ကျင်းပပြီးစီးခဲ့တဲ့ ပါတီစုံဒီမိုကရေစီ ရွေးကောက်ပွဲတွေတုန်းက ရွေးကောက်ပွဲအတွက် မဲဆွယ်စည်းရုံးခွင့်ပြုတဲ့ရက် မတိုင်ခင်ကတည်းက ဦးမှတ်ကြီး (အမည်လွှဲ) တယောက် စိတ်မရိုးမရွ ဖြစ်နေခဲ့ပါတယ်။
မဲဆွယ်စည်းရုံးခွင့် စတာနဲ့ စိတ်ကူးထားတာကို အကောင်အထည်ဖော်ဖို့ ကြိုတင်ပြင်ဆင်ထားတာတွေက အဆင်သင့်ဖြစ်နေပြီဖြစ်လို့ ဦးမှတ်ကြီး အဖို့ စိတ်ကို မနည်းဆွဲဆန့်ပြီး စောင့်နေခဲ့ရတာပါ။
ဒီလို မဲဆွယ်ကာလကို စိတ်လှုပ်ရှားမှုကြီးစွာနဲ့ စောင့်မျှော်နေတဲ့ ဦးမှတ်ကြီးမှာ ရွေးကောက်ပွဲ ဝင်ပြိုင်မယ့် ကိုယ်စားလှယ်လောင်း မဟုတ်သလို ပါတီတခုခုရဲ့ အောင်နိုင်ရေးတာဝန် ယူထားသူ တယောက်လို့ ထင်ရင် မှားပါလိမ့်မယ်။
သူက ရန်ကုန်မြို့ရဲ့ မြို့နယ်တခုမှာ အနှေးယာဥ်(ဆိုက်ကား) နင်းပြီး အသက်မွေးဝမ်းကျောင်းပြုနေတဲ့ အခြေခံလူတန်းစားတယောက်ပဲ ဖြစ်ပါတယ်။
အဲဒီ အနှေးယာဥ်လုပ်သား ဦးမှတ်ကြီးက “ဆိုက်ကားမှာ ကိုယ်နှစ်သက်တဲ့ ပါတီရဲ့ အလံကို တပ်မယ့်စိတ်ကူးက အစောကြီးကတည်းက ရှိနေတာ။ အဲဒီလိုလုပ်မလို့အတွက်လည်း ကိုယ့်ပိုက်ဆံနဲ့ကိုယ် ဝယ်ထားတယ်” လို့ ပြောပါတယ်။
ဒါက ပြီးခဲ့တဲ့ ၂၀၂၀ ရွေးကောက်ပွဲအတွက် မဲဆွယ်ကာလ မတိုင်ခင်က ခံစားဖြစ်ပေါ်ခဲ့တဲ့ ဦးမှတ်ကြီးရဲ့ ပြင်းပြတဲ့ စိတ်အခြေအနေ ဖြစ်ပါတယ်။
တကယ်လည်း အဲဒီရွေးကောက်ပွဲအတွက် မဲဆွယ်စည်းရုံးခွင့် စတာနဲ့ သူ အမြတ်တနိုး ကြိုတင်ဝယ်ယူထားတဲ့ အရွယ်အစားစုံ ပါတီအလံကို စိတ်ကူးထားတဲ့အတိုင်း ဆိုက်ကားမှာ တပ်ဆင်ပါတော့တယ်။
ဦးမှတ်ကြီးရဲ့ ဆိုက်ကားမှာ ရဲရဲနီနေတဲ့ အန်အယ်လ်ဒီ ပါတီ အလံတွေက နေရာယူထားခဲ့တာဖြစ်ပြီး တွေ့မြင်ရသူတိုင်းက သတိထားမိလောက်အောင် ဆန်းကြယ်နေခဲ့သလို သူကိုယ်တိုင်လည်း ကျေနပ်ပီတိ ဖြစ်ခဲ့ရတဲ့ အချိန်ကာလလို့ ဆိုရပါမယ်။
