Google က AI နောက်ဆုံးမော်ဒယ်ဖြစ်တဲ့ Gemini 3 ကို ကြေညာခဲ့တာကြောင့် ChatGPT ရဲ့  OpenAI နဲ့ ယှဉ်ပြိုင်မှု ပိုပြီး ပြင်းထန်လာပါတယ်။

AI မော်ဒယ်အသစ်ဟာ သုံးစွဲသူတွေအတွက် ပိုပြီးရှုပ်ထွေးတဲ့ မေးခွန်းတွေကို ပိုကောင်းတဲ့ အဖြေတွေ ပေးနိုင်မှာဖြစ်ပါတယ်။

“လိုအပ်တာတွေကို prompt နည်းနည်းနဲ့ ရနိုင်ပါတယ်” လို့ အယ်ဖာဘတ် စီအီးအို ဆွန်းဒါပွတ်ချိုင်းက ပြောပါတယ်။

Gemini 3 ကို Gemini app ထဲမှာ ပါဝင်မှာဖြစ်ပြီး Google AI ရှာဖွေမှုမှာ AI Mode နဲ့ AI Overviews တို့ အပါအဝင် လုပ်ငန်းသုံးအဆင့် ပြုလုပ်နိုင်မှာဖြစ်ပါတယ်။

အင်္ဂါနေ့က ထွက်ရှိခဲ့တဲ့ Gemini 3 ဟာ လာမယ့် ရက်သတ္တပတ်တွေအတွင်းမှာ ပိုပြီး လူသိများလာဖွယ် ရှိပါတယ်။

ဒါဟာ Gemini 2.5 ကို မိတ်ဆက်ခဲ့ပြီး ၈ လအကြာမှာ မိတ်ဆက်ခဲ့တာလည်း ဖြစ်ပါတယ်။

လက်ရှိအချိန်မှာ Gemini app အသုံးပြုသူဟာ တလကို သန်း ၆၅၀ ရှိပြီး AI Overviews ကို လစဉ် အသုံးပြုသူ ၂ ဘီလီယံအထိ ရှိပါတယ်လို့ Google က‌ ပြောပါတယ်။

ChatGPT ကတော့ အပတ်စဉ်အလိုက် အသုံးပြုသူ သန်း ၇၀၀ ရှိတယ်လို့ ဩဂုတ်လတုန်းက ပြောခဲ့ဖူးပါတယ်။

၂၀၂၂ ခုနှစ်မှာ စတင်ခဲ့တဲ့ ChatGPT ဟာ ပြီးခဲ့တဲ့ ဩဂုတ်လက GPT 5 ကို မိတ်ဆက်ခဲ့တာလည်း တွေ့ရပါတယ်။

ဒါ့အပြင် ပြီးခဲ့တဲ့အပတ်ကလည်း update ၂ ခု ပေးခဲ့တာကြောင့် ChatGPT နဲ့ Google တို့ရဲ့ AI နည်းပညာ ယှဉ်ပြိုင်မှု ပိုပြီး ပြင်းထန်လာတာ ဖြစ်ပါတယ်။