ရုရှားတပ်တွေက ယူကရိန်းနိုင်ငံ ဇာပိုရစ်ရှ်ဇီယာဒေသမှာရှိတဲ့ ခရာစ်နိုးယက်စ်ခ်ရွာနဲ့ ခါခိဗ်ဒေသမှာရှိတဲ့ ဆာဒို့ဗ်ရွာတွေကို သိမ်းပိုက်ထိန်းချုပ်နိုင်ခဲ့တယ်လို့ ရုရှားကာကွယ်ရေးဝန်ကြီးဌာနက အောက်တိုဘာ ၃၀ ရက်မှာ ပြောပါတယ်။
နိုဝင်ဘာ ၁ ရက်မှာ ရုရှားဝန်ကြီးဌာနက ထုတ်ပြန်ခဲ့တဲ့ ဗီဒီယိုတွေထဲမှာ ယူကရိန်းနိုင်ငံ ဇာပိုရစ်ရှ်ဇီယာဒေသမှာရှိတဲ့ ခရာစ်နိုးယက်စ်ခ်ရွာလို့ ပြောထားတဲ့ နေရာမှာ ယူကရိန်းစစ်ဘက်ယာဉ်တွေနဲ့ ဘန်ကာတွေကို ပစ်မှတ်ထားတဲ့ ဒရုန်းတွေကို ပြသထားပါတယ်။
ခရာစ်နိုးယက်စ်ခ်ရွာမှာရှိတဲ့ အဆောက်အအုံတွေနားမှာ ရုရှားအလံကိုင်ထားတဲ့ စစ်သားတွေကိုလည်း ပြသထားပါတယ်။
ရုရှားအထူးတပ်ဖွဲ့တွေဟာ တိုက်ပွဲဖြစ်နေတဲ့ အရှေ့ပိုင်းမြို့ ပေါ့ခ်ရော့ဗ်စ်ခ်ဆီ ရဟတ်ယာဉ်နဲ့ စစ်သားတွေ ပျံသန်းဝင်ရောက်နိုင်ဖို့ ယူကရိန်းအထူးတပ်ဖွဲ့တွေရဲ့ ကြိုးပမ်းချက်ကို တားဆီးနိုင်ခဲ့တယ်လို့ ရုရှားကာကွယ်ရေးဝန်ကြီးဌာနက ပြောပါတယ်။
ရဟတ်ယာဉ်ပေါ်ပါတဲ့ ယူကရိန်းနိုင်ငံသား ၁၁ ယောက်စလုံး သေဆုံးသွားတယ်လို့လည်း ဝန်ကြီးဌာနက ပြောပါတယ်။
ယူကရိန်းအစိုးရဟာ ပေါ့ခ်ရော့ဗ်စ်ခ်မြို့ရဲ့ အစိတ်အပိုင်းတချို့ကို တိုက်ခိုက်ဖို့ ယူကရိန်း အထူးတပ်ဖွဲ့တွေကို နေရာချထားပေးခဲ့တယ်လို့ ယူကရိန်းစစ်ဘက် သတင်းရင်းမြစ် ၂ ရပ်က ပြောကြားခဲ့ပြီး ရုရှားတပ်တွေက ယူကရိန်းတပ်ဖွဲ့တွေကို ဝိုင်းထားတယ်လို့ ရုရှားအစိုးရက ပြောပါတယ်။
Source: Reuters
