အမျိုးသားညီညွတ်ရေးအစိုးရ (NUG) ဝန်ကြီးချုပ်ရုံး အမြဲတမ်းအတွင်းဝန် ဒေါ်ကြည်ပြာနဲ့ ခင်ပွန်းဖြစ်သူတို့ တာဝန်ကနေ ယာယီရပ်နားထားပြီး တိုင်ကြားခံထားရတဲ့ အမှုကို စုံစမ်းစစ်ဆေးရေးအဖွဲ့နဲ့ စစ်ဆေးနေပြီလို့ NUG က နိုဝင်ဘာ ၂၄ ရက် ဒီနေ့ ထုတ်ပြန်ပါတယ်။

ဒေါ်ကြည်ပြာနဲ့ သူ့ရဲ့ခင်ပွန်းတို့ကို  အလွဲသုံးစားမှု၊ အဂတိလိုက်စားမှု စတာတွေနဲ့ ဝန်ကြီးချုပ်ရုံးကနေ နုတ်ထွက်ခဲ့ကြတဲ့ ဝန်ထမ်းတွေက နိုဝင်ဘာ ၁၉ ရက်စွဲပါစာနဲ့ စွပ်စွဲ တိုင်ကြားခဲ့တာ ဖြစ်ပါတယ်။

နိုင်ငံတော်ယာယီသမ္မတ၊ ပြည်ထောင်စုဝန်ကြီးချုပ်နဲ့ ပြည်ထောင်စုလွှတ်တော်ကိုယ်စားပြုကော်မတီ ဥက္ကဋ္ဌ တို့ဆီကို လိပ်မူထားတဲ့ အဲဒီတိုင်စာဟာ ပြည်ထောင်စုဝန်ကြီးချုပ်ရုံးရဲ့ အီးမေးလ်ကို မရောက်လာပေမဲ့ နိုင်ငံတော်အကြီးအကဲဖြစ်သူ ယာယီသမ္မတဆီကို ရောက်ရှိလာတာကြောင့် ဒါကိုဆောင်ရွက်ဖို့ ပြည်ထောင်စုဝန်ကြီးချုပ်က ၂၀၂၅ ခုနှစ်၊ နိုဝင်ဘာ ၂၂ ရက်နေ့မှာ စုံစမ်းစစ်ဆေးရေးအဖွဲ့ကို ဖွဲ့စည်းတဲ့အမိန့် ထုတ်ပြန် ဖွဲ့စည်းခဲ့တယ်လို့ ဆိုပါတယ်။

စုံစမ်းစစ်ဆေးရေးအဖွဲ့အနေနဲ့ တိုင်ကြားသူတွေ၊ တိုင်ကြားခံရသူတွေ၊ နှစ်ဖက် သက်သေတင်ပြတာတွေရှိရင် တင်ပြတဲ့သက်သေတွေ၊ တိုင်ကြားတာနဲ့ပတ်သက်ပြီး စစ်ဆေးဖို့လိုတဲ့ သက်သေတွေကို ခေါ်ယူစစ်ဆေးတာကို အမြန်ဆုံးလုပ်ပြီး တွေ့ရှိချက်တွေ၊ အကြံပြုချက်တွေကို ဝန်ကြီးချုပ်ဆီ ပြန်လည်တင်ပြဖို့ တာဝန်ပေးအပ်ထားပြီလို့ ထုတ်ပြန်ချက်မှာ ဖော်ပြပါတယ်။

တိုင်ကြားစာအပေါ် လိုအပ်တဲ့ စုံစမ်းစစ်ဆေးတာတွေ လုပ်နေတဲ့ ကာလအတွင်း တိုင်ကြားခံရသူတွေကို နိုဝင်ဘာ ၂၂ ရက်ကစပြီး တာဝန်ကနေ ယာယီရပ်နားထားတယ်လို့လည်း ဆိုပါတယ်။

စုံစမ်းစစ်ဆေးရေးအဖွဲ့အနေနဲ့လည်း လုပ်စရာတွေကို စလုပ်နေပြီဖြစ်ပြီး စစ်ဆေးတွေ့ရှိချက်တွေ အပေါ်မူတည်လို့ လိုအပ်တဲ့ အရေးယူဆောင်ရွက်တာတွေ ဆက်လုပ်သွားမယ်လို့လည်း ဆိုပါတယ်။

အတွင်းဝန် ဒေါ်ကြည်ပြာနဲ့ သူ့ခင်ပွန်းတို့ကို ဝန်ကြီးချုပ်ရုံး ဝန်ထမ်း ၁၉ ယောက်က တိုင်ကြားထားတာဖြစ်ပြီး ငွေကြေးကိစ္စအပါအဝင်၊ လုပ်ငန်းဆိုင်ရာ မလျော်ကန်တာတွေကို တင်ပြထားပါတယ်။

ဒေါ်ကြည်ပြာကတော့ “သတင်းမှားတွေကို သတင်းမီဒီယာကို အင်တာဗျူးသူတွေ၊ တိုင်ကြားခြင်းကို ဦးဆောင်ခဲ့သူတွေအနေနဲ့လည်း မိမိလုပ်ရပ်အပေါ် တာဝန်ယူရမှာ ဖြစ်ပါတယ်။ ဥပမာအားဖြင့် ဝန်ထမ်းများအတွက် နေထိုင်ခွင့်အထောက်အထား မပြုလုပ်ပေးဘူးဆိုတဲ့ကိစ္စဟာ လုံးဝ မှားယွင်းနေသလို၊ ဝန်ထမ်း ၈ ယောက်လောက်ကို အခန်းကျဉ်းတခုပဲ ပေးထားပြီး နေ့တိုင်း ရုံးတက်ရတယ် ဆိုတဲ့ကိစ္စမျိုး၊ ငွေကြေးတွေ စာရင်းပျောက်ကိစ္စမျိုး၊ ခွေးလေးတွေအတွက် တလ ဘတ်တသောင်းကျော် သုံးတယ်ဆိုတဲ့ ကိစ္စမျိုး စတာတွေဟာ အချက်အလက်တွေ တော်တော် လွဲမှားနေပြီး တချို့အကြောင်းအရာတွေကတော့ စွပ်စွဲချက်လို့ ပြောရမှာတောင် အတော်လေးခက်တဲ့ အနေအထားပါ။ အခြေအမြစ်မရှိတဲ့ အိမ်သာခွဲသုံးတဲ့ ကိစ္စလိုမျိုး၊ ခွေးလေးတွေနဲ့ အတူတူ ရုံးတက်ရတယ်ဆိုတဲ့ ကိစ္စလိုမျိုးပေါ့” လို့ သူ့ရဲ့ ဖေ့စ်ဘွတ်ခ်ကနေ တုံ့ပြန် ရေးသားထားပါတယ်။