“ပြန်တွေးမိတိုင်းကို ပီတိဖြစ်ရတယ်။ အဲဒီအခြေအနေ ပြန်မရအောင် ဖျက်ဆီးခံရလို့လည်း ဒေါသထွက်ရတယ်” လို့ ဦးမှတ်ကြီးက ပြောပါတယ်။
ဦးမှတ်ကြီးက ၂၀၂၀ ရွေးကောက်ပွဲမှမဟုတ်၊ ၂၀၁၅ ရွေးကောက်ပွဲမှာကတည်းက သူအားပေး နှစ်သက်တဲ့ အန်အယ်လ်ဒီပါတီရဲ့ အလံကို ဆိုက်ကားမှာ တပ်ဆင်ပြီး အားပေး ထောက်ခံခဲ့သူ ဖြစ်ပါတယ်။
ဒီလို အားပေး ထောက်ခံတဲ့ လုပ်ရပ်ကို ဦးမှတ်ကြီးတင် မကဘဲ ရန်ကုန်မြို့က အနှေးယာဥ်လုပ်သား အများစု တက်တက်ကြွကြွ လုပ်ခဲ့ကြတာ ဖြစ်ပါတယ်။
ရွေးကောက်ပွဲ မဲဆွယ်ကာလအတွင်း ရဲရဲနီနေတဲ့ အန်အယ်လ်ဒီပါတီ အလံကို လက်ကိုင်တန်းမှာ တပ်ဆင်ထားကြတဲ့ ဆိုက်ကားတွေကို ရန်ကုန်မြို့ နေရာအနှံ့မှာ တွေ့မြင်ခဲ့ကြရမှာ ဖြစ်ပါတယ်။
တနေ့လုပ် တနေ့စား ရုန်းကန်နေရတဲ့ အနှေးယာဥ်လုပ်သားတွေအတွက် နိုင်ငံရေးနဲ့ အလှမ်းဝေးပေမဲ့ သူတို့ယုံကြည် အားထားတဲ့ပါတီ အနိုင်ရမှ ဖြစ်မယ်ဆိုတဲ့ အခြေခံအသိ ကိုယ်စီ ရှိနေခဲ့ကြပါတယ်။
ဒါကြောင့် ရွေးကောက်ပွဲနဲ့ အနှေးယာဥ်လုပ်သားတွေရဲ့ ပါဝင်မှု အခန်းကဏ္ဍက ဒွန်တွဲနေခဲ့သလို သူတို့ရဲ့ စိတ်အားတက်ကြွမှုက ရွေးကောက်ပွဲအပေါ် လူထုရဲ့ စိတ်ဝင်စားမှု အတိုင်းအတာကို ထင်ဟပ် ပေါ်လွင်စေတဲ့ ပြယုဂ်အဖြစ်လည်း ထင်ရှားခဲ့ပါတယ်။
အနှေးယာဥ်လုပ်သားတွေက ပါတီအလံ ဝယ်ယူတပ်ဆင်တာဟာ သူတို့ရဲ့ အားပေး ထောက်ခံမှုကို ပြရာရောက်သလို လူထုကြားထဲ လှည့်လည်သွားလာရင်းကနေ ပါတီတံဆိပ်ကို အမှတ်ရ စွဲထင်စေတာကြောင့် အန်အယ်လ်ဒီ အောင်နိုင်ရေးအတွက် တထောင့် တနေရာကနေ အရေးပါခဲ့ပါတယ်။
ဒါကြောင့်လည်း အန်အယ်လ်ဒီ အစိုးရဖွဲ့နိုင်တဲ့အထိ အနိုင်ရရှိခဲ့တဲ့ ၂၀၁၅ ရွေးကောက်ပွဲအပြီးမှာ ပါတီဥက္ကဋ္ဌ ဒေါ်အောင်ဆန်းစုကြည် ကိုယ်တိုင် အနှေးယာဥ်လုပ်သားတွေကို တခုတ်တရ ခေါ်ယူတွေ့ဆုံပြီး ကျေးဇူးတင်စကား ပြောခဲ့ပါတယ်။
