ရှမ်းပြည်နယ်တောင်ပိုင်း၊ ဖယ်ခုံ-ပင်လောင်း နယ်စပ်မှာ စစ်ကောင်စီနဲ့ PNO ပြည်သူ့စစ်တို့ စစ်ကြောင်းထိုးလာပြီးနောက် တော်လှန်ရေးတပ်ဖွဲ့နဲ့ တိုက်ပွဲဖြစ်ပွားပြီး တိုက်ပွဲအတွင်း PNO ပြည်သူ့စစ်ဘက်က ဗိုလ်မှူး ၂ ယောက်အပါအဝင် ၃၀ ကျော် သေဆုံးခဲ့တယ်လို့ မြေပြင်သတင်းရင်းမြစ်တွေဆီက သိရပါတယ်။
နိုဝင်ဘာ ၁ ရက်နေ့ကနေ နိုဝင်ဘာ ၂၃ ရက်နေ့အတွင်း ဖြစ်ခဲ့တဲ့တဲ့တိုက်ပွဲတွေမှာ သေဆုံးခဲ့ကြတာဖြစ်ပြီး PNO ရဲ့ ဗိုလ်မှူးခွန်စိုးအောင်နဲ့ ဗိုလ်မှူးခွန်ဖေတို့ ဖြစ်တယ်လို့ ဆိုပါတယ်။
သတင်းရင်းမြစ်တယောက်က “ဗိုလ်မှူး ခွန်စိုးအောင်က ၁ ရက်နေ့မှာ ဘောရန်ရွာကို ရွာမီးရှို့နေတုန်း စနိုက်ပါနဲ့အပစ်ခံရတယ်။ ဗိုလ်မှူး ခွန်ဖေကတော့ ၁၅ ရက်နေ့ ဖြစ်ပွားတဲ့တိုက်ပွဲမှာ သေသွားတာ။ ဗိုလ်မှူးနှစ်ဦးဟာ ပအိုဝ်းဒေသမှာ ငွေညှစ်တာတွေ၊ နာမည်ဆိုးနဲ့ ကျော်ကြားနေသူတွေဖြစ်တယ်” လို့ပြောပါတယ်။
သေဆုံးသွားတဲ့ PNO ဗိုလ်မှူးတွေဟာ လူငယ်တွေကို စစ်သားအဖြစ် အတင်းအဓမ္မစုဆောင်းတာ၊ ကိုယ်တိုင်ဦးဆောင်ပြီး တော်လှန်ရေးတပ်ဖွဲ့တွေကိုတိုက်ခိုက်တာ၊ ပြည်သူလူထုကျေးရွာတွေကို မီးရှို့တာတွေမှာ ဦးဆောင်ပါဝင်သူတွေဖြစ်တယ်လို့ ဆိုပါတယ်။
တိုက်ပွဲတွေအတွင်း PNO ပြည်သူ့စစ်ဘက်က ဗိုလ်မှူး ၂ ယောက်အပြင် တပ်သား ၃၀ ကျော်လည်း သေဆုံးခဲ့တယ်လို့ ပြောပါတယ်။
စစ်တပ်နဲ့ PNO ပြည်သူ့စစ်တို့ဟာ ဖယ်ခုံအနောက်ဘက်ခြမ်းကို ဝင်ရောက်နိုင်ဖို့အတွက် ပင်လောင်းကနေ စစ်အင်အား ၅၀၀ ကျော် ဖြည့်တင်းထားပြီး စစ်ကြောင်းတွေခွဲ ထိုးစစ်ဆင်နေတယ်လို့ သိရပါတယ်။
အခုလည်း တိုက်ပွဲတွေပြင်းထန်နေဆဲဖြစ်ပြီး ဒေသတွင်း ကျေးရွာ ၈ ရွာမှ လူဦးရေ ၅,၀၀၀ ကျော်ဟာ ဘေးကင်းရာကို စစ်ဘေးတိမ်းရှောင်နေရတယ်လို့ ဒေသခံတွေဆီက သိရပါတယ်။
