မန္တလေးတိုင်း၊ မတ္တရာမြို့နယ် အရှေ့ခြမ်းမှာရှိတဲ့ ဆည်တော်ကြီးရေလှောင်တမံရှိ တော်လှန်ရေး တပ်တွေသိမ်းပိုက်ထားတဲ့ တပ်စခန်းတခုကို နိုဝင်ဘာလ ၇ ရက်မှာ စစ်တပ်က ပြန်သိမ်းပိုက်လိုက်ပြီလို့ စစ်ကောင်စီ ဝါဒဖြန့် သတင်းစာတွေမှာဖော်ပြပါတယ်။
ဆည်တော်ကြီးရေလှောင်တမံနဲ့ ပတ်ဝန်းကျင်ဒေသကို ပြန်သိမ်းပိုက်လိုက်ပြီလို့ စစ်တပ်က ထုတ်ပြန်ထားတာပေမဲ့ အဲဒီအနားက ပြည်သူ့ကာကွယ်ရေးတပ်မတော် (မန္တလေး) MDY PDF သိမ်းပိုက်ထားတဲ့ နောက်ထပ်စခန်းတခုဖြစ်တဲ့ အင်ကြင်းမြိုင် လေကြောင်းရန်ကာကွယ်ရေး တပ်စခန်းအကြောင်းတော့ ထုတ်ပြန်ချက်မှာ မပါဝင်ပါဘူး။
ဒီသတင်းနဲ့ ပတ်သက်ပြီး မန္တလေးပြည်သူ့ကာကွယ်ရေးတပ်မတော် (MDY-PDF) ကို ဆက်သွယ်မေးမြန်းနေဆဲဖြစ်ပါတယ်။
အဲဒီတပ်စခန်းတွေကို ၁၀၂၇ စစ်ဆင်ရေး ဒုတိယပိုင်း ရှမ်း-မန်း စစ်ဆင်ရေးမှာ တော်လှန်ရေးတပ်တွေက ထိုးစစ်ဆင်တိုက်ခိုက်ခဲ့ပြီး ၂၀၂၄ ဇူလိုင်လက သိမ်းပိုက်ခဲ့တာဖြစ်ပါတယ်။
၁၀၂၇ စစ်ဆင်ရေးမှာ ဦးဆောင်ပါဝင်ခဲ့ကြတဲ့ တအာင်းနဲ့ ကိုးကန့် တော်လှန်ရေးတပ်တွေအပေါ် တရုတ်ဖိအားပေးမှုကြောင့် စစ်တပ်နဲ့ အပစ်အခတ်ရပ်စဲပြီးနောက်ပိုင်း အညာဒေသကို စစ်တပ်က အလုံးအရင်းနဲ့ စစ်ကြောင်းထိုးနေသလို လေကြောင်းကနေလည်း တိုက်ခိုက်နေတာဖြစ်ပါတယ်။
