မွန်ပြည်နယ်၊ ရေးမြို့နယ်၊ လိပ်ပုတ်ကျေးရွာကို နိုဝင်ဘာ ၁၅ ရက်နေ့မှာ စစ်ကောင်စီတပ် စစ်ကြောင်းထိုး ဝင်ရောက်လာတာကြောင့် ထိတွေ့တိုက်ပွဲဖြစ်ပွားခဲ့ပြီး ဒေသခံတွေကို ကယ်ထုတ် ပြောင်းရွှေ့ပေးခဲ့တယ်လို့ ရေးဘီလူးတော်လှန်ရေးတပ်ဖွဲ့ဆီက သိရပါတယ်။
လိပ်ပုတ်ကျေးရွာကို စစ်ကြောင်းထိုး ဝင်ရောက်လာတဲ့ စစ်ကောင်စီတပ်က လက်နက်ကြီးတွေနဲ့ ပစ်ခတ်လို့ လူနေအိမ်တလုံး၊ ဆိုင်ကယ်ပြင်ဆိုင်နဲ့ ဆိုင်ကယ် ၂ စီး မီးလောင်ပျက်စီးခဲ့သလို သက်ကြီးရွယ်အို၊ ကလေးတွေနဲ့ ဒေသခံတချို့ကို ကူညီကယ်ထုတ်ပေးခဲ့တယ်လို့ ဆိုပါတယ်။
ရေးဘီလူးတပ်ဖွဲ့တာဝန်ရှိသူက “လိပ်ပုတ်ကျေးရွာကို စစ်ကြောင်းထိုးလာတာကြောင့် သွားရောက်ပစ်ခတ်ခဲ့တာ နှစ်ဖက် ထိတွေ့တိုက်ပွဲဖြစ်ပွားခဲ့လို့ ပိတ်မိနေတဲ့ ဒေသခံတွေကို အဓိက ကူညီကယ်ထုတ်ပေးပြီး အချိန်ပိုင်းရွှေ့ပြောင်းပေးခဲ့တာ” လို့ ပြောပါတယ်။
နိုဝင်ဘာ ၁၄ ရက်နေ့ကလည်း ရေးမြို့နယ်၊ ရွာကလေးကျေးရွာကို စစ်ကောင်စီက စစ်ကြောင်းထိုး ဝင်ရောက်လာတာကြောင့် ရေးဘီလူးတပ်ဖွဲ့နဲ့ ထိတွေ့တိုက်ပွဲဖြစ်ပွားခဲ့ပြီး စစ်ကောင်စီတပ်ဘက်က ၇ ယောက်သေဆုံး၊ အများအပြား ထိခိုက်ဒဏ်ရာရရှိသွားတယ်လို့ မြေပြင်စစ်ရေးသတင်းရင်းမြစ်တွေဆီက သိရပါတယ်။
စစ်ကောင်စီတပ်ဟာ ရေးမြို့နယ်က ကျေးရွာတွေကို ဆက်တိုက်ဆိုသလို စစ်ကြောင်းထိုး ဝင်ရောက်နေပြီး တော်လှန်ရေးတပ်တွေနဲ့ ထိတွေ့တိုက်ပွဲတွေ ဖြစ်ပွားနေတယ်လို့ ဆိုပါတယ်။