ဒေါ်အောင်ဆန်းစုကြည်က “နိုင်ငံတိုးတက်ရင် ပြည်သူအားလုံး တိုးတက်မယ်ဆိုတဲ့ စိတ်ဓာတ်နဲ့ ကိုယ့်ခွန်အားနဲ့ ဝိုင်းဝန်းကူညီ လုပ်ဆောင်ပေးတဲ့အတွက် ဂုဏ်ယူတယ်” လို့ အနှေးယာဥ်လုပ်သားတွေကို အသိအမှတ်ပြု ပြောခဲ့ပါတယ်။
၂၀၂၀ ရွေးကောက်ပွဲမှာလည်း အနှေးယာဥ်လုပ်သားတွေက လက်မနှေးဘဲ အန်အယ်လ်ဒီပါတီကို ဆက်လက်အားပေး ဝန်းရံခဲ့ကြပြီး ရွေးကောက်ပွဲပုံရိပ်ကို အရောင်တင်ပေးခဲ့ပြန်ပါတယ်။
အဲဒီရွေးကောက်ပွဲမှာ တခြားနိုင်ငံရေးပါတီ တချို့က သူတို့ပါတီအမှတ်တံဆိပ်ကို ပြည်သူတွေ သိမြင် သတိထားမိအောင် အနှေးယာဥ်လုပ်သားတွေနဲ့ ထိုးဖောက်ဖို့ လုပ်လာတာ ရှိပါတယ်။
အနှေးယာဥ်လုပ်သားတွေကို ပိုက်ဆံပေး ငှားရမ်းပြီး ပါတီအမှတ်တံဆိပ်ပါတဲ့ ဦးထုပ်၊ အင်္ကျီ ဝတ်ခိုင်းတာ၊ ပါတီအလံနဲ့ ထီးကို ဆိုက်ကားမှာ တပ်ခိုင်းကာ မဲဆွယ်တဲ့နောက်ကနေ စီတန်း လိုက်ပါစေတာမျိုးနဲ့ အများသတိထားမိအောင် လုပ်ခဲ့ကြပါတယ်။
ဒါပေမဲ့ အနှေးယာဥ်လုပ်သား အများစုက သူတို့ အားပေး ထောက်ခံတဲ့ အန်အယ်လ်ဒီပါတီကိုပဲ ဆက်ဝန်းရံခဲ့ပြီး တခြားပါတီက ပိုက်ဆံပေး စည်းရုံးတာကို ငြင်းဆန်တာရှိသလို ပေးတာယူပြီး ကွယ်ရာရောက်တာနဲ့ နဂို အန်အယ်လ်ဒီအလံ ပြန်တပ်ကြသူတွေလည်း ရှိခဲ့ပါတယ်။
အဲဒီလို ရွေးကောက်ပွဲဆိုတာနဲ့ တွဲမြင်ရလေ့ရှိတဲ့ မြိုင်ဆိုင်၊ တက်ကြွနေတတ်တဲ့ အနှေးယာဥ်လုပ်သားတွေအဖို့ အခုတကြိမ် အာဏာသိမ်းစစ်တပ်က လုပ်မယ့် ၂၀၂၅ ရွေးကောက်ပွဲမှာတော့ တိတ်တဆိတ်ပဲ ရှိနေခဲ့ပါတယ်။
ဒီလို အနှေးယာဥ်လုပ်သားတွေရဲ့ တက်ကြွတဲ့ အခန်းကဏ္ဍ ပျောက်ဆုံးမှုက စစ်အုပ်စုလုပ်မယ့် အတုအယောင် ရွေးကောက်ပွဲအပေါ် လူထုက စိတ်ပါဝင်စား ရှိမနေဘူးဆိုတဲ့ အဓိပ္ပာယ် သက်ရောက် ပေါ်လွင်စေတာလည်း ဖြစ်ပါတယ်။
တောင်ဥက္ကလာပမြို့နယ်မှ အနှေးယာဥ်လုပ်သားတယောက်က “နိုင်ငံရေးအကြောင်းတော့ သိပ်အများကြီး နားမလည်ဘူး။ အခု သူတို့လုပ်မယ့် ရွေးကောက်ပွဲကို ဘယ်လိုမှ စိတ်မဝင်စားတာ။ ရွေးကောက်ပွဲကိုလည်း မယုံဘူး၊ ဝင်ပြိုင်မယ့် ပါတီတွေကိုလည်း အယုံအကြည်မရှိဘူး။ အဲဒီတော့ အရင်လို အားပေး၊ ထောက်ခံတာမျိုး လုပ်မှာမဟုတ်ဘူး” လို့ ပြောပါတယ်။
