင်ခဲ့ဖူးပါတယ်။
အခုနှစ်မှာခြေစစ်ပွဲ အောင်မြင်ခဲ့မယ်ဆိုရင် ၂၀၀၆ ခုနှစ်နောက်ပိုင်း ပထမဆုံးအကြိမ် ခြေစစ်ပွဲ အောင်မြင်မှာဖြစ်ပြီး နောက်ဆုံးအဆင့်ပြိုင်ပွဲကို အသင်း ၁၆ သင်းနဲ့ ဆော်ဒီအာရေဗျနိုင်ငံမှာ ကျင်းပမှာ ဖြစ်ပါတယ်။
