ထိုင်းနိုင်ငံ ဘန်ကောက်မှာ မြန်မာအလုပ်သမားရှာဖွေရေး အေဂျင်စီအလုပ် လုပ်နေသူအချင်းချင်း ဘတ်ငွေ ၁၀ သန်း ခိုးယူမှုဖြစ်ပွားပြီး မြန်မာနိုင်ငံသား ၃ ယောက်ကို ဖမ်းဆီးရမိပြီလို့ ထိုင်းသတင်းတွေမှာ ဖော်ပြပါတယ်။
ဘန်ကောက် ပရဝေ့နယ်မြေ နောင်ဘွန်ရပ်ကွက် ဆီရိနတ်ခလင်းလမ်း ကွန်ဒိုမီယံတခုမှာ နေထိုင်သူ အသက် ၃၃ နှစ်အရွယ် မြန်မာအမျိုးသမီးတယောက်ဟာ မြန်မာလုပ်သားတွေအတွက် အလုပ်ရှာပေးနေတဲ့ အေဂျင်စီကဖြစ်ပြီး ပြီးခဲ့တဲ့ နိုဝင်ဘာ ၉ ရက် ည ၁၀ နာရီခွဲက သူအပြင်သွားနေစဉ် လုပ်ဖော်ကိုင်ဘက် အမျိုးသမီးက အေဂျင်စီပိုင် ငွေ ဘတ် ၁၀ သန်း ခိုးယူသွားကြောင်း ဖရခနုံနယ်မြေရဲစခန်းကို တိုင်ကြားခဲ့ပါတယ်။
တာဝန်ရှိသူတွေက စီစီတီဗီကင်မရာကနေတဆင့် ထောက်လှမ်းစုံစမ်းပြီး ငွေခိုးမှုမှာ ပါဝင်ပတ်သက်သူ ၃ ယောက်ကို နိုဝင်ဘာ ၁၂ ရက် ညနေ ၄ နာရီခွဲအချိန် ဖစ်ချ်ဘူရီခရိုင် ချအန်းမြို့ရှိ ဟိုတယ်တခုရဲ့ အခန်းအမှတ် ၂၀၃ မှာ သွားရောက်ဖမ်းဆီးခဲ့ပါတယ်။
သဲငုံဖူး (၃၅ နှစ်)၊ နှင်းဖြိုးဝေဇာဦး (၃၁ နှစ်) နဲ့ မင်းဘိုမောင် (၂၉ နှစ်) တို့ကို ခိုးမှုကျူးလွန်စဉ် အသုံးပြုခဲ့တဲ့ နစ်ဆန်ကားအညိုရောင်၊ ခိုးရာပါ ငွေသား ၈,၈၄၁,၀၀၀ နဲ့အတူ ဖမ်းဆီးမိခဲ့တယ်လို့ ဆိုပါတယ်။
သဲငုံဖူးက အပေါင်းပါ ၂ ယောက်နဲ့အတူ ခိုးမှုကျူးလွန်ကြောင်း ဝန်ခံပြီး ကျန်ငွေ ဘတ် ၁ သန်း ၂ သိန်းနီးပါးကို သုံးဖြုန်းကာ အချို့ကို ရွှေဝယ်ထားပြီး အချို့ကို မြန်မာပြည်က ဘဏ်စာရင်းထဲ ထည့်ထားတယ်လို့ ဆိုပါတယ်။
ရဲစခန်းက ခိုးမှုကျူးလွန်သူ ၂ ယောက်ကို ဖောက်ထွင်းဖျက်ဆီးမှု၊ ညအချိန် တပါးသူ ပစ္စည်းဥစ္စာ ခိုးယူမှု၊ နေထိုင်ခွင့်ဗီဇာ သက်တမ်းကုန်ဆုံးမှုတွေနဲ့ အရေးယူထားပြီး ကျန်အပေါင်းပါ တယောက်ကိုတော့ ခိုးမှုပူးပေါင်းကြံစည်မှုတွေနဲ့ အရေးယူသွားမယ်လို့ ထိုင်းသတင်းတွေမှာ ဖော်ပြပါတယ်။
Source: Khaosod / CH7 TV News