အနှေးယာဥ်လုပ်သားတွေ အနေနဲ့ ကိုယ့်ရဲ့ဆန္ဒနဲ့ ရွေးကောက်ပွဲမှာ ပါဝင်ပတ်သက်ဖို့ ရှိမနေပေမဲ့ နိုင်ငံရေးပါတီတချို့ရဲ့ ပိုက်ဆံပေးပြီး ငှားရမ်းအသုံးချတာမျိုး ထပ်ပြီး ကြုံနိုင်သလို စစ်အုပ်စုက ဝါဒဖြန့် ပုံဖော်ဖို့ ဖိအားပေး ခိုင်းစေတဲ့ လုပ်ရပ်တွေ လုပ်လာနိုင်တယ် ဆိုတဲ့ ခန့်မှန်းမှုတွေလည်း ရှိနေပါတယ်။
အဲဒီလို ကြုံလာခဲ့ရင် မလွှဲမရှောင်သာတဲ့ အခြေအနေနဲ့ ငွေကြေးအခက်အခဲကြောင့် လိုက်သွားရတာ ရှိနိုင်ပေမဲ့ စစ်အုပ်စုရဲ့ ရွေးကောက်ပွဲအပေါ်တော့ စိတ်ပြောင်းလဲ လက်ခံသွားမှာ မဟုတ်ဘူးလို့ တောင်ဥက္ကလာပမြို့နယ်က ပြီးခဲ့တဲ့ ရွေးကောက်ပွဲမှာ ဆိုက်ကားနင်းရင်း အားပေးထောက်ခံမှု လုပ်ခဲ့ပြီး လက်ရှိ ဆိုင်ကယ်ဘေးတွဲ မောင်းနေသူတယောက်က ပြောပါတယ်။
စစ်အုပ်စုက ဒီဇင်ဘာလကုန်ပိုင်းကနေစပြီး လုပ်သွားမယ့် အတုအယောင် ရွေးကောက်ပွဲမှာ စစ်တပ် ကျောထောက်နောက်ခံပေးထားတဲ့ ကြံ့ခိုင်ရေးပါတီနဲ့ စစ်တပ်ထောက်ခံတဲ့ ပါတီတွေပဲ ဝင်ရောက်ယှဥ်ပြိုင်ဖို့ရှိတာ ဖြစ်ပါတယ်။
လက်ရှိမှာ စစ်ကောင်စီက ပြည်သူတွေ ရွေးကောက်ပွဲအပေါ် စိတ်ဝင်စားလာအောင် ဝါဒဖြန့် စည်းရုံးတာတွေ အရှိန်မြှင့်လုပ်နေပေမဲ့ ထိရောက်မှုရှိမနေဘဲ အသိအမှတ်မပြုတဲ့ တုံ့ပြန်မှုတွေနဲ့ ရင်ဆိုင်နေရပါတယ်။
အဲဒီရွေးကောက်ပွဲမှာ ဝင်ပြိုင်မယ့်သူတွေရဲ့ မြေပြင် မဲဆွယ်စည်းရုံးမှုတွေကလည်း ခြောက်ကပ်ကပ်နိုင်တဲ့ အနေအထားမှာ ရှိနေခဲ့ပြီး ရွေးကောက်ပွဲတခုရဲ့ အနှစ်သာရ ပျောက်ဆုံးနေခဲ့ပါတယ်။
အထူးသဖြင့် အနှေးယာဥ်လုပ်သားတွေရဲ့ ဥပေက္ခာပြုမှုအောက်က စစ်အုပ်စုရဲ့ အတုအယောင် ရွေးကောက်ပွဲမှာ သတင်းမေးသူမရှိတဲ့ နာရေးတခုနဲ့ သဏ္ဌာန်တူလို့ နေပါတယ်။
မင်းမခ
