တနင်္သာရီတိုင်း၊ မြန်မာ-ထိုင်းနယ်စပ် မောတောင်မြို့မှာ စစ်ကောင်စီတပ်ဘက်က လက်နက်ကြီးနဲ့ ပစ်ခတ်တာကြောင့် မောတောင်မြို့ အပါအဝင် အနီးရှိ ကျေးရွာတွေက ဒေသခံတွေ စစ်ဘေးရှောင်နေရတယ်လို့ ဒေသခံတွေဆီက သိရပါတယ်။

နိုဝင်ဘာ ၁၀ ရက် ည ၁၁ နာရီခွဲဝန်းကျင်လောက်မှာ မောတောင်မြို့ရှိ စစ်ကောင်စီတပ်တွေက အနီးနားဝန်းကျင်ရှိ ကျေးရွာတွေထဲကို လက်နက်ကြီးနဲ့ ပစ်ခတ်တာကြောင့် ဒေသခံတွေ ထွက်ပြေး တိမ်းရှောင်နေရတယ်လို့ သိရပါတယ်။

ဒေသခံတယောက်က “မောတောင်တမြို့လုံးက ထိုင်းနိုင်ငံ၊ ပကျော့မြို့ထဲ ရှောင်နေရတယ်။ အနီးနားဝန်းကျင်မှာရှိတဲ့ ဒေသခံတချို့ကလည်း ဥယျာဥ်ခြံမြေတွေမှာ ရှောင်နေကြတယ်။ တချို့က အရေးကြီးပစ္စည်းတွေ ရွှေ့ပြီး လူပဲလာနေကြတယ်။ လေယာဥ်တွေပဲ ကြောက်ရတ​ယ်” လို့ ပြောပါတယ်။

လက်ရှိမှာတော့ မောတောင်မြို့ အနီးနားဝန်းကျင်မှာ စစ်ကောင်စီတပ်နဲ့ ဒေသခံ တော်လှန်ရေး ပူးပေါင်းတပ်ဖွဲ့တို့ စစ်ရေးတင်းမာနေတယ်လို့ ဒေသခံတွေက ပြောပါတယ်။

မောတောင်မြို့ အနီးနားဝန်းကျင်မှာရှိတဲ့ စစ်ရေးအခြေအနေကို သိရှိနိုင်ဖို့ ကရင်အမျိုးသားအစည်းအရုံး (KNU) တပ်မဟာ ၄ တနင်္သာရီမြို့နယ် ဥက္ကဋ္ဌ ပဒိုညာဝါးကို DVB အနေနဲ့ ဆက်သွယ်မေးမြန်းဖို့ ကြိုးစားနေဆဲပါ။

တနင်္သာရီမြို့နယ်၊ ထုံခါ-မောတောင် လမ်းပိုင်းတလျှောက်မှာလည်း စစ်ရေးပြင်းထန်နေတာကြောင့် စာရင်းရှိ အိမ်ထောင်စုပေါင်း ၂၇၅ စု စစ်ဘေးရှောင်နေရတယ်လို့ စစ်ရှောင်ကူညီပေးသူတွေဆီက သိရပါတယ်။