နေပြည်တော်ကောင်စီနယ်မြေ၊ ဥတ္တရသီရိခရိုင်၊ တပ်ကုန်းမြို့နယ်ရှိ  စစ်တပ်ရဲ့ လုံခြုံရေးစခန်းတခုကို ပြည်သူ့လွတ်မြောက်ရေးတပ်မတော် (PLA) က ဝင်ရောက်စီးနင်းခဲ့ပြီး ခဲယမ်းတချို့၊ ငွေသားတချို့နဲ့ စစ်အသုံးအဆောင်ပစ္စည်းတချို့ သိမ်းဆည်းရမိခဲ့တယ်လို့ ဒီကနေ့ နိုဝင်ဘာ ၁၄ ရက်မှာ PLA က ထုတ်ပြန်ပါတယ်။

ရတနာမြေအခြေပြု လုံခြုံရေးကင်းစခန်းကို PLA က နိုဝင်ဘာ ၁၂ ရက်မှာ ဝင်ရောက်စီးနင်းခဲ့တာ ဖြစ်ပြီး အဲဒီစခန်းဟာ စစ်ကောင်စီတပ်တွေ ၂ နှစ်ဝန်းကျင် တပ်စွဲထားတဲ့စခန်း ဖြစ်ပါတယ်။

ရမည်းသင်းမြို့နယ်က စစ်ကြောင်း၊ နေပြည်တော်နယ် အမြန်လမ်းက စစ်ကြောင်းနဲ့ အခြေပြုစခန်း ၂ ခုက စစ်ကြောင်း စုစုပေါင်း စစ်ကြောင်း ၃ ကြောင်းနဲ့ စစ်ကောင်စီတပ်က နယ်မြေစိုးမိုးရေး စစ်ကြောင်းထိုးနေတုန်းမှာပဲ အခုလို PLA က ဝင်ရောက်စီးနင်းခဲ့တာလို့ သိရပါတယ်။

အခုလို ဝင်ရောက်စီးနင်းချိန်မှာ စစ်ကောင်စီတပ်ဖွဲ့ဝင်တွေဟာ စခန်းစွန့်ခွာ ထွက်ပြေးသွားခဲ့တယ်လို့ ထုတ်ပြန်ချက်က ဆိုပါတယ်။

အဲဒီ လုံခြုံရေးကင်းစခန်းကို ရှင်းလင်းရေးတွေ ဆောင်ရွက်ခဲ့ပြီး နိုဝင်ဘာ ၁၃ ရက်မှာတော့ စခန်းတခုလုံးကို ဒုတိယအကြိမ် ထပ်ရှင်းလင်းခဲ့ကာ ခဲယမ်းတချို့၊ ငွေသားတချို့နဲ့ စစ်အသုံးအဆောင် ပစ္စည်းတချို့ကို သိမ်းဆည်းရမိခဲ့တယ်လို့လည်း PLA က ဆိုပါတယ်။

လက်ရှိအချိန်မှာ စစ်ကောင်စီတပ်ရဲ့ စစ်ကြောင်း ၂ ခုဟာ ရတနာမြေအခြေပြု လုံခြုံရေးစခန်းရဲ့ အနီးကပ်ရွာ ၂ ရွာမှာ စစ်ကြောင်းထိုင်နေတယ်လို့လည်း ထုတ်ပြန်ထားပါတယ်။

တပ်ကုန်းမြို့နယ်ရှိ စစ်တပ်ရဲ့ လုံခြုံရေးစခန်းကို တော်လှန်ရေးတပ်ဖွဲ့က ဝင်စီးနင်းခဲ့တာနဲ့ ပတ်သက်ပြီး စစ်ကောင်စီဘက်ကတော့ သတင်းထုတ်ပြန်တာ မတွေ့ရသေးပါဘူး။